Read Papiamento Predikador 4 Bible Online

Predikador 4 - Papiamento bible

Predikador 4

¹Despues mi a dirigí mi atenshon riba e aktonan di opreshon ku hende ta kometé den e mundu akí. I mi a mira hende oprimí yora, pero no tin hende pa konsolá nan; nan opresornan ta trata nan ku violensia, pero no tin hende pa konsolá nan.

²P'esei mi a haña ku esnan ku a muri, ta mas felis ku esnan ku ta na bida ainda.

³Pero mas felis ta esun ku nunka no a nase; nunka e no tabatin nada di aber ku tur e mizeria di e bida akí.

⁴Mi a ripará tambe ku hende ta mata kurpa i ke logra ku éksito únikamente, pasobra e ta yalurs riba otro hende. Esei tambe ta ilushon, hungamentu di kore kue ku bientu.

⁵Ta bèrdat: hende bobo ta sinta man krusá i destruí su mes.

⁶Pero tòg: preferibel poko trankilidat, ku hopi matament'i kurpa i biba anshá.

⁷Tambe mi a mira un otro ilushon: un hende ku tabata kompletamente so, e no tabatin yu, asta e no tabatin famia. Tòg e no a stòp di mata kurpa i preokupá, nunka e no tabata satisfecho ku su rikesa. E tabata puntra su mes: ‘Ma ta pa ken mi ta mata kurpa i keda sin pèrmití mi mes plaser?’ Esei tambe ta ilushon i kos di desaprobá.

⁹Preferibel dos hende huntu, ku un hende so, pasobra huntu nan ta gosa mas di nan trabou.

¹⁰I si un di nan dos kai, e otro ta yud'é lanta. Pero malu pa esun ku kai ora e ta so, pasobra no tin niun hende pa yud'é lanta.

¹¹Si boso dos drumi huntu, boso ta duna otro kalor; un hende so ta sinti friu.

¹²Por dominá ún hende, pero dos hende lo por duna resistensia. Ademas un kabuya iflèktu tres bia no ta kibra fásilmente.

¹³Preferibel un mucha hòmber pober, pero inteligente, ku un rei bieu i bobo ku no ta tuma konseho di otro hende.

¹⁴Mi ta kòrda riba un hende ku despues di a pasa un tempu den prizòn a bira rei di e pais kaminda el a nase pober.

¹⁵Mi a ripará ku henter mundu tabata sigui e hóben, e susesor di rei.

¹⁶No tabatin ún hende ku no ker a bai oudiensia serka e rei hóben. Pero esnan ku a bini despues no tabata gusta e susesor mashá. Esaki tambe ta ilushon i hungamentu di kore kue ku bientu.