Read Papiamento Isaías 28 Bible Online

Isaías 28 - Papiamento bible

Isaías 28

¹Ai di Samaria, e siudat ku forma di korona, orguyo dje pueblo buraché di Efraim! Su krans presioso, dominando e vaye fértil, no ta nada mas ku flornan marchitá riba kabes dje hendenan ei ku biña a turdi.

²Ata un potensia fuerte ta bini di parti di Señor, manera tormenta di piedr'i eis, manera hos ku ta trèk, manera un nubia di awa ku ta rementá i basha inundá tur lugá. SEÑOR ta flènster e siudat ku forsa riba suela.

³Ata e korona ei bou, trapá pa pia di hende, orguyo dje pueblo buraché di Efraim!

⁴Ata e flornan marchitá ei bou, flornan di su krans presioso, dominando e vaye fértil. Ta sosodé ku Samaria manera ku un figo hechá promé ku tempu di kalor: e promé hende ku mir'é ta pikié gulié golos golos.

⁵Lo yega un dia ku SEÑOR soberano ta un korona glorioso, un krans magnífiko, pa esnan di su pueblo ku a sobrebibí.

⁶Lo E duna huesnan sentido di hustisia, i esnan ku tin ku resistí atake enemigu na porta di siudat, kurashi.

⁷Ata mas hende ku biña ta laga tambaliá i serbes ta pone zeilu: ta saserdote- i profetanan, serbes ta pone nan tambaliá, biña ta zonza nan. Serbes ta pone nan zeilu; nan ta tambaliá ora nan haña vishon, nan ta bòltu bok'abou ora di tuma desishon.

⁸Tur mesa kaminda nan ta sintá ta tapá bou di saká, no tin niun pida limpi.

⁹Nan ta bisa: ‘Ta ken e Isaías ei[43] ke siña un lès, ta ken e ke splika kiko Dios tin di bisa? Ta pa ken e tin nos, pa bebi, yu chikí ku a kaba di kita lechi?

¹⁰Ta ki kuenta di papia lenga chikí “Kuchi, kuchi, puchi, puchi?” ’[44]

¹¹Bèrdat, pa dirigí su mes na e pueblo akí Dios lo usa hende djafó ku ta papia lenga straño.

¹²El a yega di bisa e pueblo un ten: ‘Aki boso lo haña alivio; laga esnan kansá, bin sosegá, e lugá akí ta trankil.’ Pero nan no ker a tende.

¹³P'esei SEÑOR lo papia lenga chikí ku nan: ‘Kuchi-kuchi-puchi-puchi, un poko asina, un poko asana,’ di manera ku si nan purba hui, nan ta kai pech'ariba, kibra tur nan wesunan, kai den trampa bai será.

¹⁴Skucha, hendenan insolente, ku ta manda aki na Herusalèm riba pueblo. Tende loke SEÑOR ta bisa boso.

¹⁵Boso ta pretendé di a sera kombenio ku Lamuèrtè, pakto ku reino di morto. Boso ta bisa ku e katástrofe, ku lo ranka pasa manera lawin'i awa, no ta mishi ku boso, pasobra boso a skohe mentira pa refugio i engaño pa lugá di skonde.

¹⁶P'esei SEÑOR Dios ta bisa lo siguiente: ‘Mira, Mi ta bai pone un piedra resistente riba seru di Sion, un piedra balioso, ku lo sirbi komo piedra prinsipal, komo fundeshi sólido, ku tin skibi riba dje: “Esun ku stèns riba dje lo ta duru pará.”

¹⁷Mi sinta di midi ta derecho, mi chumbu di mèsla hustisia.’ Pipita di eis lo lastra boso refugio, mentira, bai kuné, e lawin'i awa lo bira basha riba boso lugá di skonde.

¹⁸Boso kombenio ku Lamuèrtè, e pakto ku reino di morto, niun di dos lo no tin niun krench'i balor mas. Pa loke ta toka e katástrofe, ku manera lawin'i awa, ta bira basha riba boso, lo e tapa boso.

¹⁹Dia tras dia, mainta, anochi, ki ora k'e pasa, e ta lastra boso bai kuné. Esta teribel pa boso komprondé e mensahe akí!

²⁰Sí, manera e proverbio ta bisa: ‘Kama a resultá muchu chikí pa rèk kurpa ariba, klechi muchu smal pa tapa kuné.’

²¹Pasobra meskos ku un ten riba seru di Perasim, SEÑOR lo aktua awor tambe; meskos ku den Sabana di Guibeon, SEÑOR lo move pa hasi su trabou, pa kumpli ku su tarea. Pero esta trabou straño, esta tarea misterioso!

²²P'esei, basta awor ku insolensia, pa boso buinan no pèrta boso mas tantu. Dios, SEÑOR soberano, a laga mi sa, ku l'E destruí henter e pais. T'esei ta su desishon!

²³Skucha bon loke mi ta bai bisa, marka mi palabra!

²⁴Akaso boso n' sa ku kunukero ku ta sembra, no ta plug ketu bai, ni sigui bòltu tera, hala riol sin fin?

²⁵Nò, e ta paria tera tambe kaba stroi simia di netumuskat i sembra komino; e ta planta trigo, maishi chikí i sebada den un kunuku bon marká ku maishi di totolika na su rant.

²⁶Ta di Dios e ta haña su saber, Dios ku ta siñ'é loke e tin ku hasi.

²⁷P'esei e no ta kita flish'i netumuskat bou di tabla di peña tapushi, ni e n' ta pasa ku wil riba komino pa kita su kaska. Nò, netumuskat i komino e ta bati ku palu.

²⁸Mester mula trigo pa traha pan; p'esei e no ta keda batié sin fin. E ta laga wilnan di su garoshi pas'ariba sí, pero e ta sòru pa su kabainan no plèch'é.

²⁹Esaki tambe ta saber ku SEÑOR soberano a dun'é. Plannan di Dios ta maravioso. E sa bon kon realisá nan.