Read Papiamento Isaías 8 Bible Online

Isaías 8 - Papiamento bible

Isaías 8

¹SEÑOR a bisa mi: ‘Kohe un bòrchi grandi i skibi ku lèternan kla riba dje: Na “Sakeo Anshá — Botin Purá.”

²Anto buska[12] dos testigu digno di konfiansa pa Mi, esta e saserdote Urías i Zakarías, yu di Yebèrèkyahu.’

³Despues mi tabatin relashon ku mi esposa, e profeta. El a sali na estado i a haña un yu. E ora ei SEÑOR a bisa mi: ‘Yam'é “Sakeo Anshá — Botin Purá”,

⁴pasobra promé ku e mucha por bisa “mama” i “tata”, ya a hiba e rikesa di Damasko i e botin, konkistá na Samaria, pa rei di Asiria.’

⁵SEÑOR a bolbe papia ku mi i bisa:

⁶‘E pueblo akí ta despresiá e awa ku ta kore trankil for di tanki di Shiloag[13] i ta kontentu ku e aliansa ku Resin i e yu di Remaliahu ei.

⁷P'esei wak awor kon Mi ta bai manda e rei di Asiria ku su ehérsito poderoso pa nan: hanchu manera riu Eufrat, ku ta kore purá i ta krese mas i mas te subi tera,

⁸e ta drenta te den Huda i ta inund'é kada be mas te yega na su garganta. Manera un para e ta habri su alanan i tapa henter e hanchura di bo tera. Dios sea ku nos.’

⁹Pueblonan, boso lo kibra, boso lo plama. Arma boso mes numa; boso lo plama. Sí, maske kon bon boso arma boso mes, boso lo plama.

¹⁰Traha plan numa, nan lo frakasá! Plania strategia numa, lo n' sirbi pa nada! Pasobra Dios ta ku nos!

¹¹SEÑOR a pone su man fuerte riba mi i a atvertí mi pa no sigui e mesun rumbo di e pueblo akí. El a bisa mi:

¹²‘No yama konspirashon loke e pueblo akí ta yama asina; no laga nada ku nan tin miedu di dje yena boso ku miedu i temor.

¹³T'Ami boso mester konsiderá santu, ta di SEÑOR soberano so boso mester tin miedu i temor.

¹⁴Ami lo ta un refugio sagrado. Pero pa e dos kasnan real di Israel lo Mi ta: un piedra ku nan ta dal nan pia n'e; un barank'i piedra ku ta pone nan trompeká. I pa e habitantenan di Herusalèm lo Mi ta un reda i un trampa.

¹⁵Hopi hende lo trompeká, kai i kibra tur nan wesunan. Nan lo kai den trampa i keda pegá.’

¹⁶Mester mara e relato di tur esaki bon mará i warda e instrukshon seyá serka mi disipelnan.

¹⁷Ounke SEÑOR skonde su kara pa pueblo di Yakob, ami ta warda riba SEÑOR i mi ta konfia den djE.

¹⁸Ami i e yunan ku SEÑOR a duna mi ta sirbi komo señal bibu, komo atvertensia di SEÑOR soberano ku ta biba riba seru di Sion.

¹⁹Tin hende ku ta bisa: ‘Konsultá montadó i spiritista ku ta papia den djente i murmurá; akaso un pueblo no ta konsultá su Dios? [14] Esnan bibu mester sigui konseho di esnan morto?’

²⁰Si hende bisa boso esei, boso mester kontestá: ‘Hende mester atené nan na e instrukshon- i mensahenan di SEÑOR.’ Pa esnan ku no ta papia di akuerdo ku e palabra ei di dia lo no habri mas!

²¹Nan lo kana dualu djaki p'aya, abatí i hambrá; razu di hamber nan lo maldishoná nan rei i nan Dios. Nan lo hisa kara na laria,

²²kaba baha nan bista na suela, pero ta blo ansha, skuridat nan lo haña, tiniebla spantoso; lo tira nan den un anochi skur skur.