Read Papiamento Isaías 33 Bible Online

Isaías 33 - Papiamento bible

Isaías 33

¹Ai di bo, destruktor! Ai di bo, traidor! Nunka hende no a destruí bo, nunka nan no a traishoná bo. Ora bo kaba di destruí tur kos abo mes lo ta destruí. Ora bo kaba di traishoná tur hende, abo mes lo ta traishoná.

²SEÑOR, tene piedat di nos, den Bo nos ta konfia. Sea nos forsa tur dia di nobo, nos salbashon den tempu di nesesidat.

³Pueblonan ta hui pa zonido di bo stèm poderoso, ora Bo lanta, nashonnan ta plama bai.

⁴O nashonnan, e ora ei lo rekohé boso botin, manera ora dalakochi kaba ku tur kos; na trupa nan ta baha kome tur blachi, laga palu limpi limpi.

⁵Altu elevá SEÑOR ta, ya ku t'ayariba den shelu E ta biba. Tur kaminda den Herusalèm l'E establesé derecho i hustisia.

⁶Pueblo di Herusalèm, SEÑOR ta duna bo seguridat den bo bida, kada be di nobo E ta trese salbashon, E ta duna sabiduria i konosementu na abundansia. Temor di Dios, esei ta bo tesoro di mas grandi.

⁷Skucha! Habitantenan di Herusalèm[50] ta kana grita den kaya, mensaheronan ku ya a anunsiá pas ta yora amargamente.

⁸Kamindanan ta bandoná, niun hende no ta riska biaha. Enemigu a kibra e pakto, e ta menospresiá e testigunan,[51] bida di hende no ta konta p'e.

⁹Tera tambe a seka, na rou e ta, palunan di Libanon ta marchitá di bèrgwensa, sabana di Sharon parse un desierto, na Bashan i riba seru di Karmel tur blachi ta kai fo'i palu.

¹⁰‘Antó awor Ami ta bai lanta,’ SEÑOR ta bisa, ‘awor Ami ta bai intervení i mustra mi grandesa.

¹¹E barika ku boso ta karga ta yerba seku i boso lo pari kabit'i pal'i maishi; boso rosea ta kandela ku ta guli boso mes.

¹²Pueblonan lo kima bira kalki, nan lo ta tirá den kandela manera mata di sumpiña kòrtá.

¹³Boso, pueblonan leu o serka, skucha loke Mi a hasi, realisá di loke Mi ta kapas.’

¹⁴Na Sion pekadónan ta spanta, mal hende ta haña temblamentu: kua di nos por wanta e kandela feros, kua por soportá e kalor sin fin akí?

¹⁵Solamente esun ku un bida honesto i ku bèrdat semper na boka, esun ku rechasá ganashi ranká i nenga plaka ku ta susha man, esun ku ta tapa orea pa plannan asesino i ta kita bista fo'i maldat.

¹⁶Un hende asina ta biba na altu, su refugio ta den kuebanan fortifiká, semper e tin pan i awa nunka lo no falt'é.

¹⁷Un dia boso lo mira rei den tur su splendor, un dia boso bista lo kai riba e pais den tur su ekspanshon.

¹⁸E ora ei boso lo rekordá e tempu di teror pasá i puntra boso mes: ‘Unda nan ta, esnan ku tabata nota i kontrolá belasting, esnan ku tabata konta torennan?’

¹⁹Boso lo no mira e hendenan arogante ei mas ku nan lenga bruhá i nan idioma bárbaro i inkomprensibel.

²⁰Wak e siudat di Sion, kaminda nos ta selebrá nos fiestanan. Boso lo mira Herusalèm, un lugá kaminda boso lo por biba sigur, un tènt ankrá na su lugá; pènchinan lo no lòs, kabuyanan lo no kibra.

²¹Aya SEÑOR lo mustra nos su grandesa. Riu- i roinan hanchu lo kore, barku di guera no ta pasa ni barkunan poderoso no ta nabegá riba nan.

²²Pasobra SEÑOR ta nos hues, SEÑOR ta nos legisladó. SEÑOR ta nos rei, t'E lo salba nos.

²³Sion, awor bo kabuyanan ta slap ainda, nan no ta wanta e master pará, no por hisa bela. Pero e dia ei lo parti un gran botin; asta hende ku no por kana lo poderá di nan parti.

²⁴E ora ei niun habitante di Sion lo n' bisa mas: ‘Mi ta sinti malu’; e pueblo ku ta biba ei lo haña pordon di su piká.