Read Papiamento Predikador 12 Bible Online

Predikador 12 - Papiamento bible

Predikador 12

¹I tene kuenta ku e Dios ku a krea bo, awor ku bo ta yòn. Un dia dianan i añanan malu ta bini ku lo bo bisa: ‘Mi no por gosa mas di bida.’

²Tene kuenta ku Dios promé ku solo bira skur, luna i streanan bira skars di lus i nubianan trese áwaseru.

³Ora esunnan ku ta tene warda na bo kas para tembla i hendenan balente kana lomba doblá, ora esunnan ku ta mula hariña stòp pasobra nan ta poko, i esunnan ku ta wak dor di bentana mira skur;

⁴ora e portanan ku ta habri pa kaya ta será i zonido di mulina baha, kaba na nada; ora hende spièrta ku zonido di paranan, anto tur stèm muri bai;

⁵ora hende tin miedu di altura i di peliger riba kaya; ora palu di almendra floria i dalakochi lastra bai i deseo no lanta mas. E ora ei hende ta bai sosegá pa semper i den kaya nan ta yora morto.

⁶Tene kuenta ku Dios ku a krea bo, awor ku ainda e kordon di plata no a kibra i e wea di oro no a kai kibra na pida pida; awor ku e zjar na boka di pos no a kibra ainda ni e katròl di e pos no a kibra.

⁷Bo kurpa ta kaba bira stòf, bai bèk den e tera for di kual el a sali; i bo rosea di bida ta bai bèk serka Dios, ku a duna bo e.

⁸‘Sin sentido! Sin sentido!’ Predikador ta bisa. ‘Tur kos ta sin sentido!’

⁹Predikador tabata un hende sabí, komo el a skucha proverbio, profundisá den nan i a presentá nan na un manera organisá, el a siña pueblo hopi kos.

¹⁰Predikador a buska palabranan ku ta zona agradabel pa esnan ku ta skucha i loke el a skibi tabata honesto i bèrdat.

¹¹Palabra di hende sabí ta manera bion, i nan dichonan kolekshoná ta manera klabu, bon ankrá; ta ún wardadó di karné a duna nos nan.

¹²Mi yu, tene kuidou ku esnan ku ke duna bo mas riba loke bo a siña kaba. Por sigui skibi buki ketu bai i hopi estudio ta kansamentu di kurpa.

¹³Bo a tende tur kos i esaki ta e konklushon: tene rèspèt di Dios i kumpli ku su mandamentunan, ta esei ta importante.

¹⁴Pasobra Dios lo husga tur kos ku bo hasi, asta loke hende no por mira, sea ku ta algu bon òf algu malu.