Read Papiamento E kanto di tur kanto 5 Bible Online

E kanto di tur kanto 5 - Papiamento bible

E kanto di tur kanto 5

¹Mi ta biniendo mi hardin, serka bo, mi ruman dushi, mi prometida. Ei mi ta piki mi mira i yerb'i hole, mi ta kome mi miel di abeha ku panal ku tur, ei mi ta bebe mi biña i lechi. Amigunan, kome, amantenan, bebe, bebe bira fuma!

²Mi tabata na soño, pero mi kurason sí tabata lantá. Ata mi ta tende un zonido, ta mi amor ta bati porta! E ta grita: ‘Habri, mi ruman, dushi di mi, mi palomita, mi prenda presioso! Mi kabes ta papa muhá di serena, su gotanan ta kologá na mi kabei.’

³‘M'a kita paña kaba,’ m'a rospondé, ‘mi mester bolbe bistié? M'a laba pia kaba, mi mester bolbe susha nan?’

⁴Mi amor a hinka man den buraku dje porta, mesora mi kurason a bira loko den mi kurpa.

⁵M'a bula lanta pa habri porta p'e. Ora m'a kohe kònòpi dje rèndu tene, mi mannan tabata yen di mira i su leim tabata choria fo'i mi dedenan.

⁶M'a habri porta pa mi amor, pero e no tabat'ei, el a somentá! Mi kurason a bai mi plant'i pia, ora el a disparsé.[18] M'a busk'é sin por a hañ'é, m'a yam'é, pero e no a rospondé.

⁷E guardianan riba ronda di vigilansia den stat a haña mi i a kohe mi ku sla, laga mi tur na sanger; nan a ranka mi bata fo'i mi kurpa, e guardianan ei riba muraya!

⁸O, damitanan di Herusalèm, mi ke supliká boso ku insistensia: si boso haña mi amor, boso sa kiko boso mester bis'é? Bis'é ku mi ta muriendo di amor!

⁹Mucha bunita, akaso bo amor t'asina diferente, mas spesial ku otro hòmber, ku bo ta supliká nos esei ku tantu insistensia?

¹⁰Mi amor ta radiante, su koló ta di bròns, por rekonos'é den dies mil hòmber.

¹¹Su kabes ta di oro, e oro di mas puru ku ta eksistí. Su krùlnan parse tròsh'i dadel, pretu manera stabachi.

¹²Su wowonan parse palomba na roi di awa, bañá den lechi, sintá na kantu.

¹³Su kachete ta kama di yerb'i bálsamo, ku ta plama dushi aroma;[19] su lepnan ta leli, ku ta choria zeta di mira.

¹⁴Su brasanan ta bara rondó di oro, tur na piedra di turkesa; su barika ta un tronkon di ivor, kubrí ku safiro.

¹⁵Su pianan ta kolumnanan di alabaster, ankrá riba basenan di oro puru; su aspekto ta manera seru di Libanon, eksklusivo manera palu di seder.

¹⁶Su boka ta yen di dulsura, tur kos na su kurpa ta enkantador! Sí, asina mi amor, mi amigu ta. Awor boso sa, damitanan di Herusalèm!