Read Papiamento Proverbionan 9 Bible Online

Proverbionan 9 - Papiamento bible

Proverbionan 9

¹Sabiduria a traha su kas, un kas ku shete pilá.

²El a mata bestia pa e bankete, prepará biña i tambe drecha mesa.

³Sabiduria a manda su sirbidónan sali bai i e ta grita for di e puntonan mas altu di e siudat:

⁴‘Esnan ku mester siña hopi ainda, esnan ku ainda no tin eksperensia di kosnan di bida, bin, bin akí!

⁵Bini, bin kome mi pan, bin bebe e biña ku mi a meskla.

⁶Evitá di ta den kompania di hende bobo, e ora ei lo bo biba; skohe kaminda di komprondementu!’

⁷Es ku koregí un chèrchadó ta buska despresio, es ku koregí un hende ku no ta tene kuenta ku Dios òf mandamentu, ta buska problema pa su kurpa.

⁸No koregí un chèrchadó, pasobra lo e kuminsá odia bo; koregí un sabí, e sí lo apresiá bo.

⁹Un sabí ta bira mas sabí di e loke bo bisa, un hende hustu ta siña di e loke bo instruí e.

¹⁰Si ke bira sabí, mester tin rèspèt di SEÑOR, si ke haña komprondementu, mester konosé e úniko Dios.

¹¹Pa mi motibu lo bo biba largu, lo agregá aña na bo bida.

¹²Si bo ta sabí, bo tin probecho, si bo ta un chèrchadó, karga konsekuensia.

¹³Shon Bobedat ta grosero, un muhé lawai i ignorante ku no sa nada.

¹⁴Shon Bobedat ta sinta den un stul na porta di su kas, aya riba muraya di siudat.

¹⁵I tur hende di bon boluntat ku pasa ei banda, e ta grita bisa pa desviá nan:

¹⁶‘Esnan ku mester siña hopi ainda, esnan ku ainda no tin eksperensia di kosnan di bida, bini, bini akí!

¹⁷Awa hòrtá ta smak bon, pan komé na skondí ta baha bon.’

¹⁸Pero e hendenan akí no sa ku esnan ku a aseptá invitashon di Shon Bobedat, awor akí ta wéspet den profundidat di reino di morto.