Read Papiamento Yeremías 28 Bible Online

Yeremías 28 - Papiamento bible

Yeremías 28

¹Den e di sinku luna di e mes aña — tabata di kuater aña di reinado di rei Sedekías — profeta Hananías, yu di Azur di Guibeon, a bini den tèmpel serka Yeremías. Den presensia di e saserdotenan i henter pueblo el a bisa:

²‘T'esaki SEÑOR soberano, Dios di Israel, ta bisa: “Mi ta kibra yugo di rei di Babilonia.

³Denter di dos aña Mi ta trese tur kos di uso den tèmpel ku Nebukadnèsar a bai kuné Babilonia, aki bèk.

⁴Tambe lo Mi trese rei Yoyakin di Huda, yu di Yoyakim, i tur e eksiliadonan ku tabata deportá di Huda pa Babilonia, aki bèk. Pasobra Mi ta bai kibra yugo di rei di Babilonia. Marka mi palabra.” ’

⁵E ora ei profeta Yeremías a rospondé profeta Hananías pa tur saserdote i henter e pueblo den tèmpel tende:

⁶‘Mare! Dios laga ta bèrdat! Mare Dios por kumpli ku tur loke bo a anunsiá i trese e kosnan di uso den tèmpel i tur eksiliado bèk!

⁷Pero, por fabor, skucha awor loke ámi tin di bisa abo i henter pueblo:

⁸E profetanan ku a biba hopi tempu promé ku abo i ami tambe no a anunsiá hopi pais i reino nada otro sino guera, desaster i pèst.

⁹Pero un profeta ku ta anunsiá pas i prosperidat, ta un profeta di bèrdè, ora sosodé loke el a profetisá. E ora ei ta sali na kla, ku el a papia den Nòmber di SEÑOR.’

¹⁰E ora ei Hananías a kita e yugo for di lomba di Yeremías i a kibr'é.

¹¹El a bisa tur hende pará ei: ‘T'esaki SEÑOR ta bisa: “Asin'akí, denter di dos aña, Mi ta bai kibra e yugo ku rei Nebukadnèsar a pone riba lomba di tur pueblo!” ’ Despues di esei Yeremías a bai.

¹²Korto tempu despues ku Hananías a kibra e yugo ku Yeremías tabatin riba su lomba, Yeremías a haña un palabra di SEÑOR:

¹³‘Bai bisa Hananías: “SEÑOR ta manda bisa bo: Bo a kibra e yugo di palu, pero na su lugá lo bini un yugo di heru.

¹⁴Pasobra Ami, SEÑOR soberano, Dios di Israel, ta pone un yugo di heru riba lomba di tur e pueblonan akí. Nan lo mester someté nan na rei Nebukadnèsar, rei di Babilonia. Mi ta laga asta bestia feros sirbié.” ’

¹⁵Yeremías a sigui bisa Hananías: ‘Skucha bon, Hananías. No ta SEÑOR a manda bo. Bo a lanta speransa falsu den pueblo.

¹⁶P'esei SEÑOR ta bisa: “No tin lugá mas riba e mundu akí pa abo. E aña akí mes lo bo muri, pasobra bo a instigá e pueblo akí kontra Dios ku bo predikashinan.” ’

¹⁷Den e di shete luna di e mes aña ei profeta Hananías a muri.