Read Papiamento E kanto di tur kanto 2 Bible Online

E kanto di tur kanto 2 - Papiamento bible

E kanto di tur kanto 2

¹Anto ámi, t'un anglo mi ta den sabana di Sharon, un leli di vaye.

²Sí, un leli meimei di bringamosa, t'asina e dushi di mi ta kompará ku e otro mucha muhénan.

³Un palu di apel entre palunan di mondi t'asina mi amor ta kompará ku e otro mucha hòmbernan. Mi tin gana di sinta den su sombra! Esta dushi su fruta ta smak!

⁴El a hiba mi su bodega, kaminda su bandera ta bula, bandera ku ‘Amor’ riba dje.

⁵Hasi lihé, bola di rasenchi mi ke, pa bolbe duna mi kurpa energia i apel pa sasia mi set, pasobra amor ta mata mi.

⁶Su brasa robes ta bou 'i mi kabes, esun drechi ta primi mi den su kurpa.

⁷O, damitanan di Herusalèm, mi ke supliká boso ku insistensia na nòmber di gasela- i binánan[7] den kunuku; no lanta stimashon, no probok'é, promé ku e mes ke tum'aden.[8],

⁸Skucha! Ta mi amor! Wak! At'é ta bini! E ta bula pasa den serunan, belenkiá den seritunan.

⁹Mi amor parse gasela o yu di biná! Wak, at'é pará tra'i muraya di nos kas, e ta wak dor di bentana, lur den yalusí.

¹⁰Awor e ta papia ku mi: ‘Ban mira, dushi di mi, mi prenda, ban ku mi!

¹¹Djis wak afó, wenter a pasa, awa a stòp di kai, el a bai un biahe di zjil!

¹²Kunuku ta yen di flor atrobe, ta temporada ku tur kos ta kanta, rukukú di tòrteldùif ta zona den kunuku.

¹³Ya e promé figonan ta hecha na palu, mata di wendrùif ta tapá ku flor, esta dushi holó! Ban mira, dushi di mi, mi prenda, ban ku mi!

¹⁴Mi palomita, skondí den kibrá di baranka, den bo hòl na altu den lomba di seru, laga mi mira bo figura, esta un enkanto e ta; laga mi tende bo stèm, esta dushi e ta!’

¹⁵Gara e zoronan[9] pa nos, e bestianan chikitu ei, ku ta destruí[10] nos hòfinan di wendrùif, nèt awor ku nan ta na flor!

¹⁶Mi amor ta di mi i ami ta di dje, di esun ku ta gosa barika yen meimei dje lelinan.

¹⁷Ora brisa di anochi trese freskura i sombranan rèk, bira largu, bini bèk, mi amor. Na kareda manera gasela, manera yu 'i biná riba serunan di Beter.[11]