Read Papiamento Proverbionan 8 Bible Online

Proverbionan 8 - Papiamento bible

Proverbionan 8

¹Sabiduria, n' ta yama e ta yama? Komprondementu n' ta lanta e ta lanta bos?

²E ta keda para na altu ku bista riba kaminda, na krusada di kaminda e ta keda para.

³E ta alsa bos na porta di siudat, na entrada di stat, riba kaminda grandi.

⁴‘Hendenan, ta boso mi ta yama, mi mensahe ta pa un i tur.

⁵Boso ei, ku no tin eksperensia di bida i boso sin komprondementu, siña kon pa biba.

⁶Skucha, pasobra mi tin kos grandi i importante di bisa; mi ta habri boka pa bisa loke ta bèrdat.

⁷Sí, mi ta anunsiá loke ta korekto komo mi ta odia mentira.

⁸Tur palabra for di mi boka ta hustu, niun no ta trose bèrdat, ni tin falsedat.

⁹Pa esnan ku ta komprondé nan nan ta sinsero, i pa esnan ku a haña konosementu nan ta bèrdat.

¹⁰Mihó aseptá mi siñansa ku aseptá plata, mihó preferá mi konosementu ku preferá e oro di mas puru.

¹¹Sabiduria tin mas balor ku piedra presioso; maske kiko hende por antohá, kompará ku sabiduria e ta ñaña.

¹²Ami, sabiduria, ta amiga di konosementu, sano huisio ku mi ta hopi será ku otro.

¹³Tin rèspèt di SEÑOR ta nifiká odia maldat. P'esei mi ta odia soberbia i orguyo, krímen i mentira.

¹⁴Serka mi ta haña konseho i sano huisio, mi ta duna forsa i komprenshon.

¹⁵Si no ta p'ami reinan no por goberná i gobernantenan no por determiná loke ta hustu.

¹⁶Ku mi yudansa prínsipenan i noblenan ta goberná, esta, tur esnan ku ta goberná hustu.

¹⁷Mi ta stima esnan ku ta stima mi, i esnan ku buska mi lo haña mi.

¹⁸Serka mi ta haña rikesa, honor, propiedat i prosperidat impreshonante.

¹⁹Loke mi ta duna ta mihó ku e oro di mas fini, loke mi ta paga na interes ta mihó ku e plata di mas puru.

²⁰Mi ta kana riba kaminda règt, kaminda ta hasi hustisia

²¹pa duna esnan ku ta stima mi propiedat impreshonante i yena nan kambernan ku tesoro.

²²SEÑOR a krea mi[3] komo e promé di su obranan, mi tabata e promé obra di su kreashon.

²³El a pone mi riba trono for di eternidat, for di kuminsamentu, promé ku mundu a forma.

²⁴Tempu no tabatin laman ainda, ni tabatin bròn ku abundansia di awa ya e tempu ei mi a nase kaba.

²⁵Promé ku serunan a haña un lugá, promé ku tabatin seritu, ya mi a nase kaba;

²⁶promé ku SEÑOR a traha mundu henter, promé ku El a krea un pipita di santu.

²⁷Mi tabat'ei, ora El a duna shelu su lugá fiho, ora El a marka un horizonte rònt di laman;

²⁸ora El a pone nubia na shelu i a laga e brònnan di laman kore,

²⁹ora El a stipulá frontera pa laman, pa awa no violá su òrdu, ora el a marka fundeshi pa mundu.

³⁰Mi tabata pará banda di e Bas di fishi,[4] tur dia di nobo mi tabata enkantá, tur ora kontentu den su presensia,

³¹kontentu ku e mundu kreá, mi tabata enkantá ku rasa humano.

³²P'esei, mi yunan, tende di mi, sigui mi i boso lo ta felis

³³Skucha mi bon konseho, tene kuenta kuné, pa boso bira sabí.

³⁴Bendishoná ta e hòmber ku ta tende di mi, ku tur dia ta vigilá mi portanan i ta keda warda na porta.

³⁵Pasobra haña mi ke men: haña bida i gana simpatia di Dios.

³⁶Pero esun ku no haña mi ta hasi su mes daño, tur esnan ku ta odia mi ta enamorá di morto.’