Read Papiamento Isaías 23 Bible Online

Isaías 23 - Papiamento bible

Isaías 23

¹Dios ta baha pisá riba Tiro. Barkunan grandi di karga, yora malai, pasobra Tiro ta destruí, niun kas no a keda riba pia! Bolbiendo for di Chipre, ya boso a tende e notisia.

²Lamentá, habitantenan di kosta, boso, komersiantenan di Sidon, ku ta manda mensaheronan krusa laman.[39]

³Trigo di delta di Nilo a krusa laman ganchu yega Tiro, loke a sembra i kosechá kantu di Nilo, ta forma e fuente di entrada pa Tiro. E ta biba di komèrsio ku pueblonan.

⁴Bèrgwensa p'abo, Sidon, i p'abo tambe, Tiro, fòrti kant'i awa; pasobra laman bashí ta keha: ‘Ta manera nunka mi n' haña doló di parto, mi n' pari yu, kria yu hòmber ni lanta yu muhé.’

⁵Egipsionan tambe ta tembla, ora nan haña notisia ku Tiro ta destruí.

⁶Basha gritu di yoramentu habitantenan di kosta, krusa oséano, hui te Tarsis na Spaña!

⁷T'esaki boso siudat a para bira, o siudat tan ekstrabagante, fundá den tempunan hopi bieu i ku semper a buska manera pa establesé su mes den paisnan leu?

⁸Ántes Tiro tabata parti korona real, su negosiantenan tabata rei, su komersiantenan shon grandi di mundu. Ta ken anto a disidí su pèrdishon?

⁹Ta SEÑOR soberano! T'E a disidí di kibra bo orguyo, kita tur bo gloria, pone grandinan di mundu bira chikí.

¹⁰Habitantenan di Tarsis, plama numa den boso mes tera manera awa di Nilo ta hasi, pasobra e barera ku Tiro a lanta, a disparsé.

¹¹SEÑOR a rèk su man riba laman, El a pone reinonan tembla; El a duna òrdu pa destruí fòrtinan di Fenisia.[40]

¹²Lo yega un fin na boso fiestanan, habitantenan di Sidon. Boso siudat t'un bírgen violá. Boso por hui bai Chipre, pero aya tampoko boso bida no ta sigur.

¹³Kòrda Babilonia! E pueblo ku tabata biba ei no ta eksistí mas. Asirionan a konstruí aparatonan di atake, basha palasionan abou i destiná e pais pa bestia di desierto bib'aden.[41]

¹⁴Barkunan di karga, yora malai, pasobra boso siudat fortifiká ta destruí!

¹⁵E dia lo yega ku Tiro lo pasa pa olvido, setenta aña largu, mes tantu ku bida di un rei ta dura. Ora e setenta añanan akí pasa, Tiro lo tin e mes destino ku e prostituta den e kantika konosí:

¹⁶‘Kana pasa den siudat ku bo lira, mariposa lubidá! Toka i kanta bunita numa mas duru i tantu ku bo por, podisé bo klientenan lo bini bèk.’

¹⁷Despues di setenta aña SEÑOR lo bolbe okup'É ku Tiro. Tiro lo por bolbe ehersé su profeshon di ántes i bende su mes ku tur reino di mundu.

¹⁸Pero tur ganashi di e trabou akí lo ta apartá pa SEÑOR. Lo no ward'é den kaha di plaka, pero lo e ta na benefisio di esnan ku ta biba serka SEÑOR. Nan lo por kumpra kuminda na abundansia i paña bunita kuné.