Read Papiamento Yeremías 35 Bible Online

Yeremías 35 - Papiamento bible

Yeremías 35

¹Den tempu ku Yoyakim, yu di Yosías, tabata rei di Huda, ami, Yeremías, a haña e siguiente enkargo di SEÑOR:

²‘Bai serka e komunidat rekabita i invitá nan pa bai tèmpel ku bo. Aya bo ta hiba nan den un di e salanan i ofresé nan biña.’

³Mi a bai pues serka Yaazanías, yu di Yirmeya i ñetu di Habasinías, i mi a hiba e ku su ruman hòmbernan, tur su yunan i henter e famia dje rekabitanan

⁴tèmpel, den e sala destiná pa e alumnonan di profeta Hanan, yu di Yigdaliahu. E sala akí tabata banda di esun di e ofisialnan di tèmpel i riba e sala di Maasea, yu di Shalum. Maasea tabata na kabes di e empleadonan ku tabata vigilá portanan di tèmpel.

⁵Mi a pone labizjan di biña dilanti di e miembronan di e komunidat rekabita, duna nan beker i invitá nan pa bebe biña.

⁶Pero nan a bisa: ‘Nos no ta bebe biña. Nos antepasado Yonadab, yu di Rekab, a duna nos i nos desendientenan e òrdu permanente: “Ni boso mes ni boso desendientenan no mag bebe biña.

⁷Boso no mag traha kas tampoko, ni sembra kunuku, planta hòfi di wendrùif ni tin nan komo propiedat tampoko. Boso mester keda biba semper den tènt. E ora ei boso lo biba pa largu tempu den e pais akí, ku no ta boso pais natal.”

⁸Semper nos a sigui e òrdu di Yonadab, yu di Rekab, al pie de la letra. Nos no ta bebe biña nunka i nos kasá- i yunan tampoko.

⁹Nos no ta traha kas, pero ta biba den tènt, nos no tin hòfi di wendrùif, ni kunuku ni simia pa planta.

¹⁰Nos ta tene nos na tur loke nos antepasado Yonadab a manda nos.

¹¹Pero dia rei Nebukadnèsar di Babilonia a invadí nos pais, nos a disidí di bai Herusalèm, pa skapa di e ehérsitonan dje babilonio- i arameonan. P'esei nos ta biba awor na Herusalèm.’

¹²E ora ei SEÑOR a bisa Yeremías:

¹³‘Bai bisa pueblo di Huda i habitantenan di Herusalèm: “SEÑOR soberano, Dios di Israel, ta bisa boso: No a yega ora pa porfin boso tuma mi atvertensianan na serio i skucha loke Mi a bisa?

¹⁴Desendientenan di Yonadab, yu di Rekab, te dia djawe semper a hasi loke nan antepasado a enkargá nan, esta di no bebe biña. I enberdat niun di nan no ta bebe biña. Pero Ami a keda ripití pa boso ketu bai loke boso mester a hasi i sinembargo boso no a obedesé.

¹⁵Mi no a kansa di manda tur mi sirbidónan, e profetanan, serka boso pa atvertí boso: Kita for di boso mal kaminda, drecha boso bida, no kore tras di diosnan falsu, no adorá nan. E ora ei boso lo por keda biba den e pais akí, ku Mi a duna boso antepasadonan. Pero boso no a skucha Mi, boso no a hasi kaso na loke Mi tabata bisa boso.

¹⁶E desendientenan di Yonadab, yu di Rekab, sí a kumpli ku mandamentu di nan antepasado, pero boso, pueblo di Huda, no ta obedesé Ami.

¹⁷P'esei, Ami, SEÑOR soberano, Dios di Israel, ta anunsiá lo siguiente: Kere Mi, Mi ta bai manda pa boso, pueblo di Huda i habitantenan di Herusalèm, tur desaster, ku Mi a menasá boso kuné. Pasobra Mi a papia ku boso, pero boso no a skucha, Mi a yama boso, pero boso no a hiba ni trese.” ’

¹⁸E ora ei Yeremías a bisa e rekabitanan: ‘Ata e mensahe ku SEÑOR soberano, Dios di Israel, tin pa boso: Boso a sigui e stipulashonnan di boso antepasado Yonadab, boso a hasi tur kos ku el a ordená boso.

¹⁹P'esei Ami, SEÑOR soberano, Dios di Israel, ta primintí boso, ku semper lo tin un desendiente di Yonadab, yu di Rekab, den mi servisio.’