Read Papiamento E kanto di tur kanto 7 Bible Online

E kanto di tur kanto 7 - Papiamento bible

E kanto di tur kanto 7

¹Esta elegante bo pianan chikí ta lusi den bo sandalia, prinsesita! Kurva di bo hepnan parse hoya, obra di un artista!

²Bo lombrishi ta bokal rondó. No laga biña kaba nunka den dje! Bo barika ta lombra manera un man di trigo, rondoná di leli.

³Bo pechunan ta manera dos biná yòn, manera ohoch'i gasela!

⁴Bo pal'i garganta parse toren di ivor, bo wowonan ta pone mi kòrda e veivernan di Hèshbon, band'i porta di Bat-Rabim. Bo nanishi ta altu manera toren di Libanon, ku bista riba Damasko.

⁵Bo kabes ta koroná bo kurpa manera seru di Karmel, bo kabeinan ta kabuya koló püs, den bo krùlnan tin un rei changá!

⁶Amor, bo ta bunita, un enkanto, e kos di mas presioso ku hende por deseá.

⁷Bo figura ta delegá manera un palma, ku pechu manera tròsh'i drùif.

⁸Un desishon m'a tuma: Mi ke subi e palma i gara su tròsh'i dadel! Podisé bo pechunan ta manera tròsh'i drùif i fragansia di bo aliento ta manera di apel fresku,

⁹bo boka mes sut ku e biña di mas delisioso...

¹⁰...biña ku ta kore basha mesora den garganta di mi amor i ta pone ku asta den soño e ta sigui murmurá.

¹¹Ta di mi amor mi ta i t'ami e ta anhelá.

¹²Ban, mi amor, ban pafó, ban pasa anochi meimei di flor di hèna.[26]

¹³Anto mainta trempan nos lo drenta hòfi di wendrùif, pa mira si e matanan ya a rama, si tin kònòpi ku a habri kaba i si palunan di granatapel n' ta floria ainda. Ei lo mi entregá bo mi amor!

¹⁴Fruta di mandrágora ta plama su aroma, fruta di mas delisioso ta na nos alkanse, tantu di e aña akí komo di aña pasá: tur m'a warda pa bo, mi amor.