Read Papiamento Levítiko 13 Bible Online

Levítiko 13 - Papiamento bible

Levítiko 13

²‘Ora un hende tin un hinchá òf su kueru ta reboltá òf e tin un mancha ku ta lombra riba su kueru i por ta ku e tin lepra, mester hiba e hende ei serka saserdote Aaron òf serka un di su desendientenan saserdote.

³E saserdote ta saminá e kueru. Si e kabeinan na e lugá a bira blanku i e parti afektá ta fundi, ta trata di un kaso di lepra. Asina e saserdote konstatá esaki, e mester deklará e hende impuru.

⁴Si sinembargo ta trata di un mancha blanku ku ta lombra i ku e mancha no ta fundi i e kabeinan na e lugá no a bira blanku, e saserdote mester isolá e hende shete dia.

⁵Riba e di shete dia e ta bolbe saminá e hende; si resultá ku e mancha a keda mes grandi i ku e no a plama riba e kueru, e saserdote mester bolbe isolá e hende shete dia.

⁶Riba e di shete dia e saserdote ta bolbe saminá e hende i si resultá ku e mancha a bira dòf i ku e no a plama riba e kueru, e saserdote ta deklará e hende puru, pasobra ta djis un iritashon. E hende mester laba solamente su pañanan pa e ta puru atrobe.

⁷Pero si e iritashon plama riba e kueru despues ku e saserdote a saminá i a deklará e hende puru, esaki mester bolbe bai serka e saserdote.

⁸E saserdote ta samin'é atrobe i si resultá ku e iritashon a plama en realidat, e ta deklará e hende impuru: ta un sorto di lepra.

⁹Ora un hende tin un malu di kueru ku parse lepra, mester hib'é serka un saserdote.

¹⁰E saserdote ta samin'é. Si resultá ku e tin un hinchá blanku den kueru ku kabei blanku ariba òf tin karni bibu den e hinchá,

¹¹ta trata di un kaso di lepra avansá. E saserdote mester deklará e hende impuru, e no tin nodi di isol'é, pasobra ta bisto ku e ta impuru.

¹²Si di otro banda e saserdote tin impreshon ku e malu a plama riba tur e kueru i ku henter e kurpa, di pia te kabes, ta afektá,

¹³e mester saminá e hende mas bon. Si enberdat e malesa ta kubri henter e kurpa, e mester deklará e hende puru. E hende ta puru, pasobra el a bira tur blanku.

¹⁴Pero dia e kueru bira karni bibu, e ta impuru;

¹⁵e saserdote ta konstatá ku e karni ta bibu i ta deklará e hende impuru; e karni bibu ta impuru, ta un sorto di lepra.

¹⁶Si e karni bibu bolbe bira blanku, e hende mester bolbe bai serka e saserdote.

¹⁷E saserdote ta samin'é i si resultá ku e kueru afektá a bira blanku, e saserdote mester deklar'é puru, i e ta puru atrobe.

¹⁸Ora un hende tabatin un blufein ku a kura,

¹⁹pero despues e haña un hinchá blanku òf un mancha ros kaminda e blufein tabata, e hende mester bai serka e saserdote.

²⁰E saserdote ta samin'é. Si e saserdote ripará ku e parti afektá ta fundi i e kabeinan riba dje a bira blanku, e ta deklará e hende impuru; pasobra ta un sorto di lepra ta desaroyá riba sikatris di e blufein.

²¹Pero si ora e saserdote ta saminá e hende, no tin kabei blanku riba e mancha, e sikatris no ta fundi i e koló ta dòf, e saserdote ta isolá e hende shete dia.

²²Si despues di esei e mancha a plama riba e kueru, e saserdote ta deklar'é impuru, ta un sorto di lepra.

²³Pero si e mancha ku ta lombra no a kambia i no a plama, e ora ei ta sikatris di e blufein a keda i e saserdote ta deklará e hende puru.

²⁴Ora un hende tin un kimá na su kurpa i kaminda e kimá ta, sali un mancha ros,

²⁵e saserdote mester saminá e parti konserní. Si resultá ku e kabeinan riba e mancha a bira blanku i e kueru ta fundi, ta un sorto di lepra a kuminsá den e kimá. P'esei e saserdote ta deklará e hende impuru.

²⁶Ma si e saserdote saminá e herida i resultá ku no tin kabei blanku ariba, ku e kueru no a fundi i ku el a bira dòf, e saserdote ta isolá e hende shete dia.

²⁷Si riba e di shete dia e saserdote konstatá ku e malesa a plama riba e kueru, e mester deklará e hende impuru; ta un sorto di lepra.

²⁸Pero si e mancha a keda meskos, no a plama, ma a bira dòf, e ora ei ta e kimá a hincha, e saserdote mester deklará e hende puru, pasobra ta trata solamente di sikatris di e kimá.

²⁹Ora un hende hòmber òf muhé tin malu di kueru na su kabes òf na su kachete,

³⁰e saserdote ta saminá e parti afektá: si resultá ku e kueru ta fundi i e kabei riba dje ta hel i tiki, e saserdote ta deklará e hende impuru; ta fungus ta ataká e kueru di kabes òf di kachete.

³¹Ma si e saminá e parti afektá i resultá ku e no ta fundi i no tin kabei pretu riba dje, e saserdote ta isolá e hende shete dia.

³²Si riba e di shete dia e saserdote saminá e parti afektá atrobe i resultá e ora ei ku e malu no a plama ni tin kabei hel riba dje, ni e kueru no a fundi,

³³e hende malu mester feita su kabes, ku eksepshon di e parti afektá; despues e saserdote ta isolá e hende shete dia mas.

³⁴Riba e di shete dia ta bolbe saminá e parti afektá; si resultá ku e iritashon no a plama riba e kueru, ni e kueru no a fundi, e saserdote ta deklará e hende puru. E hende mester laba solamente su pañanan pa e bira puru.

³⁵Pero si e beskein a sigui plama riba e kueru despues ku e saserdote a deklará e hende ei puru,

³⁶e saserdote ta bolbe samin'é i si resultá ku enberdat e beskein a plama riba e kueru, e saserdote no tin mester di buska ku tin kabei hel, pasobra ta bisto ku e hende ta impuru.

³⁷Pero si di otro banda e parti afektá no a kambia visiblemente i kabei pretu a sali einan, e malu a kura, e hende ta puru i e saserdote mester deklar'é puru.

³⁸Ora un hende hòmber òf muhé tin mancha blanku ku ta lombra riba su kueru,

³⁹e saserdote mester samin'é. Si resultá ku e manchanan ta blanku sushi, ta trata di un iritashon inosente ku a afektá e kueru; e hende ta keda puru.

⁴⁰Ora un hòmber su kabeinan ta kai i e kabes ta bira limpi, e ta puru.

⁴¹Si e kabeinan na e parti dilanti di su kabes kai i e parti ei bira limpi, e ta puru.

⁴²Pero si e haña un mancha koló ros kaminda su plenchi òf e parti dilanti di kabes a bira limpi, ta un sorto di lepra ta desaroyá einan.

⁴³E saserdote ta samin'é. Si e haña un hinchá ros ku parse lepra na e parti ku e kabes a bira limpi,

⁴⁴e hende ta sufri di un sorto di lepra. E ta impuru. E saserdote mester deklar'é impuru pa motibu di e malu ku e tin riba su kabes.

⁴⁵E leproso mester kana ku paña isker, laga su kabei habrí, tapa su mustashi i barba i grita: “Mi ta impuru, mi ta impuru”.

⁴⁶Tanten e hende tin e malesa, e ta keda impuru. P'esei e mester biba isolá, pafó di kampamentu.

⁴⁷Ora tin mancha di beskein riba paña di bisti trahá di lana òf di lenen,

⁴⁸òf riba tela òf paña ibrei di lenen òf lana, òf riba kueru òf algu trahá di kueru

⁴⁹i e manchanan tin un koló bèrdè òf kòrá, ta trata di un beskein ku mester laga un saserdote saminá.

⁵⁰Despues di saminá e opheto e saserdote ta ward'é apart shete dia.

⁵¹Riba e di shete dia e saserdote ta bolbe samin'é. Si e mancha den e bistí, den e tela òf paña ibrei òf riba e kueru pa loke sea ta usa e kueru, a bira mas grandi, e ora ei ta trata di un beskein ku no por kita; e opheto ta impuru.

⁵²E saserdote ta kima e opheto. Pasobra no por kita e beskein, mester destruí e opheto den kandela.

⁵³Pero si e saserdote samin'é i resultá ku e mancha no a bira mas grandi,

⁵⁴e ta duna òrdu pa laba e opheto afektá i e ta ward'é shete dia mas.

⁵⁵Despues ku laba e opheto, e saserdote ta bolbe samin'é. Si resultá ku e mancha no a kambia i tampoko a bira mas grandi, e opheto ta impuru. Mester kim'é pasobra e beskein a kome drenta e opheto di paden òf di pafó.

⁵⁶Ma si e saserdote konstatá ora e ta samin'é ku e mancha a blikia despues ku a lab'é, e ta sker e pida ku e mancha kita for di e bistí, e kueru, e tela òf e paña ibrei.

⁵⁷Pero si e mancha bolbe sali den e bistí, e tela, e paña ibrei òf e opheto di kueru, e ora ei e beskein ta desaroyá atrobe. Mester kima e opheto.

⁵⁸Si despues di laba un bistí, tela, paña ibrei òf opheto di kueru ku tabatin beskein e mancha a kita, mester bolbe lab'é pa e ta puru.

⁵⁹Te asina leu e instrukshonnan tokante mancha di beskein ku ta sali den bistí di lana òf lenen, òf den tela, paña ibrei òf opheto di kueru; e instrukshonnan akí ta hasi posibel pa deklará ku e opheto afektá ta puru òf impuru.’