Read Papiamento Lamentashonnan 5 Bible Online

Lamentashonnan 5 - Papiamento bible

Lamentashonnan 5

¹Kòrda, o SEÑOR, loke a pasa nos. Wak kon nan ta brongosá nos!

²E pais, ku Bo a duna nos, den man di enemigu e ta, otro hende ta biba den nos kas.

³Nos tatanan no t'ei mas, wérfano nos ta, nos mamanan ta biuda.

⁴Asta p'e awa di bebe nos tin ku paga, e palu pa sende kandela nos mester kumpra.

⁵Nos persiguidónan ta konstantemente nos tras, nos ta morto kansá, pero nan n' ta laga nos na pas.

⁶Pa nos por tin sufisiente kuminda, nos a pidi limosna serka Egipto i Asiria.

⁷Nos grandinan — nan n' t'ei mas — a hasi piká, i awe ta nos ta karga konsekuensia.

⁸Awor katibu a bira nos shon i no tin hende pa ranka nos fo'i nan man.

⁹Pa buska kuminda nos ta riska nos bida kontra trupanan armá den desierto.

¹⁰Hamber a duna nos kayent'i kurpa, nos kurpa ta kima di keintura.

¹¹Den Herusalèm i siudatnan di Huda nan ta violá nos hende muhé- i hobensitanan.

¹²Ta kologá nos gobernantenan na nan man i no tin niun klase di rèspèt pa hende grandi mas.

¹³Yònkumannan mester púluwe na piedra di mulina, mucha hòmbernan ta kasi desmayá bou di karga di palu.

¹⁴Ansianonan no ta duna konseho mas na porta di siudat, hòmbernan mas hóben no ta toka mas.

¹⁵Nos kurason no ta kontentu, nos no ta balia mas, nos ta blo yora malai.

¹⁶No a sobra nada mas ku por ta nos orguyo. Ai di nos, nos a hasi piká!

¹⁷Si nos kurason a bira suak i enfermo, nos wowo skur di lágrima,

¹⁸ta pasobra seru di Sion ta ún solo desolashon, un lugá pa chakalnan ronkoná.

¹⁹Pero Abo, SEÑOR, Abo ta keda rei te den eternidat. Bo trono ta pará firme tur tempu.

²⁰Pakiko lo Bo lubidá nos pa semper i bandoná nos pa restu di nos bida?

²¹SEÑOR, trese nos bèk serka Bo, pa nos bolbe di bèrdè. Laga nos bida bolbe bira manera ántes!

²²O akaso Bo a rechasá nos pa semper i no ta pone un fin na bo rabia?