Read Papiamento Isaías 14 Bible Online

Isaías 14 - Papiamento bible

Isaías 14

¹Sí, SEÑOR lo tene mizerikòrdia ku e desendientenan di Yakob, un bia mas lo E skohe Israel i instalá e israelitanan den nan mes tera; strañeronan lo buska pa djòin nan i lo logra.

²Otro pueblonan lo buska e israelitanan i hiba nan nan mes lugá bèk. Aya riba teritorio di SEÑOR, israelitanan lo disponé di nan komo nan katibu. Awor esnan ku ántes a kohe nan prezu, lo bira nan prizonero i nan lo manda riba esnan ku ántes tabata oprimí nan.

³Israel, SEÑOR lo pone fin na boso bida duru komo katibu. Boso lo por kohe rosea despues di boso sufrimentu i tur tribulashon.

⁴Ora e tempu ei yega, boso lo chèrchè e rei di Babilonia ku e kantika akí: ‘Mira kon e opresor a kaba, kon su teror[25] a yega na su fin!

⁵SEÑOR a kibra palu den man dje malbado, sèpter den man dje tirano,

⁶ku e tabata kastigá pueblonan kuné ku furia siegu, gòlpi riba gòlpi. Manera razu e tabata trapa nan, persiguí nan sin piedat.

⁷Pero awor tin trankilidat i seguridat tur kaminda, hende ta dal gritu di alegria.

⁸Asta siprèsnan ta kontentu ku bo suerte i sedernan di Libanon ta grita: “Despues di bo kaida ningun hende no ta subi bin kap nos mas!”

⁹Reino di morto t'aríbabou ansioso pa risibí bo. Tur spiritu di morto, tur esnan ku un ten tabata goberná na mundu, mester lanta pa bo, tur, un ten rei di nashonnan, mester lanta fo'i nan trono.

¹⁰Nan tur riba un boka ta bisa bo: “Abo tambe a pèrdè forsa, bo a bira meskos ku nos.

¹¹Bo grandesa a baha den graf bou di tononan suave di arpa. Bichi ta bo kama i bichi ta bo deken.”

¹²Mira kon bo a kai fo'i shelu, strea briante di mardugá! Bo tabata dominá nashonnan, awor bo ta tumbá abou na suela.

¹³Bo a yega di pensa den bo mes: “Mi ta subi bai shelu i lanta mi trono altu riba e streanan di mas leu. Te den nort aya lo mi kai sinta, riba e seru kaminda diosnan sa reuní.

¹⁴Lo mi subi mas altu ku kabes di nubianan, e ora ei porfin lo mi ta Dios Altísimo su pareu.”

¹⁵Sinembargo ata bo ayabou den reino di morto, den profundidat di abismo.

¹⁶Esnan ku mira bo ei ta wak bo i no por kere nan bista. Nan ta komentá: “T'esei ta e hòmber ku a pone mundu tembla i reinonan sakudí te den nan fundeshi,

¹⁷ku a kambia mundu den un desierto, bari siudatnan i no a pèrmití nan prezunan bolbe kas?”

¹⁸Reinan di otro nashonnan tur ta drumí ta prònk, kada un den su mes graf.

¹⁹Pero abo, a keda tirá leu for di bo graf, manera taki inútil, manera kadaver trapá; bo a keda tapá bou di sòldánan morto ku a muri den bataya i ku nan a benta den un graf masal di piedra.

²⁰Abo, bo lugá di sosiegu no ta serka reinan, pasobra bo a ruiná bo mes pais i bo a eksterminá bo mes pueblo. Nòmber di desendientenan di malechornan asina nunka mas no ta menshoná.

²¹Yunan di e rei ei mester muri; nan mester paga pa e krímennan di nan antepasadonan. No duna nan chèns pa bolbe konkistá mundu i yen'é ku siudatnan! Prepará tur kos pa matansa!’

²²SEÑOR soberano ta anunsiá: ‘Mi ta bai aktua kontra su susesornan, paga nòmber di Babilonia kompletamente i kaba ku tur ku sobrebibí, ku nan yunan i ñetunan.

²³Mi ta bai hasié un dam yen di lodo ku palabrua pa doño. Mi ta barié ku basora di destrukshon. Ta SEÑOR soberano a papia!’

²⁴SEÑOR soberano a hura: ‘Loke Mi a proponé lo sosodé, loke Mi a disidí lo keda kumplí, no tin awa pa laba!

²⁵Mi ta bai kibra poder di Asiria den mi pais. Mi ta plèch'é riba mi serunan; su yugo lo no primi mi pueblo mas, su peso lo kai fo'i nan lomba.’

²⁶Esaki ta e desishon di Dios ku ta konta pa henter mundu, su menasa kontra tur pueblo.

²⁷I ora SEÑOR soberano tuma un desishon, ken por kibr'é? I ora E hisa man, ken por bah'é?

²⁸Den e aña ku rei Ahas a muri, Dios a anunsiá e profeta ku l'E bai baha pisá riba filisteonan:

²⁹‘Filisteonan tur, sin eksepshon, no kanta viktoria promé ku ora, pasobra e garoti ku tabata suta boso, a kibra. Rasa di kolebra ta engendrá un víbora, for di su webu ta sali un dragon buladó.

³⁰Esnan mas pober den e pobernan lo tin kuminda, esnan sin rekurso lo drumi trankil. Pero Ami ta laga boso muri di hamber i esnan ku sobra e dragon[26] ta devorá.

³¹Guardianan na porta, yora malai! Habitantenan di siudatnan, grita tur ku tin! Filisteonan tur, sin eksepshon, tembla di miedu, pasobra for di nort un nubia ta aserká. Den filanan di ehérsito enemigu niun hòmber no ta kai atras.

³²Boso a manda un delegashon Huda. Kiko e ta bisa nan? Ata e kontesta akí: “SEÑOR a funda seru di Sion. Aki pobernan di su pueblo por haña un lugá sigur pa skonde.” ’