Read Papiamento Levítiko 25 Bible Online

Levítiko 25 - Papiamento bible

Levítiko 25

²pa bisa e israelitanan lo siguiente: ‘Dia boso drenta e pais ku Mi ta bai duna boso, laga e tera sosegá na mi honor un aña largu. Esei ta e aña di sabat.

³Durante seis aña boso por sembra kunukunan, snui hòfinan di wendrùif i rekohé kosecha.

⁴Pero e di shete aña mester ta un aña di sosiegu kompleto pa e tera; un aña di sabat na mi honor. No sembra kunuku ni snui hòfi di wendrùif,

⁵no kosechá e trigo ku a krese di su mes despues di e delaster kosecha, ni rekohé e wendrùif ku a hecha den e hòfinan ku boso no a snui, pasobra e aña mester ta un aña di sosiegu kompleto pa e tera.

⁶Boso por kome loke a krese di mes, esta boso, boso katibunan, esnan ku ta traha pa boso pa un salario i e strañeronan ku ta biba serka boso.

⁷Tur e produktonan ei lo sirbi tambe pa kuminda di boso bestianan di kria i e bestianan di mondi ku tin den boso pais.

⁸Ora boso a selebrá aña di sabat shete bia tras di otro i asina 49 aña a pasa en total,

⁹laga zonido di kachu resoná den henter pais riba e di dies dia di e di shete luna, riba e gran dia di drecha ku Dios.

¹⁰Asin'ei boso ta deklará e di sinkuenta aña na Mi i proklamá libertat pa tur e habitantenan di e pais. Lo yama e aña ei: aña di hubileo. Na e okashon ei kada un di boso ta haña tereno di famia bèk i ta regresá serka su famia.

¹¹Asina boso mester selebrá kada 50 aña, e aña di hubileo: e aña ei no mag sembra, ni kosechá e trigo ku ta krese di su mes, ni rekohé e tròshinan di wendrùif ku a hecha na e matanan ku no a snui,

¹²pasobra ta aña di hubileo, ku mester ta algu sagrado pa boso. Sinembargo boso por kome loke e kunukunan a produsí di nan mes.

¹³Durante e aña di hubileo, kada un di boso ta haña tereno di su famia bèk.

¹⁴P'esei si boso bende òf kumpra tereno, no perhudiká boso paisano.

¹⁵Ora di kumpra òf bende tereno mester tene kuenta ku e añanan ku a pasa despues di e delaster aña di hubileo i di mes tambe ku e añanan di kosecha ku falta te e siguiente aña di hubileo.

¹⁶Mas aña di kosecha falta, mas altu e preis; ménos aña falta, mas abou e preis; ke men ku loke en realidat bo ta bende ta sierto kantidat di kosecha.

¹⁷No perhudiká otro, asina boso ta respetá boso Dios. Pasobra Ami ta SEÑOR, boso Dios.

¹⁸Kumpli ku mi leinan i sòru di biba segun mi mandamentunan. E ora ei boso lo biba trankil den e pais ei.

¹⁹E tera lo produsí kosecha basta abundante pa boso haña kome i biba trankil einan.

²⁰Podisé boso lo puntra boso mes: “Nos lo tin basta di kome, si kada shete aña nos no mag sembra nos kunukunan ni kosechá loke nan produsí?”

²¹Ta asina ku Ami, SEÑOR, lo bendishoná tera di tal manera den e di seis aña ku lo e produsí pa tres aña.

²²E di ocho aña, ora boso bolbe sembra, boso por biba ainda di e kosecha di e di seis aña; lo tin sufisiente di reserva te ora den e di nuebe aña rekohé e kosecha nobo.

²³No por bende un tera nunka definitivamente, pasobra e tera ta pertenesé na Mi, i boso ta biba serka Mi manera strañero ku djis por hasi uso di e pais.

²⁴P'esei den henter e pais ku Mi duna boso, tur hende mester tin e derecho di kumpra su tereno bèk.

²⁵Si un di boso paisanonan kai den pobresa i hañ'é obligá di bende su tereno, un di su famianan mas yegá, ku tin e deber di kumpra bèk, lo mester kumpr'é bèk.

²⁶Si e no tin un famia ku por kumpra e tereno bèk p'e, pero el a haña moda pa e mes kumpr'é bèk,

²⁷e mester kalkulá e suma ku e mester paga e bendedó, segun e kantidat di aña ku falta pa e aña di hubileo; e ta pag'é i bolbe tuma su tereno bèk.

²⁸Si e no haña moda pa kompensá, e tereno ta keda propiedat di e kumpradó te aña di hubileo. E aña ei e tereno ta bira liber i e promé doño ta haña su tereno bèk.

²⁹Si un hende bende un kas situá den un siudat fortifiká ku muraya, e derecho di kumpra bèk ta temporal; e derecho no ta dura mas largu ku un aña despues di e benta.

³⁰Si e hende ei no kumpra e kas bèk denter di un aña, definitivamente e ta keda propiedat di esun ku a kumpr'é i di su desendientenan. Nan no tin mester di dun'é bèk durante aña di hubileo.

³¹Enkambio e kasnan situá na lugá no fortifiká, ta kai bou di regla di kunuku; e derecho di kumpra e kas ei bèk semper ta keda eksistí; ma di tur manera e ta bai bèk na e promé doño durante aña di hubileo.

³²Loke ta trata e levitanan, nan ta keda semper ku derecho di kumpra nan kasnan, situá den nan siudatnan, bèk.

³³Asta si ta un levita a kumpra un di e kasnan ei serka un otro levita, e kas mester kai bèk na e promé doño durante aña di hubileo. Pasobra e kasnan ei ta forma e úniko propiedat di e levitanan na Israel.

³⁴Pero no por bende e kunukunan rondó di nan siudatnan, pasobra nan ta propiedat permanente di e levitanan.

³⁵Ora un di boso paisanonan kai den pobresa i e no por mantené su mes mas, boso mester yud'é di moda ku e por keda biba serka boso, komo si fuera ta un strañero òf un hende bibá temporalmente serka boso.

³⁶No eksigí, bou di ningun forma, interes di dje. Demostrá ku boso komportashon ku boso ta respetá Mi, i lag'é biba serka boso.

³⁷Si fi'é plaka no eksigié interes, si dun'é kuminda no pidié mas tantu bèk.

³⁸Mi ta SEÑOR, boso Dios, ku a saka boso for di Egipto; pa duna boso Kanaan, i pa Mi ta boso Dios.

³⁹Ora un di boso paisanonan, ku a kai den pobresa bende su mes ku boso komo sirbiente, no lag'é hasi trabou di katibu.

⁴⁰Trat'é komo un hende ku ta traha pa boso pa un salario òf komo un strañero ku ta biba serka boso. E ta keda den boso servisio te aña di hubileo.

⁴¹E aña ei e, huntu ku su yunan, ta sali for di den boso servisio. E ta bolbe serka su mes famia i ta haña su tereno di famia bèk.

⁴²Pasobra e israelitanan ta mi sirbidó. Ami a saka nan for di Egipto, p'esei no mester bende nan manera ta bende katibu.

⁴³No trata nan tampoko manera katibu. Demostrá ku boso komportashon ku boso ta respetá Ami, boso Dios.

⁴⁴Si boso mester di katibu hòmber òf muhé, kumpra nan serka e nashonnan rondó di boso.

⁴⁵Tambe boso por buska entre e strañeronan ku a bin biba den boso pais òf entre nan yunan ku a nase einan. Nan sí lo ta boso propiedat.

⁴⁶Despues boso ta laga nan komo herensia pa boso yunan, ku tin nan e ora ei komo nan propiedat. Ma ningun hende meimei di boso no mester trata su rumannan israelita nunka manera katibu.

⁴⁷Si un strañero òf un hende ku ta bibá temporalmente den boso pais bira riku i un di boso rumannan kai den asina pobresa ku e mester bende su mes komo katibu ku e strañero ei òf ku un famia dje strañero,

⁴⁸e tin derecho di por kumpra su libertat bèk. Despues di bende su mes, un di su rumannan,

⁴⁹su tio, un primu òf kualke famia yegá, por kumpr'é liber. E mes tambe por kumpra su mes liber, si e haña moda.

⁵⁰Huntu ku e hende ku a kumpr'é, e ta kalkulá e tempu entre e aña di kompra i e aña di hubileo. Ta pone e preis di libra a base di loke un obrero ta gana pa e kantidat di aña ei.

⁵¹Si falta hopi aña ainda pa aña di hubileo, e mester debolbé e kumpradó un gran parti di e plaka ku el a risibí dia el a bende su mes.

⁵²Sinembargo si falta poko aña, nan ta konta e kantidat i e ta duna e parti di plaka ku ta korespondé ku e añanan bèk.

⁵³Tanten e ta serka su shon, esaki mester trat'é komo un trahadó kontratá pa aña; wak pa e shon no trat'é manera katibu.

⁵⁴Si e no a sali liber na un di e maneranan akí, e i su yunan ta sali liber den aña di hubileo. Ami ta, SEÑOR, boso Dios.

⁵⁵Sí, e israelitanan ta mi sirbidó, nan ta mi sirbidó pasobra Ami a saka nan for di Egipto. Ami ta SEÑOR, boso Dios.