Read Papiamento Levítiko 23 Bible Online

Levítiko 23 - Papiamento bible

Levítiko 23

¹SEÑOR a ordená Moises

²pa bisa e israelitanan lo siguiente: ‘Durante e fiestanan solèm, selebrá na mi honor, boso mester bini huntu pa adorá Mi. Aki ta sigui e fiestanan ku Ami a fiha.

³Den un siman tin seis dia di trabou; e di shete dia ta sabat, e dia di sosiegu kompleto ku boso ta reuní na mi honor. Boso no mag hasi ningun sorto di trabou e dia ei; e sabat mester ta un dia dediká na Mi, unda ku boso por ta biba.

⁴Otro fiesta solèm na mi honor, esta dia ku boso mester reuní pa adorá Mi, boso mester selebrá riba e siguiente fechanan.

⁵Riba di dieskuater dia di e promé luna, atardi ora solo baha, fiesta di Pésag na mi honor ta kuminsá.

⁶Riba di diessinku dia di e luna ei ta sigui fiesta di Pan sin Zürdeg. Shete dia largu e pan ku boso ta kome mester ta pan prepará sin zürdeg.

⁷E promé dia di e siman ei boso mester reuní pa adorá Mi; no traha e dia ei.

⁸Tur dia di e siman ei boso mester ofresé Mi un sakrifisio di kuminda. Riba e di shete dia tambe boso mester bini huntu pa adorá Mi. E dia ei tampoko boso no mag traha.’

⁹SEÑOR a ordená Moises

¹⁰pa bisa e israelitanan: ‘Dia boso yega e pais ku Mi duna boso i boso kosechá, boso mester hiba e promé bòshi di grano pa saserdote.

¹¹E dia despues di sabat saserdote ta hisa e bòshi i presentá Mi e ku e rito di presentashon pa Mi asept'é.

¹²E dia ei mes boso mester ofresé Mi un chubatu di karné di un aña sin defekto; boso mester kim'é komo sakrifisio di kandela na mi honor

¹³i huntu kuné boso mester hasi un ofrenda vegetal di seis kilo di hariña fini prepará ku zeta, un sakrifisio di kuminda ku un holó agradabel pa Mi i ademas basha un liter di biña komo ofrenda.

¹⁴Boso no mag kome ningun produkto di e kosecha ei, ni pan, ni grano tostá, ni grano fresku, promé ku e dia ku boso trese e bòshi pa ofresé Mi. Esaki ta un lei permanente pa tur generashon, unda ku boso por ta biba.

¹⁵[9] Konta shete siman kompleto for di e dia despues di sabat ku boso a ofresé e promé bòshi di grano.

¹⁶E periodo ei di sinkuenta dia ta dura te manisé di e di shete sabat. E dia ei boso mester hasi un ofrenda di e kosecha nobo na Mi.

¹⁷For di kas boso mester trese dos pan i ofresé Mi nan segun e rito di presentashon, kada pan mester ta trahá di seis kilo di hariña fini ku zürdeg. Esaki ta un ofrenda di e promé pannan di boso kosecha.

¹⁸Huntu ku e ofrenda di pan akí boso mester trese shete karné di un aña sin defekto, un toro yòn i dos chubatu di karné, pa kima nan komo sakrifisio di kandela. Mester pone huntu e ofrenda vegetal i e biña ku nan ta basha komo ofrenda. Asina e sakrifisio ta un sakrifisio di kuminda ku un holó agradabel pa Mi.

¹⁹Tambe boso mester ofresé un chubatu komo sakrifisio pa pordon i dos lamchi di karné di un aña komo sakrifisio di pas.

²⁰Segun e rito di presentashon e saserdote ta ofresé Mi e bestianan, e dos lamchinan inkluí, pareu ku e pannan di e kosecha nobo; tur e ofrendanan akí ta konsagrá na Mi i nan ta pa e saserdote.

²¹E dia ei mes boso mester reuní pa adorá Mi, no traha e dia ei. Ta un lei permanente pa tur generashon unda ku boso por ta biba.

²²Ora boso rekohé kosecha, no kòrta trigo te na rant di e kunuku ni bai bèk pa piki delaster un tapushi ku a keda abou. Laga nan pa e hendenan pober i pa e strañeronan. Ami ta SEÑOR, boso Dios.’

²³I SEÑOR a ordená Moises

²⁴pa bisa e israelitanan lo siguiente: ‘E promé dia di e di shete luna ta un dia di sosiegu pa boso, un dia di rekuerdo, anunsiá pa tròmpèt; e dia ei boso mester reuní pa adorá Mi.

²⁵No traha e dia ei i ofresé Mi un sakrifisio di kuminda.’

²⁶SEÑOR a ordená Moises:

²⁷‘Di dies dia di e di shete luna ei ta dia di drecha ku Dios. E dia akí boso mester bini huntu pa adorá Mi, pa yuna i pa ofresé Mi un sakrifisio di kuminda.

²⁸E dia ei boso no mag hasi ningun sorto di trabou, pasobra ta dia di drecha ku Dios, e dia ku dilanti di Mi, SEÑOR boso Dios, e saserdote ta drecha tur kos atrobe entre boso i Ami.

²⁹Mester saka esnan ku no yuna e dia ei, ken ku e ta, for di komunidat di Israel.

³⁰Esnan ku hasi kualke trabou e dia ei Mi mes lo eliminá nan for di pueblo di Israel.

³¹E dia ei tur trabou ta prohibí pa boso, ta un lei permanente pa tur generashon unda ku boso por ta biba.

³²Hasié un dia di sosiegu kompleto, un dia di yuna. Boso mester selebrá e dia di sosiegu akí for di e di nuebe te e di dies dia di luna, for di ora solo baha esun anochi te ora solo baha e otro anochi.’

³³SEÑOR a ordená Moises

³⁴pa bisa e israelitanan lo siguiente: ‘For di e di diessinku dia di e di shete luna ei boso mester selebrá fiesta di Ramada na mi honor shete dia largu.

³⁵E promé dia boso mester bini huntu pa adorá Mi i boso no mag hasi trabou di tur dia.

³⁶Shete dia tras di otro boso mester ofresé Mi un sakrifisio di kuminda. Riba e di ocho dia boso ta bolbe bini huntu na mi honor i boso ta bolbe ofresé Mi un sakrifisio di kuminda. Dia di delaster reunion boso no mag traha.

³⁷Na okashon di e dianan di fiesta solèm akí selebrá na mi honor, boso mester bini huntu pa adorá Mi i pa ofresé Mi sakrifisio di kuminda: sakrifisio di kandela, ofrenda vegetal òf sakrifisio di pas ku ofrenda di biña, segun e rito ku ta preskribí pa kada fiesta.

³⁸Ofresé Mi e sakrifisionan akí huntu ku esnan ku boso sa ofresé Mi riba e dianan di sabat, i huntu ku tur e otro ofrendanan i sakrifisionan ku boso sa hasi boluntariamente òf pa kumpli ku un promesa.

³⁹Di diessinku dia di e di shete luna antó despues di a kosechá produkto di tera, boso mester selebrá fiesta di Ramada un siman largu na mi honor. E promé i e di ocho dia mester ta dia di sosiegu.

⁴⁰Riba e promé dia boso ta kohe e frutanan di mas bunita for di boso palunan, ramanan di palma, i takinan for di palu yen di blachi i taki for di palu kantu di awa. Durante henter e siman boso mester demostrá boso alegria na honor di Mi, boso SEÑOR i Dios.

⁴¹Kada aña atrobe boso mester selebrá e fiesta akí na mi honor durante un siman den e di shete luna. Ta un lei permanente pa tur generashon.

⁴²Durante e siman akí, boso mester keda biba den ramada; tur ku a nase na Israel mester hasié,

⁴³pa boso desendientenan sa ku Mi a laga nan antepasadonan biba den ramada despues ku Mi a saka nan for di Egipto. Mi ta SEÑOR, boso Dios.’

⁴⁴Asina Moises a partisipá e israelitanan e fiestanan ku nan mester selebrá na honor di SEÑOR.