Read Papiamento Ezekiel 10 Bible Online

Ezekiel 10 - Papiamento bible

Ezekiel 10

¹E ora ei mi a mira riba e kupel riba kabes di e kerubinnan un kos ku tabata parse un piedra di safiro den forma di un trono. Esei tabata visibel riba e kerubinnan.

²SEÑOR a bisa e hòmber na paña di lenen: ‘Meimei di e wilnan bou di e kerubinnan tin karbon kayente. Yena bo man ku nan i plama nan riba e siudat.’ Mi a mir'é bai aya.

³Awor e kerubinnan tabata pará na banda drechi di tèmpel, ora e hòmber a bai aya; i un nubia a yena e plenchi sentral di tèmpel.

⁴E ora ei gloria di SEÑOR a lanta for di riba e kerubinnan i a bai entrada di tèmpel. E nubia a yena henter e tèmpel i e plenchi di tèmpel tabata yen di e splendor lombrante di e gloria di SEÑOR.

⁵Por a tende e batimentu di ala di e kerubinnan te riba e plenchi pafó di tèmpel. E tabata zona manera stèm di Dios Todopoderoso.

⁶Ora SEÑOR a duna e hòmber na paña di lenen enkargo pa kohe karbon kayente for di meimei di e wilnan, esaki a bai para banda di un di e wilnan.

⁷Un di e kerubinnan a kohe poko karbon kayente i a pone nan den man di e hòmber na paña di lenen. Esaki a tuma nan i a bai.

⁸Bou di e alanan di e kerubinnan tabatin algu visibel ku tabatin forma di un man di hende.

⁹Mi a mira kuater wil banda di e kerubinnan, un wil banda di kada kerubin. E wilnan tabata bria manera óniks.

¹⁰E wilnan tabata meskos i tabata parse komo si fuera den kada wil tabatin un otro wil.

¹¹Ora nan tabata move bai dilanti, nan tabata move den tur kuater direkshon sin tabatin mester di drei nan kurpa. Kaminda esun mas dilanti tabata bai, e otronan tabata siguié sin drei nan kurpa ora nan tabata move bai dilanti.

¹²Kurpa di e kerubinnan, nan lomba, man i ala, i e wilnan tambe tabata tur tapá ku wowo. Nan kada un tabatin un wil di nan mes.

¹³Mi a tende bisa ku ta wil nan tabata.

¹⁴Kada kerubin tabatin kuater kara: e promé kara tabata kara di un angel, e di dos di un hende, e di tres di un leon i e di kuater di un águila.

¹⁵E ora ei e kerubinnan a lanta. Tabata e mes sernan ku mi a mira na riu di Kebar.

¹⁶Ora e kerubinnan tabata move bai dilanti, e wilnan banda di nan tambe tabata move bai dilanti; ora nan tabata subi bai laria, e wilnan no tabata skit for di nan banda.

¹⁷Ora e sernan tabata keda para, e wilnan tambe tabata keda para, i ora e sernan tabata subi bai laria, e wilnan tambe tabata subi bai laria, pasobra e forsa den e sernan tabata dominá e wilnan tambe.

¹⁸E ora ei gloria di SEÑOR a bandoná entrada di tèmpel i El a bai para riba e kerubinnan.

¹⁹E kerubinnan a habri nan alanan i lanta nan mes mi dilanti for di suela, i e wilnan a bai ku nan. Nan a baha na e porta ost di tèmpel ku e gloria di Dios di Israel riba nan.

²⁰Tabata e mes sernan ku mi a mira bou di Dios di Israel, tempu mi tabata keda na riu di Kebar, i awor mi a komprondé ku ta kerubin nan tabata.

²¹Kada un tabatin kuater kara i kuater ala i bou di e alanan algu ku tabata parse man di hende.

²²Nan kara tabata e mesunnan ku mi a mira na riu di kebar. Kada ser tabata move règt bai dilanti.