Read Papiamento Proverbionan 4 Bible Online

Proverbionan 4 - Papiamento bible

Proverbionan 4

¹Yunan, tende ora tata ke koregí boso; paga atenshon pa boso haña komprenshon.

²Pasobra loke mi tin pa siña boso ta bon, no rechasá mi reglanan di bida.

³Tempu mi tabata mucha den kas di mi tata, yòn i sin eksperensia ainda, úniko yu di mi mama,

⁴tata a siña mi bisando: ‘Warda mi palabranan den bo kurason, kumpli ku mi mandamentunan pa bo biba.

⁵Kore tras di sabiduria i bringa pa haña komprenshon, no lubidá mi palabranan ni desviá for di nan.

⁶No bandoná sabiduria i lo e protegé bo; stim'é i lo e warda bo.

⁷Optené sabiduria i atkerí komprenshon, duna nan bo prioridat.

⁸Duna sabiduria su balor, e ora ei lo e hasi bo grandi; ser'é den bo brasa, i lo e hasi bo famoso.

⁹Lo e ta un korona elegante pa bo kabes, i un korona di splendor.’

¹⁰Mi yu, skucha i aseptá loke mi bisa, e ora ei lo bo biba largu.

¹¹Mi ta guia bo den kaminda di sabiduria i dirigí bo hasi bo pasonan règt.

¹²Ora di kana lo bo no topa opstákulo, ora di kore lo bo no trompeká.

¹³Dal tene na loke a siña bo, no laga lòs, warda nan, ta di nan bo bida ta dependé.

¹⁴No sigui paso di mal hende, no sigui mal ehèmpel.

¹⁵Evitá di pasa kaminda nan ta, keda leu for di nan i sigui padilanti.

¹⁶Ta te ora nan kousa mizeria, nan por drumi trankil. Nan ta keda lantá, tanten nan no a hasi ningun hende daño.

¹⁷Pasobra maldat ta nan kuki, violensia ta nan shampaña.

¹⁸Pero bida di un hende hustu ta manera salida di solo: ora pa ora e ta bira mas kla, te ora e yega su punto mas altu.

¹⁹Kaminda di mal hende ta manera skuridat; nan no sa riba kiko nan ta trompeká.

²⁰Mi yu, tende di mi, duna oido na mi palabranan.

²¹No pèrdè nan for di bista, warda nan te den profundo di bo kurason.

²²Na esnan ku haña nan, nan ta duna bida i salú.

²³Kuida bo manera di pensa mas ku tur kos ku bo tin na mundu, pasobra asina bo ta determiná bo bida.

²⁴No bira palabra; no laga mentira sali for di bo boka.

²⁵Wak semper bo dilanti, no pèrdè bo meta for di bista.

²⁶Wak kaminda bo ta kana, ya bo ta kana sigur.

²⁷No desviá kita na man drechi ni na man robes, tene bo leu for di maldat.