Read Papiamento Isaías 19 Bible Online

Isaías 19 - Papiamento bible

Isaías 19

¹Dios ta baha pisá riba Egipto. Ata SEÑOR ta bini pa Egipto, sintá riba un nubia rápido. Ídolonan di e pais ta tembla p'E, kurason di egipsionan ta kai.

²‘Lo Mi instigá nan un kontra otro,’ SEÑOR ta bisa. ‘Ruman lo bringa ku ruman, bisiña ku bisiña, siudat ku siudat, un parti di e reino ku e otro.

³Egipsionan lo pèrdè kabes, lo Mi bruha nan plannan. Nan lo konsultá nan diosnan i spiritu di nan defuntunan, nan montadó- i spiritistanan.

⁴Ámi ta entregá Egipto den man tirano, un rei kruel lo gobern'é.’ Asina Dios, SEÑOR soberano, ta papia.

⁵Awa di Nilo ta sak, e riu ta bira seku seku,

⁶kanalnan ta manda mal holó, brasanan dje delta di Nilo ta pèrdè tur nan awa, kaña i kabana ta marchitá.

⁷Tereno di kaña na boka dje riu, tur loke ta sembrá na su kantu, ta seka i bientu ta supla nan bai kuné; no ta sobra nada nada.

⁸Piskadónan ta yora malai; tur ku sa tira nan liña o reda den awanan di Nilo, ta para tisga.

⁹Esnan ku ta prosesá vlas ta desesperá, tantu e muhénan ku ta peñ'é komo e hòmbernan ku ta traha hilu ta blek di sustu.[30]

¹⁰Fabrikantenan di tela[31] ta abatí, trahadónan no ta mira salida.

¹¹E hefenan di Soan, konseheronan sabí di Fárao, esta un konseho di hende bestia! Nan ta un sèt di hende kèns. Anto kon boso un tras di otro por bisa Fárao: ‘Ami ta di famia ku sabiduria mi ta, mi ta desendiente di reinan antiguo?’

¹²Rei di Egipto, unda bo sabionan a keda? Laga nan bisa bo — esta si nan sa — loke SEÑOR soberano a disidí pa Egipto.

¹³Pero hefenan di Soan a bira kèns, hefenan di Memfis ta biba di ilushon, pilánan di komunidat egipsio ta pone e pais tambaliá.

¹⁴SEÑOR a zonza nan; nan ta pone Egipto zeilu den tur loke e hasi. E pais ta manera un buraché ku ta zeilu kai den su mes saká.

¹⁵Ningun hende na Egipto, ningun lider ni profeta[32] no por hasi nada pa e lugá akí.

¹⁶Den e tempu ei egipsionan lo ta yen di miedu, enditu hende muhé. Nan lo tembla manera bara bèrdè pa man di SEÑOR soberano ku ta menasá nan.

¹⁷Huda lo ta algu spantoso pa Egipto. Ki ora ku kòrda Egipto riba Huda, sustu i ansha ta drent'é pa e desishon di SEÑOR soberano.

¹⁸E tempu ei lo tin sinku siudat na Egipto kaminda ta papia hebreo i hende ta hura fieldat na SEÑOR soberano. Un di nan lo ta yamá ‘Siudat di Solo’.[33]

¹⁹E tempu ei lo tin un altá pa SEÑOR meimei di Egipto i na frontera lo tin un pilá dediká n'E.

²⁰Lo e ta un símbolo pa kòrda ku SEÑOR soberano ta presente den Egipto. Ora egipsionan ta oprimí i nan pidi SEÑOR yudansa, lo E manda un libertador, ku lo sali na nan defensa i reskatá nan.

²¹Di e manera ei SEÑOR ta mustra Egipto ken E ta i Egipto ta siña konos'É. Nan lo ofresé bestia matá i ofrenda vegetal na su honor; nan lo hasiÉ promesa i kumpli ku nan tambe.

²²SEÑOR ta kastigá Egipto mal kastigá, pero ta p'E kur'é. Nan lo bolbe serka SEÑOR ku lo skucha nan orashon i kura nan.

²³Den e tempu ei un kaminda lo kore di Egipto pa Asiria. Nan dos lo tin konekshon ku otro i huntu nan lo adorá SEÑOR.

²⁴E ora ei Israel lo okupá su lugá banda di Egipto i Asiria i lo e ta un bendishon pa henter mundu.

²⁵SEÑOR soberano lo bendishoná nan ku e palabranan: ‘Bendishoná sea Egipto, mi pueblo, bendishoná sea Asiria, obra di mi man i bendishoná sea Israel, mi propiedat.’