Read Papiamento Isaías 34 Bible Online

Isaías 34 - Papiamento bible

Isaías 34

¹Pueblonan, hala serka i tende! Nashonnan, atenshon! Mundu ku tur loke ta riba dje, tera ku tur hende ku ta biba riba dje mester paga tinu!

²SEÑOR ta razu riba pueblonan, ku furia E ta lanta kontra nan ehérsitonan. El a destiná nan pa eksterminashon i laga mata tur.

³N' ta dera nan mortonan, e kadavernan ta manda mal holó; serunan ta papá di sanger.

⁴Tur astro selestial ta desintegrá, shelu ta lora manera ròl di pèrkamènt; tur strea ta bini abou manera blachi morto na palu di wendrùif, fruta pashimá na palu di figo.

⁵SEÑOR ta bisa: ‘Mi spada a kaba di bebe su barika yen den shelu. Wak awor kon e ta baha riba Edom pa ehekutá sentensia dje pueblo ku Mi a destiná pa eksterminashon total.’

⁶Spada di SEÑOR ta bañá den sanger, e ta choria vèt, sanger manera ora mata lamchi i chubat'i kabritu, yen di sebu di nir di chubat'i karné. Pasobra SEÑOR ta selebrando un gran sakrifisio na Bosra, un masakre masal den pais di Edom.

⁷Na mes momento búfalonan tambe ta dal abou, toro yòn i toro grandinan. Pais dje edomitanan ta papá di sanger, su suela saturá di vèt.

⁸Pasobra ta tempu di SEÑOR su vengansa, ta aña pa E sali pa Sion i regla kuenta ku Sion su enemigunan.

⁹Awa den roinan lo bira breu, tera lo ta suafel, e pais, un solo masa di breu ardiente,

¹⁰ku lo kima di dia i anochi; huma pretu ta subi fo'i dje sin fin. E pais lo ta desolá pa semper i ningun hende lo no pasa nunka mas den dje.

¹¹Pelikan i porkispiña lo hasi doño riba dje, palabrua i raf lo traha nan nèshi ei. Ku sinta di midi i chumbu di mèsla SEÑOR lo marka e tera, p'e keda pa semper bashí i sin forma.

¹²Noblesa dje pais no por konta ku niun hende ku nan por proklamá rei, tur lider a disparsé.

¹³Mat'i sumpiña ta yena palasionan, wabi i bringamosa ta tapa fòrtinan; nan ta dominio di chakal, lugá pa abestrus biba.

¹⁴Ei bestia di desierto ta topa ku hiena, spiritunan di mondi ta reuní; zumbi ku ta spok anochi ta biba aya i ta haña un lugá pa sosegá.

¹⁵Ei palabrua ta traha su nèshi i pone webu, e ta brui nan i skonde su yunan den sombra di su alanan. Warawara tambe ta reuní, kada gai ku su galiña.

¹⁶Buska den buki di SEÑOR numa, bo ta haña tur esei. Lo no falta niun di e bestianan akí, ni ún embra lo no ta sin machu. Pasobra boka di SEÑOR[52] mes a papia, ta su spiritu ta trese nan huntu.

¹⁷El a lòt i parti e pais bou di nan; El a marka tereno di kada un ku su sinta di midi. Esaki ta nan propiedat pa semper, aki nan lo biba siglo aden siglo afó.