Read Papiamento E kanto di tur kanto 1 Bible Online

E kanto di tur kanto 1 - Papiamento bible

E kanto di tur kanto 1

¹E kanto di mas bunita den tur kanto, di Salomon.[1],

²Ai, mare e por sunchi mi, mare su boka por pega na di mi... Bo karisianan ta mas sut ku biña mes!

³Fragansia di bo perfume ta ekskisito, zonido di bo nòmber ta zonza mi. P'esei tur mucha muhé gusta bo.

⁴Ranka mi bai kuné! Ban, hasi lihé! Bo ta mi rei; hiba mi den bo kamber pa nos fiesta huntu i pa mi gaba bo karisianan mas ku biña mes. N' ta por nada tur mucha muhé gusta bo.

⁵Maske mi koló a bira brùin, mi ta bunita sí. Mi parse tènt di lona skur,[2] pero tambe tapeit real.[3] Damitanan di Herusalèm,

⁶no wak mi ku menospresio pasobra mi koló ta skur! Ta solo a kimami; mi ruman hòmbernan a rabia ku mi, pone mi kuida nan hòfinan di wendrùif, anto mi propio hòfi sí m'a deskuidá.

⁷Bisa mi antó, amor di mi bida, na unda bo ta laga bo karnénan kome yerba, na unda nan ta sosegá mèrdia. E ora ei mi n' tin mester di kana baga[4] serka e trupanan di karné di bo kompañeronan.

⁸Ta sa bo n' sa esei antó, mucha bunita? Sigui pista dje karnénan numa i laga bo kabritunan kome yerba banda di e chosanan di e wardadónan.

⁹Dushi di mi, mi ta kompará bo ku kabai di parada, mará dilanti di un kitrin real.[5]

¹⁰Bo ta lusi presioso, bo sa, ku e kadenanan ei na bo band'i kara, e koyarnan ei na bo garganta.

¹¹Pero...nos ta bai traha kadena di oro pa bo, ku kònòpi di plata!

¹²Tanten ku mi rei ta riba su sofá mi bálsamo di nardo ta manda un dushi holó.

¹³Mi amor ta pa mi un sakitu di mira oloroso, sosegando meimei di mi pechunan.

¹⁴Mi amor ta pa mi un tròshi di flor di hèna fo'i den hòfi di wendrùif di En-Gèdi.[6]

¹⁵Esta bunita bo ta, dushi di mi, esta bunita! Bo wowonan parse palomba.

¹⁶Abo tambe, mi amor, bo tambe ta nèchi, bo ta tipo! Yerba bèrdè ta nos kama;

¹⁷takinan di palu di seder ta forma biganan di nos kas, palunan di siprès su skòtnan.