Read Papiamento Proverbionan 29 Bible Online

Proverbionan 29 - Papiamento bible

Proverbionan 29

¹Hende ku keda tèrko a pesar di korekshon, n'un momento dado ta haña asin'un kastigu, ku n' tin awa pa lab'é mas.

²Ora hende hustu ta na mando, tur hende ta kontentu; ora mal hende ta goberná, tur hende ta gruña.

³Un hòmber ku stima sabiduria ta hasi su tata kontentu, pero un amigu di muhénan di bida ta spat rikesa di su tata.

⁴Bou di un gobernante hustu ta bai e hendenan bon, pero un hende ku ta keda eksigí belasting ta kaba ku e pais.

⁵Ken ku trastia su bisiña, ta pone un trampa p'e.

⁶Mal hende ta kai den trampa di su mes piká, pero hende hustu por kanta i keda kontentu.

⁷Hende hustu ta tene kuenta ku derechi di hende pober, mal hende n' ta buska drechi.

⁸Un chèrchadó por instigá henter un siudat, pero un hende sabí ta kalma tur emoshon.

⁹Si un hende sabí hiba un hende bobo dilanti, e bobo lo ras i hasi chèrchè, ta bochincha so lo tin.

¹⁰Hende ku gusta drama sanger ta odia hende honesto, i ta buska moda di mata nan.

¹¹Hende bobo n' por dominá su rabia, pero hende sabí sí.

¹²Un gobernante ku ta bai tras di mentira, ta daña tur su sirbidónan.

¹³Tantu hende pober komo su opresor tin e kos akí komun: ta SEÑOR ta laga nan tur dos mira lus.

¹⁴Si un rei husga pobernan ku honestidat, su periodo di gobernashon semper lo ta seif.

¹⁵Halá 'i sota i korekshon ta hasi hende sabí; un mucha lagá pa su kuenta, ta pone kara di su mama na bèrgwensa.

¹⁶Ora mal hende ta bona, piká tambe ta bona, pero hende hustu lo mira kaida di mal hende.

¹⁷Koregí bo yu i l'e laga bo biba trankil, i duna bo hopi satisfakshon.

¹⁸Kaminda profeta n' ta haña revelashon, e pueblo ta bira pa su kuenta, felis e pueblo ku ta kumpli ku lei di Dios!

¹⁹No por koregí un katibu ku palabra, pasobra ounke e ta komprondé, e n' ta hasi kaso.

²⁰B'a yega di topa un hende ku ta papia pa loko? Tin mas speransa p'un hende bobo.

²¹Si un hende malkriá su sirbidó fo'i chikitu, e sirbidó ta kousa problema na final.

²²Hende rabiá ta trese desunion, i hende ku ta rabia lihé ta hasi hopi piká.

²³Hende orguyoso ta kai, hende humilde ta haña honor.

²⁴Kómplise di un ladron ta enemigu di su mes, pasobra ounke e ta tende maldishon,[11] e n' ta duna boka.

²⁵Es ku tin miedu di hende ta pone trampa p'e mes, es ku konfia den SEÑOR ta seif.

²⁶Hopi hende ta buska oudiensia serka un gobernante, pero ta serka SEÑOR ta haña hustisia.

²⁷Hende hustu ta detestá hende deshonesto, mal hende ta detestá hende ku ta sigui Dios.