Read Papiamento Predikador 5 Bible Online

Predikador 5 - Papiamento bible

Predikador 5

¹ Sa bon kiko bo ta bai hasi, ora bo ta bai tèmpel: no bai ofresé sakrifisio manera e hende lokonan, ku no sa ku nan ta hasi malu, pero bai dispuesto na obedesé Dios.

²No pura hasi promesa na Dios, ni ku boka ni ku pensamentu, pasobra Dios ta den shelu i abo ta riba mundu bo ta. P'esei papia ménos posibel.

³Pasobra si bo bisa di mas, bo ta papia ko'i loko, manera hende ta haña pesadia ora nan kansa kurpa di mas.

⁴Ora bo hasi un promesa na Dios, no tarda pa kumpli, pasobra Dios no ta gusta hende dònferstan. Kumpli ku loke bo primintí,

⁵pasobra keda sin primintí ta bal mas ku primintí i keda sin kumpli.

⁶No papia sin pensa. Pasobra despues lo bo haña bo ta bisa e representante di Dios ku tabata un kibukashon. Pakiko lo bo papia asina tantu pone Dios rabia destruí bo trabou?

⁷Pasobra soña i papia hopi ta mes sin sentido. Preferibel tene rèspèt di Dios.

⁸No keda asombrá ku tin hende ku ta oprimí hende pober i kita tur nan derechonan. Pasobra funshonarionan di estado ta protegé otro te den e rangonan di mas altu.

⁹Si rei mes tene lei den su man hende pober tin chèns ainda.[1]

¹⁰Hende ku plaka nunka no tin sufisiente plaka; hende ku stima rikesa nunka no ta satisfecho ku su entrada. Esaki tambe ta ilushon.

¹¹Mas grandi e propiedat, mas tantu hende ke probechá di dje. Kiko e doño tin antó na e propiedat? Wak so e por wak e.

¹²Ku un obrero a kome tiki òf kome hopi e ta drumi dushi, pero e hende riku ku nunka no tin basta no por drumi trankil.

¹³Mi a mira un kos teribel: un hende a spar tur su sèn, ma esei a bira su desgrasia.

¹⁴Kontratempu a pon'é pèrdè tur kos; e no por a laga nada atras pa su yu hòmber.

¹⁵Mes sunú ku el a nase a der'é. E no por a bai ku nada ku el a mata kurpa p'e.

¹⁶E kos akí tambe ta mashá lamentabel: manera un hende a nase asina e ta muri, i kiko el a gana ku tur su matamentu di kurpa pa bientu?

¹⁷Su bida aki na mundu tabata mizerabel, e tabata kome den sukú i tabata yen di frustrashon, tormento i rabia.

¹⁸Mi a deskubrí ku e mihó kos i kos mas agradabel ta: kome i bebe i gosa di e fruta di tantu mata kurpa riba e mundu akí durante e tempu kòrtiku ku Dios ta duna nos, pasobra esei ta loke ta toka nos.

¹⁹Enberdat, si Dios duna bo rikesa i propiedat i duna bo bida i salú pa gosa di nan, si bo haña bo parti i ta felis ku tur bo trabou, ta un regalo di Dios esei ta.

²⁰Pasobra Dios ta duna e hende ei bida i salú pa gosa, e hende no ta preokupá mashá pa kiko ta pasa òf laga.