Read Papiamento Isaías 40 Bible Online

Isaías 40 - Papiamento bible

Isaías 40

¹‘Konsolá mi pueblo, bai konsol'é,’ boso Dios ta bisa.

²‘Papia ku Herusalèm ku kariño i anunsi'é: “A yega un fin na bo tempu di sirbishi, bo debe na SEÑOR ta pagá, bo a risibí mas ku basta kastigu kaba pa tur bo faltanan.” ’

³Skucha! Un hende ta grita: ‘Habri kaminda den mondi pa SEÑOR, traha un kaminda grandi den desierto pa nos Dios.

⁴Lo yena tur vaye i baha kada seru i seritu; lo paria partinan ku no ta kore pareu, e region yená ku piedra i baranka lo bira un lugá lizu.

⁵E ora ei SEÑOR lo aparesé den tur su splendor i tur hende di mundu lo mir'É pareu.’ Ta SEÑOR mes a papia.

⁶Skucha! Un hende ta bisa: ‘Bai proklamá un mensahe!’ I awor ami a puntra: ‘Kon mi ta hasi proklam'é? Hende ta manera yerba, su forsa manera di flornan di kunuku.

⁷Yerba ta seka, flornan ta marchitá, ora rosea di SEÑOR pasa riba nan. Bèrdè, hende ta manera yerba.’

⁸‘Sí, yerba ta seka i flornan ta marchitá, pero palabra di nos Dios ta keda na vigor pa semper.’

⁹Sion, subi un seru altu ku bo mensahe di alegria; lanta bo bos ku forsa, Herusalèm, mensahero di alegria, lant'é i no tene miedu. Bisa siudatnan di Huda: ‘Ata boso Dios ta bini.

¹⁰Mira, SEÑOR Dios ta bini komo vensedor, poder ta firme den su man; E ta bini ku loke El a gana, su rekompensa ta kompañ'É.

¹¹E ta warda su trupa manera un wardador, E ta serka su bestianan ku un gesto di su man, primi e lamchinan kontra su pechu i guia e mamanan ku kuidou.’

¹²Ken a yega di pone awa di laman den su plant'i man pa midié? Ken a yega di kohe midí di hanchura di shelu ku su man? Ken a yega di kohe tur tera di mundu midié na kana i pisa seru i seritu riba balansa?

¹³Ken a yega di sondia spiritu di SEÑOR, ken komo konsehero por siñ'É algu?

¹⁴Ken SEÑOR a konsultá pa dun'É konseho, ken a siñ'É kon aktua hustu? Ken a dun'É lès p'E siña i mustr'É kon prosedé ku inteligensia?

¹⁵Komprondé bon, pa SEÑOR nashonnan grandi ta manera un gota n'un hèmber, manera plushi riba balansa; islanan E ta pisa manera ta stòf fini nan ta.

¹⁶Tur bestia di mondi di Libanon no ta basta pa ofres'É un sakrifisio digno di djE, tur palu di su boskenan no ta yega pa tene e kandela sendé.

¹⁷Den su bista tur nashon huntu ta sin balor, ménos ku nada, bashí.

¹⁸Ku ken boso ke kompará Dios antó, ku kua imágen boso ke represent'É?

¹⁹Un ídolo? T'un artesano ta trah'é, un platé ta dun'é un baño di oro i traha kadena di plata p'e.

²⁰Esun ku n' por gasta tantu p'un imágen ta skohe pida palu ku n' ta putri. E ta buska un artesano ábil ku por pone e imágen para firme p'e no haña gana di kai.

²¹Ta sa boso no sa? Tende boso n' tende, fo'i tempu bieu n' konta boso? Boso n' tin ni e mínimo idea ta ken a funda mundu?

²²T'Esun ku tin su trono riba skeif di mundu,[53] di manera ku hende p'E ta mes chikí ku dalakochi, Esun ku ta span shelu manera baldakin, manera tènt pa bib'aden.

²³Esun ku ta redusí reinan i lidernan di mundu na nada:

²⁴n' kaba di planta nan, n' kaba di sembra nan, nan n' kaba di spreit rais, ku E ta supla riba nan; nan ta marchitá i warwarú ta karga nan bai kuné manera bagas.

²⁵‘Ta ku ken boso ke kompará Mi antó,’ Dios Santu ta bisa, ‘ken ta mi pareu?’

²⁶Hisa kara i wak shelu: ken a krea tur esei? T'Esun ku ta laga henter e ehérsito di strea marcha bini dilanti i ta yama nan un pa un na nan nòmber. E tin dje tantu poder ei dje inmenso su forsa ta ku niun di nan no ta keda sin presentá.

²⁷Pueblo di Israel, desendientenan di Yakob, di kon boso ta keha: ‘SEÑOR no sa di nada ku ta pasa nos, nos Dios no ta tuma nos derechonan na kuenta.’

²⁸Ta sa boso n' sa, tende boso n' tende? SEÑOR ta Dios pa tur eternidat, El a krea mundu di punta te punta. E no ta kansa ni pèrdè rosea: no por sondia su saber.

²⁹Hende kansá E ta duna ánimo, esun débil E ta hasi fuerte.

³⁰Hende hóben ta kansa i pèrdè rosea, hòmber balente ta trompeká i kai,

³¹pero esnan ku konfia den SEÑOR ta haña forsa nobo kada be; nan lo bula altu[54] manera águila. Nan ta kore sin kansa nan ta kana sin pèrdè rosea.