Read Papiamento Isaías 15 Bible Online

Isaías 15 - Papiamento bible

Isaías 15

¹Dios ta bai baha pisá riba Moab: E anochi ku a destruí e siudat Ar, Moab a peresé; e anochi ku a destruí Kir, Moab a peresé.

²Habitantenan di Dibon ta subi bai nan tèmpel. Nan ta subi seritunan di sakrifisio pa yora. Moab ta basha gritu di yoramentu pa Nebo i Medba; tur hende ta pelá chinu, tur barba ta feitá.

³Riba kaya tur hende ta bistí na rou; riba dak- i plasanan nan ta grita malai i awa ta basha fo'i nan wowo.

⁴Na Hèshbon i Elalé hende ta grita pidi ousilio, por tende nan gritu te den Yahas. P'esei asta sòldánan di Moab tambe ta grita, nan kurason a kai.

⁵Mi kurason ta sklama pa Moab. Hendenan ta hui bai te Soar i te Eglat-Shelishia. Na yoramentu nan ta subi kaminda pa Luhit. Riba kaminda pa Horonaim por tende e kehonan pa motibu di e destrukshon.

⁶Oásis di Nimrim a bira un desierto, yerba a seka; no tin nada bèrdè mas, matanan tur a disparsé.

⁷P'esei tur loke hende por a salba, tur loke no a keda destruí nan ta karga pasa Roi di Manzaliña kuné.

⁸Den henter Moab eko di e yoramentu ta resoná, e lamento ta yega te na Eglaim i Beer-Elim.

⁹Na Dimon awa ta kòrá di sanger, pero ainda SEÑOR ta manda mas mizeria pa e siudat: E ta lòs leon manda riba e moabitanan ku a sobrebibí, riba e sobrá hendenan di e pueblo.