Read Papiamento Isaías 11 Bible Online

Isaías 11 - Papiamento bible

Isaías 11

¹Tronkon di Ishai lo kuminsá spreit, un stèk nobo lo sali[22] for di su rais.

²Spiritu di SEÑOR ta sosegá riba dje, e spiritu ku ta duna sabiduria i inteligensia, e spiritu ku ta manifestá su mes den desishonnan sabio i den forsa, e spiritu ku ta duna konosementu di SEÑOR i ku ta siña kon respet'É.

³Temor pa SEÑOR ta e fragansia ku ta kompañ'é. L'e no husga loke wowo so mira, ni kondená loke orea so tende.

⁴L'e duna hende humilde su derecho i dikta sentensia hustu pa pobernan di e pais. Su palabranan ta malatí pa suta tera, su rosea ta mata malbadonan.

⁵Manera faha semper mará na kurpa, asina hustisia i fieldat ta fah'é.

⁶Lobo lo biba serka lamchi, panter lo drumi band'i yu di kabritu, bisé i yu di leon lo gòrda huntu,[23] mucha chikitu lo por kuida nan.

⁷Baka i oso lo kome yerba huntu, nan krio ta drumi band'i otro. Leon lo kome foya di pal'i maishi manera baka.

⁸Un yu na lechi lo por hunga band'i hòl di kolebra, un mucha chikí por hinka su man den nèshi di kaskabel.

⁹Riba henter e seru santu di SEÑOR hende lo no hasi malu ni kousa destrukshon, pasobra manera awa ta kubri fondo di laman, asina konosementu di SEÑOR ta yena mundu.

¹⁰Ora e tempu ei yega, e gran desendiente di Ishai lo ta plantá tur grandi di su kurpa manera master riba un seru pa tur nashon mir'é; pueblonan lo bin konsult'é i e lugá kaminda e ta bai biba lo ta un maravia.

¹¹Ora e tempu ei yega, Señor lo bolbe hisa su man, lo E liberá restu di su pueblo, sobrá dje israelitanan na Asiria, Egipto abou, Egipto ariba, Etiopia, Elam, Shinar,[24] Hamat na Siria i e islanan den Mediteráneo.

¹²L'E lanta un master pa pueblonan mira ku E ta bai reuní desteradonan di Israel, i trese e hendenan plamá di Huda huntu for dje kuater skinanan di mundu.

¹³E ora ei kudishi di Efraim lo disparsé i Huda su renkor lo kaba. Efraim lo no ta yalurs mas riba Huda i Huda su enemistat lo kibra.

¹⁴Huntu nan lo baha den direkshon wèst i subi lomba di e filisteonan. Huntu nan lo sakia tribunan di desierto i poderá di Edom i Moab. Amoritanan lo someté nan mes na nan.

¹⁵SEÑOR lo seka Golfo di Egipto i menasá Eufrat ku man na laria; su rosea kayente ta parti e riu den shete brasa di moda ku por krus'é sin muha pia.

¹⁶Asina un kaminda grandi lo habri pa e restu di pueblo di Dios ku a sobrebibí, manera kaminda a habri pa israelitanan, dia nan a sali for di Egipto.