Read Papiamento Proverbionan 30 Bible Online

Proverbionan 30 - Papiamento bible

Proverbionan 30

¹Palabranan di Agur, yu hòmber di Yakè. Loke Dios a manda mi bisa.[12] Mi ta kansá, mi Dios, mi ta kansá. Mi ta suak.[13]

²Mi ta kere ku mi ta mas bobo ku kualke hende, mi sintí humano n' ta mashá di gaba.

³Mi n' haña sabiduria, ni mi n' konosé kamindanan di e úniko Dios.

⁴Pero un hende a yega di subi bai shelu i bolbe bini abou despues? Un hende a yega di kohe bientu tene ku su man òf lora awa warda den su mantel? Ken a determiná unda mundu ta kaba? Kon yama e hòmber ei i kon yama su yu? Bisa mi si bo sa.

⁵Semper bai kada palabra di Dios a resultá di ta bèrdat, E t'un eskudo pa esnan ku skonde serka djE.

⁶P'esei no agregá nada na loke El a bisa, sino E tin ku hala bo atenshon, laga mira ku bo ta gaña.

⁷Mi Dios, dos kos mi ta pidi di Bo, konsedé mi nan promé mi muri.

⁸Tene falsedat i mentira leu fo'i mi; no laga mi bira pober ni riku, duna mi solamente mi pan di kada dia.

⁹Sino, mi por tin di mas i nenga di konosé Bo, i bisa: ‘Ken ta SEÑOR?’ Òf mi por bira pober i hòrta, i asina deshonrá nòmber di mi Dios.

¹⁰No papia malu di un katibu dilanti di su shon, e shon lo por maldishoná bo i laga bo paga karu p'esei.

¹¹Tin esnan ku ta maldishoná nan tata, i ku no ta bendishoná nan mama,

¹²esnan ku ta puru den nan mes bista, i tòg no ta limpiá di nan sushedat.

¹³Tin ku ta sinti nan mashá i ku ta wak otro hende ku menospresio.

¹⁴Tin hende ku tin djente ku ta kòrta manera spada, skèrpi manera puñá: pa devorá esnan sin defensa, niun hende pober den e pais n' ta seif pa nan.

¹⁵Tin hende manera chupachupa, dos palabra so nan sa. E promé ta: 'nami! i e di dos ta: 'nami! Tin tres, asta kuater kos mas ku nunka no tin basta:

¹⁶reino di morto, muhé infértil, tera ku falta awa i kandela ku nunka n' ta grita: ‘Ta basta’.

¹⁷Rafnan di den vaye lo pik wowo di esun ku ta wak un tata ku despresio, ku ta nenga di obedesé un mama, i makuaku lo kome nan.

¹⁸Tin tres kos ku mi no por yega na komprondé i ku ta surpasá mi inteligensia; kon un águila ta bula den laria, kon un kolebra ta lastra riba piedra, kon un barku ta nabegá riba laman ganchu, asta tin un di kuater kos: ta kiko ta pone un hòmber bai serka un muhé?

²⁰Asina ta maner'i hasi di un adúltera: E ta kome, limpia boka i bisa: ‘Mi n' hasi nada malu.’

²¹Tin tres sorto di hende, asta kuater, ku ta insoportabel i ku ta pone un pais sakudí:

²²un katibu ku ta bira rei, un bobo ku tin kuminda di mas,

²³un muhé despresiá ku ta haña un esposo i un katibu muhé ku ta tuma lugá di e señora k'e ta traha p'e.

²⁴Tin kuater bestia riba mundu ku ta chikitu, tòg nan ta mashá mashá sabí:

²⁵vruminga, nan ta suak, tòg nan ta stòk pa henter wenter;

²⁶un sorto di marmòt di seru, nan no ta fuerte, tòg nan ta traha nan hòl den baranka;

²⁷dalakochi, nan no tin rei, tòg nan ta bula nèchi den grupo;

²⁸i totèki, nan ta laga hende kohe nan ku man, pero ta penetrá drenta sí te den palasionan di rei.

²⁹Tin tres balente, asta kuater ku ta kana ku dignidat:

³⁰leon, e animal mas teribel, ku n' ta hui pa nada ni pa niun hende,

³¹un gai orguyoso, un chubatu, i un rei rondoná pa su ehérsito.[14]

³²Si bo a hasi ko'i loko sinti bo mes importante i traha plan perverso, pensa bo bon!

³³Pasobra meskos ku ora bo bati lechi bo ta haña manteka, ora bo dal nanishi di un hende un moketa, e ta sangra, asina ta bini pleitu ora bo pone otro hende kunsumí.