Read Papiamento Ezekiel 12 Bible Online

Ezekiel 12 - Papiamento bible

Ezekiel 12

¹SEÑOR a dirigí palabra na mi:

²‘Hende, bo ta biba serka un pueblo rebelde. Nan tin wowo, ma nan no ta mira; nan tin orea, ma nan no ta skucha. Ta un pueblo rebelde nan ta!

³Abo, hende, paketá loke lo bo ke bai kuné komo eksiliado i bai den dia for di aki un otro lugá komo si fuera ta den eksilio bo ta bai. Sòru pa tur hende por mira bo. Podisé nan wowo habri e ora ei, pasobra nan ta un pueblo rebelde.

⁴Hiba bo ekipahe den dia pafó, di manera ku tur hende por mir'é. I bo mes sali bai tardesitu, ora bira mas fresku, di manera ku nan por mira bo. Sali komo si fuera ta den eksilio bo ta bai.

⁵Traha miéntras nan ta mira bo un buraku den muraya i pasa bo ekipahe djei manda afó.

⁶Pone bo ekipahe miéntras nan ta mira bo riba bo skouder i sali bai den sukú; tapa bo kara di manera ku bo no por mira suela; pasobra Mi ta hasi bo un señal pa e pueblo di Israel.’

⁷Mi a hasi loke a ordená mi. Den dia mi a hiba mi ekipahe pa eksilio pafó. Tardesitu mi a traha un buraku den muraya ku mi mannan. Den sukú mi a pasa mi ekipahe pafó i a disparsé ku e ekipahe riba mi skouder miéntras nan tabata mira mi.

⁸Su manisé mainta SEÑOR a dirigí palabra na mi:

⁹‘Hende, e israelitanan, e pueblo rebelde ei, sigur a puntra bo kiko bo tabata hasi!

¹⁰Bisa nan: Esaki ta loke SEÑOR Dios ta bisa: Esaki ta un mensahe di Dios pa e rei di Herusalèm i pa henter e pueblo di Israel, na kua boso tambe ta pertenesé.

¹¹Bisa: Mi ta un señal pa boso: loke mi a hasi, lo sosodé ku nan. Nan tambe ta bai den eksilio, manera prezu ta bai ku nan.

¹²E prínsipe ku ta goberná nan, lo pone su ekipahe den sukú riba su skouder i disparsé dor di un buraku ku nan ta traha p'e den muraya. Lo e tapa su kara, pasobra lo e no bolbe mira e pais mas.

¹³Lo Mi tira un nèt riba dje, koh'é i hib'é Bábel, pais di e kaldeonan. Aya lo e muri sin a mira e pais.

¹⁴Mi ta plama tur su siguidónan, su wardaespaldanan i su ehérsitonan, den tur direkshon. Lo Mi persiguí nan ku spada.

¹⁵Si Mi plama nan den pueblonan strañero, plama nan den paisnan leu, nan lo rekonosé ku t'Ami ta SEÑOR.

¹⁶Algun di nan lo Mi spar, nan lo sobrebibí guera, hamber i pèst. E ora ei serka e pueblonan kaminda nan resultá nan por konta di nan práktikanan repugnante. I eseinan tambe lo rekonosé ku t'Ami ta SEÑOR.’

¹⁷SEÑOR a dirigí palabra na mi:

¹⁸‘Hende, tembla di miedu ora bo ta kome; krem den otro di miedu i tristesa ora bo ta bebe.

¹⁹I bisa e habitantenan di e pais lo siguiente: SEÑOR Dios ta anunsiá habitantenan di Herusalèm ku ta den nan pais ainda lo siguiente: Bou di yoramentu nan ta kome pan, yen di desesperashon nan ta bebe awa. Mi ta hasi esei pa hòrta tur kos for di e pais i hasié un mondi pa motibu di e violensia di su habitantenan.

²⁰E siudatnan kaminda ainda tin hende ta biba ta keda destruí, e pais ta bira un mondi. E ora ei boso lo rekonosé ku t'Ami ta SEÑOR.’

²¹SEÑOR a dirigí palabra na mi:

²²‘Hende, di kon ta usa na Israel e dicho: “Tempu ta pasa, pero vishonnan di e profetanan no ta keda kumplí?”

²³Ami, SEÑOR Dios, lo perkurá pa nan no usa e dicho akí mas na Israel. Bisa nan: No ta dura hopi mas ku kada vishon ta bira realidat.

²⁴Lo no tin vishonnan mas i lo no tin miramentu di destino mentiroso mas na Israel.

²⁵Pasobra Ami, SEÑOR, lo papia i lo no tarda pa tur loke Mi bisa keda kumplí. Miéntras boso ta na bida ainda, pueblo rebelde, lo Mi ehekutá loke Mi a anunsiá. Esaki ta loke Ami, SEÑOR Dios, ta bisa.’

²⁶SEÑOR a dirigí palabra na mi:

²⁷‘Hende, pueblo di Israel ta bisa: “E vishon ei di dje tin di aber ku un futuro lehano; e ta profetisá pa tempunan leu den futuro.”

²⁸P'esei bisa nan: Asina SEÑOR Dios ta bisa: Lo no tarda pa kada un di mi palabranan keda kumplí. E palabra ku Mi papia lo keda kumplí awor. Esaki ta loke Ami, SEÑOR Dios, ta bisa.’