Read Papiamento Levítiko 10 Bible Online

Levítiko 10 - Papiamento bible

Levítiko 10

¹E dos yunan di Aaron, Nadab i Abihu, kada un a kohe su panchi di kandela i pone karbon sendé aden. Riba e karbon nan a pone sensia i dilanti di SEÑOR nan a hasi ofrenda ku kandela ku, kontra regla di Dios, nan no a kohe for di altá.

²Na e momento ei un kandela a bini di SEÑOR kima nan dos kompletamente; nan a muri einan mes.

³Moises a bisa Aaron: ‘SEÑOR a atvertí boso, pasobra El a bisa: “Mi ke pa esnan ku aserká Mi respetá mi santidat i duna Mi gloria dilanti di henter pueblo.” ’ Aaron a pèrdè abla.

⁴Moises a yama Mishael i Elisafan, yunan di Uziel, tio di Aaron, i bisa nan: ‘Bai kohe kurpa di boso primunan i hiba nan for di santuario pafó di kampamentu.’

⁵Nan a hasi loke Moises a manda nan i nan a hiba e mortonan, ainda bistí den nan toga saserdotal, pafó di kampamentu.

⁶Despues Moises a bisa Aaron i su otro yunan Eleazar i Itamar: ‘No laga boso kabei habrí, ni sker boso paña pa motibu di rou, pasobra boso lo yama morto riba boso i tambe SEÑOR su rabia riba henter pueblo di Israel. Boso rumannan, henter e pueblo di Israel sí por tene rou pa esnan ku SEÑOR a kastigá ku kandela.

⁷No bai tampoko for di entrada di tènt di enkuentro si boso no ke muri, pasobra a konsagrá boso ku zeta den servisio di SEÑOR.’ Aaron i su yunan a hasi manera Moises a ordená nan.

⁸SEÑOR a bisa Aaron:

⁹‘Ni abo ni bo yunan no mester bebe biña ni otro bibida stèrki promé ku boso drenta tènt di enkuentro, pa boso no yama morto riba boso. Ta un lei permanente pa bo i pa tur bo desendientenan.

¹⁰No bebe alkohòl pasobra ta boso tin ku disidí si un kos ta sagrado òf profano, puru òf impuru,

¹¹i ta boso tin ku siña e israelitanan e leinan ku Ami a pasa pa nan pa medio di Moises.’

¹²Moises a bisa Aaron i su dos yunan, Eleazar i Itamar, ku a keda na bida: ‘Kohe loke a sobra di e ofrenda vegetal, despues ku a apartá loke ta pa SEÑOR, traha pan sin zürdeg di e hariña i kom'é banda di altá, pasobra ta trata di un kuminda mashá sagrado.

¹³Den un lugá sagrado so boso por kom'é. E parti akí di e sakrifisio di kuminda SEÑOR a destiná pa bo, Aaron, i pa bo yunan. Asina SEÑOR a ordená mi.

¹⁴Mester kome pechu i parti ariba di e pia di patras di e bestianan, ku e israelitanan a ofresé komo sakrifisio di pas i ku nan a ofresé na SEÑOR ku e rito di presentashon, den un lugá ritualmente puru. E pidanan ei ta pa bo, pa bo yu hòmbernan i yu muhénan.

¹⁵E israelitanan mester trese e pia di patras i e pechu huntu ku e sebu ku nan a kima riba altá. Despues ku nan presentá esei dilanti di SEÑOR, boso ta haña e partinan bèk, pasobra manera SEÑOR a ordená, e partinan ei ta reservá pa boso pa semper.’

¹⁶Ora Moises a puntra pa e chubatu ku nan a ofresé komo sakrifisio pa pordon di piká di pueblo, el a bin tende ku nan a kim'é. Moises a rabia mashá ku Eleazar i Itamar, e dos yunan di Aaron, ku a keda na bida, i el a bisa nan:

¹⁷‘Pakiko boso no a kome e karni di e sakrifisio ei den un lugá sagrado? No ta un alimento mashá sagrado e ta? SEÑOR a duna boso e bestia ei pa boso por libra e pueblo di su pikánan i drecha tur kos atrobe entre nan ku Dios.

¹⁸Boso sa ku no a hiba sanger di e bestia den santuario, p'esei boso mester a kome e karni na un lugá sagrado, manera mi a ordená boso.’

¹⁹Pero Aaron a kontestá Moises: ‘Tende, bo sa bon bon kiko a pasa mi awe, ora mi yunan a ofresé nan sakrifisio pa pordon di piká i nan sakrifisio di kandela. Bo ta kere ku riba un dia manera awe mi por a kome karni di e bestia sakrifiká pa pordon di piká? SEÑOR lo no a keda kontentu sigur.’

²⁰Moises a keda satisfecho ku e kontesta ei.