Read Papiamento Yeremías 13 Bible Online

Yeremías 13 - Papiamento bible

Yeremías 13

¹SEÑOR a bisa mi: ‘Bai kumpra un faha di lenen i faha bo sintura kuné, pero tene kuidou pa e no muha.’

²Mi a kumpra e faha manera SEÑOR a ordená i mi a mar'é na mi sintura.

³SEÑOR a bolbe papia ku mi i El a bisa:

⁴‘Bai riu Perat[32] ku e faha ku bo a kaba di kumpra i skond'é den un splet den baranka.’

⁵E ora ei mi a bai Perat i m'a skond'é.

⁶Despues di hopi tempu SEÑOR a bisa mi: ‘Bai Perat, bai buska e faha ku bo a skonde riba mi òrdu.’

⁷Mi a bolbe bai Perat na e lugá kaminda mi a skonde e faha. Ora mi a saka e faha mi a ripará ku e tabata kompletamente putrí. E no tabata sirbi pa nada.

⁸E ora ei SEÑOR a bisa mi e siguiente palabranan: ‘Di e mes manera akí mi ta laga tur e splendor, gran orguyo di Huda i Herusalèm, kaba na nada.

¹⁰E pueblo akí ta konsiderá su mes mi enemigu, nan ta nenga di skucha Mi. Nan ta sigui konsehonan tèrko di nan kurason malbado i ta kore tras di otro diosnan. Ta e diosnan akí nan ke adorá, pa nan nan ke hinka rudia. P'esei lo pasa ku mi pueblo meskos ku a pasa ku e faha, ku no a sirbi pa nada mas.

¹¹Pasobra mes pèrtá ku un faha ta mara na sintura, asin'ei Mi ker a mara Israel i Huda na Mi. Mi ta sigurá boso esei. Nan lo tabata mi pueblo, un motibu di fama, alabansa i honor pa Mi. Pero nan no a skucha Mi.’

¹²SEÑOR a manda mi bisa pueblo lo siguiente: ‘Ata loke SEÑOR, Dios di Israel, ta bisa: “Mester yena butishi ku biña!” I si nan bisa: “No ta nada nobo esei! Naturalmente mester yena butishi ku biña,”

¹³abo tin ku bisa nan ku Ami, SEÑOR, ta bai yena tur habitante di e pais akí ku biña te ora nan ta bon fuma, tantu reinan riba trono di David komo saserdotenan, profetanan i tur habitante di Herusalèm.

¹⁴E ora ei Mi ta dal nan kibra kontra otro manera butishi, mayornan kontra yu. E ora ei nan lo mira. No tin nada ku por stòp Mi di destruí nan, ni kompashon, ni duele, ni mizerikòrdia.’

¹⁵Skucha, pone atenshon, israelitanan, laga orguyo para un banda, SEÑOR ta papia ku boso!

¹⁶Duna honor na SEÑOR, boso Dios, promé ku E laga anochi sera i boso trompeká den seru pasobra skuridat ta drenta! Boso ta warda lus di un dia nobo, pero E ta hasi tur kos pretu pretu, E ta tapa tur kos ku skuridat denso.

¹⁷Si boso no ke tende, ami lo yora den silensio pa e pretenshon ei di boso. Esta amargamente lo mi yora, hopi lágrima mi wowo lo basha, si kohe boso, pueblo di Dios, prezu i bai ku boso manera trupa di bestia.

¹⁸SEÑOR a manda mi bisa rei i reina mama: ‘Baha for di boso trono i kai sinta abou, pasobra boso korona presioso a kita kai for di boso kabes.[33]

¹⁹Enemigunan a sera siudatnan na Zùit-Huda aden, niun hende no por drenta mas. Nan ta hiba tur hende di Huda den eksilio, te delaster un pipita di hende.’

²⁰Herusalèm, hisa bo wowo bo mira e enemigunan ku ta bini di nort. Kiko lo para di siudatnan di Huda? A konfia bo ku nan, komo si fuera ta un trupa di karné presioso nan tabata, i abo tabata asina orguyoso di nan!

²¹Kiko lo bo bisa si pone bo enemigunan manda riba bo, enemigunan ku abo semper a konsiderá amigu? Lo bo n' sinti doló e ora ei, manera di un muhé dunando lus?

²²Si bo puntra bo mes di kon tur e kosnan akí ta pasa bo, di kon ta hisa bo saya i violá bo, ta pa motibu di bo pikánan na granèl.

²³Habitantenan di Herusalèm, akaso un etiopiano pretu por kambia su koló, un leopardo por kita e pintá ku e ta? Naturalmente ku nò! Asina boso tampoko no por kambia, boso no por stòp ku maldat i kuminsá hasi kos bon.

²⁴SEÑOR ta plama boso manera bagas ku bientu di desierto ta bai kuné.

²⁵‘T'esei ta bo destino, Herusalèm,’ SEÑOR ta bisa, ‘t'esaki Mi a disidí pa bo, pasobra bo a lubidá riba Mi i a konfia den diosnan falsu.

²⁶P'esei Mi ta hisa bo saya te riba bo kabes i saka bo sunú pa tur hende mira.

²⁷Mi a mira bo echonan repugnante, ora b'a kometé adulterio riba seritunan i den kunuku, koriendo tras di otro diosnan, manera hòmber kayente ta kore tras di un muhé, o manera kabai ta hi hi hi tras di un yewa. Ai di bo, Herusalèm! Te ki dia bo ta keda den bo porkeria?’