Read Papiamento Proverbionan 7 Bible Online

Proverbionan 7 - Papiamento bible

Proverbionan 7

¹Mi yu, obedesé mi palabranan, keda kòrda mi mandamentunan.

²Hasi loke mi ta manda bo i lo bo biba; hasi mi enseñansa bo tesoro di mas presioso.

³Mara nan na bo renchi, graba nan den bo kurason.

⁴Bisa sabiduria: ‘Bo ta manera mi ruman muhé’ i yama ‘komprenshon’ bo famia mas yegá.

⁵Sabiduria i komprenshon ta libra bo di e muhé ku no ta fiel na su esposo, maske kuantu e trastia bo.

⁶Un dia mi tabata para wak dor di e tralinan di mi bentana.

⁷Mi a mira algun hòmber hóben sin eksperensia i mi a ripará ún ku no a usa su sintí.

⁸El a kana den e kaya, bai na e skina kaminda e muhé ta biba, rumbo pa kas di e muhé.

⁹Tabata tardesitu kaba, solo a baha i skuridat a drenta.

¹⁰Ata e muhé ta sali bin top'é, bistí manera un muhé di bida ku un yangá probokativo.

¹¹Un muhé lawai i pa su kuenta ku ta bati kaya di dia i anochi.

¹²Si e no ta riba kaya e ta den parke, i na kada skina e ta para i purba sedusí.

¹³E ta kohe e hóben tene, sunchi e i bis'é sin niun klase di bèrgwensa:

¹⁴‘Mi a primintí sakrifisionan di pas, i awe mi a kumpli ku mi promesanan.[1]

¹⁵P'esei mi a sali bin topa bo, mi a buska bo ansiosamente i mi a haña bo.

¹⁶Mi a drecha mi kama bunita ku un sobrekama di lenen di Egipto.

¹⁷Mi a perfumá mi kama ku holó di mira, áloe i kané.

¹⁸Bini, ban bira burachi di amor, ban gosa te ora di dia habri.

¹⁹Bini no, e hòmber n' t'ei, el a sali di biahe bai leu.

²⁰El a bai ku hopi plaka, ta te dia luna ta yen e ta bini bèk.’

²¹E muhé ta papi'é ku boka dushi te ku e hóben a keda konvensí.

²²Sin pèrdè pa gana el a sigui e muhé, manera un baka ku ta bai plenchi, manera un biná ku ta bula bula drenta un trampa,[2]

²³manera un para e ta bula drenta den un kui, sin sa ku su bida ta na peliger, te ora un flecha bora drenta te den e parti mas profundo di su ser.

²⁴P'esei, mi yunan, tende di mi, i paga tinu na mi palabranan.

²⁵No laga un muhé asina hinka bo den tentashon, no lag'é trèk bo bai kuné.

²⁶Hopi ta esnan ku a bira su víktima, mashá hopi esnan ku el a mata.

²⁷Su kas ta port'i dilanti di reino di morto, ei bo ta kuminsá muri.