Read Papiamento E kanto di tur kanto 4 Bible Online

E kanto di tur kanto 4 - Papiamento bible

E kanto di tur kanto 4

¹Esta bunita bo ta, dushi di mi, esta bunita! Bo wowonan parse palomba skondí tra'i bo belo. Bo kabei ta pone mi kòrda trupa di kabritu dartu, ku manera ola ta lora baha fo'i serunan di Guilead;

²bo djentenan ta manera un trupa di karné, pará kla pa feita, ora nan a sali fo'i bak'i awa, kada un ku su pia di ohochi, niun no ta so!

³Bo lepnan ta sinta kòrá bibu, i bo boka, simplemente enkantador! Tras di bo belo bo dos band'i karanan ta rondó i kòrá manera dos mitar granatapel.

⁴Bo pal'i garganta parse e toren di David, konstruí komo armeria:[14] tin mil eskudo n'e, eskudonan rondó di héroenan.[15]

⁵Bo pechunan ta manera dos biná yòn, manera ohoch'i gasela, ku ta kome yerba meimei di leli.

⁶Ora brisa di anochi trese freskura i sombranan rèk, bira largu, mi ta bini serka bo; na e seru yen di mira, na e seritu yen di sensia.

⁷Tur kos na bo kurpa ta bunita, mi amor — bo no tin defekto.

⁸Bini serka mi for di Libanon, mi prometida! Bini serka mi for di Libanon, baha for di kabes di seru Amana, for di kabes di Senir i Hermon, kaminda leon tin su kueba i leopardo su bibá.

⁹Bo a pone mi pèrdè kabes, mi ruman dushi, mi prometida! Solamente ún mirada di bo wowo, ún moveshon di bo garganta[16] i m'a pèrdè kabes!

¹⁰Esta agradabel bo karisianan ta, mi ruman dushi, mi prometida! Bo karisianan ta mas sut ku biña, bo perfume ta mas fragante ku kualke bálsamo ku dushi holó.

¹¹Bo lepnan tin sabor di stropi di abeha, mi prometida, bou 'i bo lenga tin lechi, dushi ni miel. I e paña na bo kurpa tin fragansia dje boske riba seru di Libanon.

¹²Bo ta un hardin será, mi ruman dushi i prometida, bo ta un hardin[17] será, un fuente seyá.

¹³Bo ta un paraiso ku ta saka palu di granatapel, palu kargá ku fruta ekskisito, un paraiso ku flor di hèna i mata di nardo,

¹⁴no nardo so, sino safran, kaña aromátiko i kané tambe i tur sorto di mata di sensia; ku mira, áloe i mata di bálsamo ekskisito.

¹⁵Bo ta un fòntein den hardin, un fuente di awa bibu, ku ta basha fo'i seru di Libanon.

¹⁶Lanta, bientu di nort, bini akí, bientu di zùit, supla den mi hardin, pa e por plama su aromanan. Laga mi amor drenta den su hardin i kome su frutanan ekskisito!