Read Papiamento Isaías 46 Bible Online

Isaías 46 - Papiamento bible

Isaías 46

¹Wak, e dios Bèl a baha bini abou, e dios Nebo ta drumí pech'ariba. Bestia di karga ta kana show ku nan imágen. Si un ten ta hende[59] tabata karga e bultonan, awor ta bestia kansá ta karga nan peso.

²E diosnan a kai pech'ariba, nan tur a baha bini abou pareu. Inkapas di salba e bultonan, nan mes ta bai den eksilio.

³Dios ta bisa: ‘Desendientenan di Yakob, israelitanan ku a sobrebibí, ku M'a karga fo'i den barika di boso mama, ku M'a tuma den brasa fo'i boso nasementu, skucha Mi:

⁴Mi ta sigui karga boso, te dia boso bira bieu, kabei shinishi. M'a hasié i ta keda hasié. Mi ta pone boso riba mi skouder, Mi ta salba boso.

⁵Ku ken boso ke kompará Mi awor? Ken ta mi pareu? Ken por igualá su mes ku Mi?

⁶Hende ta saka oro fo'i nan saku, pisa plata riba balansa; nan ta buska un platé pa traha un dios dje metal akí; nan ta bùig su dilanti pa ador'é.

⁷Nan ta hisa e bulto pone riba skouder i karg'é bai hiba su lugá; nan ta pon'é abou i at'é pará ei! E no ta skit fo'i su lugá. Ni maske kuantu nan grita pidi ousilio, e no ta rospondé, e no ta saka nan fo'i nan perkansia.

⁸Kòrda esaki, rebeldenan, grab'é den boso memoria i tum'é na kuenta.

⁹Kòrda e kosnan ku a pasa ántes, den tempu bieu, kòrda ku Ami ta Dios, no tin otro. Ami ta Dios i no tin mi pareu.

¹⁰Fo'i kuminsamentu ya Mi ta anunsiá e fin. Mi ta predesí hopi delantá kosnan ku no a pasa ainda. T'Ami t'Esun ku ta bisa: “Mi desishon ta irevokabel; mi boluntat ta lei.”

¹¹Fo'i ost mi ta yama un hòmber, fuerte manera para di rapiña.[60] E ta bini djaleu i ta kumpli ku mi desishonnan. Mi palabra ta piedr'i bos, plannan ku Mi traha, Mi ta ehekutá.

¹²Skucha Mi, boso ku a pèrdè kurashi.[61] Boso no tabata spera liberashon,

¹³pero Ami ta hal'é trese serka, e no ta leu mas; e salbashon ku Ami ta trese no ta tarda. Mi ta trese salbashon pa Sion i laga Israel toka parti den mi splendor.’