Read Papiamento Predikador 3 Bible Online

Predikador 3 - Papiamento bible

Predikador 3

¹Tur kos tin su ora i su tempu, tur kos aki na mundu:

²ora pa nase i ora pa muri, ora pa planta i ora pa koba saka fo'i tera,

³ora pa mata hende i ora pa kura, ora pa basha abou i ora pa konstruí,

⁴ora pa yora i ora pa hari, ora pa tene luto i ora pa balia,

⁵ora pa plama piedra i ora pa pone nan huntu, ora pa brasa otro i ora pa kita fo'i otro,

⁶ora pa buska i ora pa resigná, ora pa warda kos i ora pa tira kos afó,

⁷ora pa sker kibra i ora pa drecha, ora pa keda ketu i ora pa papia,

⁸ora pa stima i ora pa odia, ora pa guera i ora pa pas.

⁹Kiko hende ta gana ku matament'i kurpa?

¹⁰Mi a mira e tarea pisá ku Dios a duna hende pa mata kurpa kuné.

¹¹Ta un smak pa mira kon tur tur kos ta tuma lugá na su debido tempu. Dios a duna hende tambe un gana fuerte di sinta pensa riba tempu i riba loke ta pasa den e tempu ei. Pero tòg asina mes hende no por saka afó kiko Dios a hasi for di kuminsamentu te na final.

¹²Mi a ripará ku pa hende no tin nada mihó ku biba kontentu i hasi bon tanten bo ta na bida,

¹³pasobra ku nos ta kome i bebe i ta kontemplá e benefisionan di nos trabou, ta pasobra Dios a pèrmití nos.

¹⁴Mi a mira ku tur kos ku Dios hasi ta keda meskos; no tin nada di añadí ni nada di kita afó; Dios a traha nan asina, pasobra Dios ke pa hende tene rèspèt di djE.

¹⁵Loke tin awor akí, tabat'ei promé ayá kaba, i loke bin aworó tambe tabat'ei kaba. Dios ta laga e mesun kos sosodé kada be di nobo atrobe.

¹⁶Mi por a ripará tambe ku riba e mundu akí tin korupshon i maldat, kaminda mester tin hustisia i rektitut.

¹⁷P'esei mi ta bisa ku Dios lo husga e hòmber hustu i e mal hende, pasobra tur kos ku pasa i tur loke hende hasi tin su tempu.

¹⁸Mi a pensa tambe, tokante kondukta humano, ku Dios ta pone hende na prueba pa nan realisá ku nan tambe ta manera animal.

¹⁹Destino di hende ta manera di animalnan; e mesun destino ta warda nan: meskos ku esun ta muri, e otro tambe ta muri. Tur dos ta hala rosea; hende no tin bentaha riba bestia. Tur kos ta ilushon.

²⁰Ta dera nan tur dos den e tera for di kua a traha nan i finalmente tur dos ta kaba bira tera atrobe.

²¹Ken por proba ku rosea di hende ta subi bai laria i rosea di bestia ta baha bai abou?

²²Asina mi a mira ku no tin nada mihó pa hende ku gosa di su trabou, pasobra ta esei ta su destino. Pasobra ken por bis'é kiko ta sosodé ora e no t'ei mas?