Read Papiamento Isaías 24 Bible Online

Isaías 24 - Papiamento bible

Isaías 24

¹Ata SEÑOR ta bini pa destruí i bari mundu, daña mundu su kara i plama su habitantenan.

²E mesun suerte ta toka tantu saserdote komo pueblo, shon komo katibu, señora komo kriá, bendedó komo kumpradó, dunadó di préstamo komo fiadó, kobradó komo debedó.

³Mundu lo ta totalmente destrosá. Sí, kompletamente plumá. T'asina SEÑOR a disidí.

⁴Tera ta tristu i ta marchitá, mundu ta para tisga i marchitá, tòpnan di mundu[42] ta para seka.

⁵Hende a susha mundu, violá leinan di Dios, despresiá su mandamentunan i kibra e aliansa eterno kunÉ.

⁶P'esei SEÑOR su maldishon ta destruí tera. Hende mester paga pa su falta. P'esei e kantidat di habitante di mundu ta mengua, tiki hende so ta sobra.

⁷Drùifnan tin aspekto tristu, matanan di drùif ta seka; burachénan kontentu awor ta keha.

⁸Ritmo alegre di tamburein ta muri, bochincha di parandero ta para, arpa su tononan kontentu ta baha te bira muda.

⁹N' ta kanta mas ora di bebe, bibida a bira marga den boka.

¹⁰E siudat ta ún ruina, káos tur kaminda, tur porta di kas será, niun hende no por drenta mas.

¹¹Den kaya hende ta grita pidi biña, tur alegria a paga, tur kontentu a disparsé for di mundu.

¹²E siudat a bira ún solo ruina, su porta ta kibrá na wèrki.

¹³Riba tera, den pueblonan lo no sobra hopi hende, mes poko ku despues di kosecha, ora a ranka drùif i ta delaster frutanan so falta pa piki ainda.

¹⁴Esnan ku a sobrebibí ta entoná un kanto, nan ta hubilá grandesa di SEÑOR; nan ta dal gritu di entusiasmo yegando for di paisnan den wèst.

¹⁵P'esei boso den regionnan di ost, duna gloria na SEÑOR; boso riba e islanan den laman proklamá su nòmber: SEÑOR, Dios di Israel.

¹⁶For di skinanan mas leu di mundu nos ta tende kantamentu: ‘Gloria n'E: E ta hustu!’ Pero ami ta bisa: ‘Ai di mi, esta malora! Esta malora! Traidornan ta tramando traishon; e ta ko'i tur dia.’

¹⁷Teror, trampa i reda ta warda boso, habitantenan di mundu!

¹⁸Esun ku hui pa gritamentu di spantu ta kai den trampa, esun ku sali for di trampa ta pega den reda. Damnan di shelu ta kibra, fundeshi di mundu ta sakudí.

¹⁹Kibra tera ta kibra, baster e ta baster habri, tembla tera ta tembla!

²⁰Manera buraché e ta zeilu, zuai bai bini manera chosa den bientu. E ta doblá bou di karga di kulpa, e ta kai, sin por lanta mas.

²¹Riba e dia desisivo ei SEÑOR ta regla kuenta ku podernan di universo ayariba, ku reinan di mundu aki bou.

²²Lo yag nan trese huntu tira nan den pos, sera den kashòt i kastigá nan despues di hopi tempu.

²³Luna blek ta bira kòrá di bèrgwensa, solo radiante ta pèrdè koló pa e skandal, pasobra SEÑOR soberano lo reina riba seru di Sion i na Herusalèm. Su gloria lo resplandesé den bista dje ansianonan di pueblo.