Read Papiamento Ezekiel 16 Bible Online

Ezekiel 16 - Papiamento bible

Ezekiel 16

²‘Hende, laga Herusalèm mira kon repugnante e ta aktua.

³Bo mester bisa: Esaki ta loke SEÑOR Dios ta bisa Herusalèm: Ta for di e pais Kanaan bo ta bini, aya bo a nase. Bo tata tabata un amorita, bo mama un hetita.

⁴Ora bo a nase no tabatin ningun hende ku a kòrta bo kabuya di lombrishi, ku a baña bo i hunta bo ku salu, ku a lora bo den paña.

⁵Ningun hende no tabata wòri ku bo, ningun hende no tabatin dje tantu duele di bo pa a sòru pa bo. Tur hende tabatin asko di bo; a benta bo afó den mondi.

⁶E ora ei Ami a pasa. Mi a mira bo ta sapatiá den bo sanger i Mi a bisa bo: “Biba!” Sí, miéntras bo tabata drumí den bo sanger Mi a bisa: “Biba,

⁷krese!” I Mi a laga bo krese[7] manera un flor den kunuku. Bo a krese, bira grandi, un bunita mucha muhé. Bo a haña pechu firme i bo kabei tabata krese, pero ketu bai bo tabata blo sunú.

⁸Atrobe Mi a pasa. Mi a ripará ku tempu di amor a yega pa bo. Mi a tuma bo bou di mi protekshon. Mi a tapa bo kurpa sunú. Mi a hura bo di keda fiel i a sera un aliansa ku bo. Asina bo a bira di Mi.

⁹Mi a laba kita e sanger for di bo kurpa i a hunta bo ku zeta di oleifi.

¹⁰Mi a bisti bo paña bunita bòrdá i sandalia di e kueru di mas fini. Mi a mara un lensu di kabes di lenen na bo kabes i a duna bo un mantel di tela presioso.

¹¹Mi a bisti bo hoyanan mashá bunita, armbant i un kadena.

¹²Mi a duna bo un renchi di nanishi i renchi di orea i a pone un bunita korona riba bo kabes.

¹³Bo por a dòrna bo kurpa ku oro i plata, bisti pañanan bunita bòrdá di lenen i tela presioso. Tabata prepará bo kuminda di e hariña di mas fini, ku miel i zeta di oleifi. Bo a bira mashá mashá bunita, un persona adekuá pa ta reina.

¹⁴Pa motibu di bo beyesa bo a bira famoso entre e pueblonan. Tabata un beyesa perfekto, konsekuensia di e bunitesa ku Mi a duna bo. Esaki ta loke SEÑOR Dios ta bisa.

¹⁵Pero e ora ei bo a bai konfia riba bo bunitesa i bo a usa bo fama pa bira un muhé di bida. Bo a ofresé bo enkantonan na tur hòmber ku a pasa, ku tabata ke; nan por a gosa di bo enkantonan!

¹⁶Na e lugánan di ofresé sakrifisio bo a habri bo pañanan di hopi koló pa entregá bo aya komo muhé di bida na tur hende. Nunka ántes algu asina no a yega di sosodé ni tampoko lo no sosodé nunka mas.[8]

¹⁷Di e hoyanan di oro i di plata ku Mi a duna bo, bo a traha imágennan di hende hòmber i tabata kometé aktonan inmoral ku nan.

¹⁸Bo a bisti nan bo pañanan bunita bòrdá, ofresé nan mi zeta di oleifi i mi sensia.

¹⁹Mi a duna bo kuminda: hariña fini, zeta di oleifi i miel, pero bo a pone e kosnan ei dilanti di e imágennan ei komo sakrifisionan ku un holó agradabel. Asina kos a bai. Esei ta loke SEÑOR Dios ta deklará.

²⁰“I asta e yu hòmbernan i e yu muhénan ku bo a duna Mi, bo a ofresé na e diosnan falsu komo kuminda pa nan. Bo infieldat ainda no tabata basta?

²¹Bo mester a mata mi yunan tambe pa ofresé nan na e diosnan ei?

²²Ku tur bo práktikanan repugnante i bo bida komo muhé di bida bo no a kòrda niun ratu mas riba e tempu ku bo tabata yòn, tempu bo tabata sapatiá sunú den bo sanger.

²³Mi ta keha bo”, SEÑOR Dios ta deklará. “Despues di tur e maldatnan akí

²⁴bo a traha tambe ainda un plèki pa adorá diosnan falsu i hunga muhé di bida riba tur plenchi

²⁵i na tur krusada di kaminda. Bo a benta bo bunitesa afó i a habri pia pa tur hòmber ku tabata pasa; no por a satisfasé bo!

²⁶Bo a drenta tambe ku e egipsionan, bo bisiñanan ku nan órgano seksual grandi; kada be bo a drenta ku nan pa proboká Mi.

²⁷P'esei Mi a bai kontra bo, Mi a kita un pida for di bo propiedat. Mi a entregá bo na bo enemigunan, yu muhénan di e filisteonan ku tabata sinti bèrgwensa di bo kondukta bergonsoso.

²⁸E ora ei bo a drenta ku e asirionan, komo bo no a keda satisfasé ainda; bo a drenta ku nan, i ainda bo no a keda satisfasé.

²⁹Bo a drenta ku e kaldeonan, e pueblo komersiante ei. Pero nan no por a satisfasé bo.

³⁰Kon bo por a laga bo pashon lastra bo asina? Esaki Ami, SEÑOR Dios, ta bisa: Bo a komportá bo manera un muhé di bida diplomá.

³¹Riba kada plenchi, na kada krusada bo a traha un plèki pa ofresé bo kurpa. I tòg bo no a komportá bo realmente manera un muhé di bida, pasobra bo tabata rechasá pago.

³²Abo, muhé adúltero, ku ta entregá su mes na strañero na lugá di na su mes esposo!

³³Tur muhé di bida ta aseptá pago, pero abo mes tabata paga bo amantenan i tabata lòk nan asina di tur banda serka bo pa bo drenta ku nan.

³⁴Serka bo anto tabata bai nèt kontrali ku serka otro muhénan di bida, pasobra no tabatin mester di hasi molèster pa bo: bo mes tabata duna regalo i ningun hende no tabatin mester di duna abo regalo. Asina tabata serka bo nèt robes pa drechi.”

³⁵P'esei, abo, muhé di bida, skucha loke SEÑOR ta bisa.

³⁶Ata loke SEÑOR Dios ta bisa: “Bo a humiliá bo mes, bo no tabata konosé bèrgwensa ora bo a kita sunú pa bo amantenan, ora bo a drenta ku tur e diosnan falsu i repugnante kende bo tabata ofresé asta bo mes yunan!

³⁷P'esei lo Mi trese tur e amantenan ei ku bo a laga gosa, huntu, tantu esnan ku bo tabata stima, komo esnan ku bo a haña rabia riba dje. Mi ta laga nan para rondó di bo i e ora ei lo Mi kita bo pañanan for di bo kurpa, di manera ku nan ta mira bo blo sunú.

³⁸Mi ta bai kastigá bo manera ta kastigá muhénan pa adulterio òf asesinato. Lo Mi laga bo sinti ku bo a mata, lo Mi laga bo sinti mi ira i rabia.

³⁹Lo Mi entregá bo den nan poder. Nan lo destruí bo plèkinan kaminda bo tabata adorá diosnan falsu i hunga muhé di bida, nan lo ranka bo pañanan for di bo kurpa i hòrta bo hoyanan for di bo. I bo ta keda blo sunú atras.

⁴⁰Nan lo lanta un multitut kontra bo; nan lo piedra bo i kap bo na pida pida ku nan spada.

⁴¹Nan lo pega bo kasnan na kandela i kastigá bo dilanti di numeroso muhé. Asina lo Mi pone un fin na bo inmoralidat i lo bo no ta kapas mas na duna bo amantenan regalo.

⁴²Lo Mi keda baha mi rabia riba bo, te ora mi ira plakia, Mi kalma i Mi no ta rabiá mas.

⁴³Komo nunka bo no a kòrda riba e tempu di bo hubentut, pero a lanta mi rabia ku tur e kosnan akí, p'esei lo Mi laga bo pikánan baha riba bo kabes. Pasobra banda di bo práktikanan repugnante bo a kometé e inmoralidat bergonsoso akí tambe.” Esei ta loke SEÑOR, mi Dios, ta bisa.

⁴⁴Herusalèm, si un hende mester a traha un proverbio riba bo, lo el a bisa: “Pampuna no sa pari kalbas!”

⁴⁵Bo ta un bon yu muhé di bo mama, kende tabatin asko di su esposo i yunan, i un bon ruman muhé di bo ruman muhénan ku tabatin asko di nan esposo i yunan. Boso mama tabata un hetita, boso tata un amorita.

⁴⁶Bo ruman muhé mayó ta Samaria, ku ta biba ku su yu muhénan nort di bo; bo ruman muhé di mas chikitu, ku ta biba ku su yu muhénan zùit di bo, ta Sódoma.

⁴⁷Bo no a sigui solamente den nan pasonan ni a kometé solamente mesun aktonan repugnante, pero no a tarda hopi ku bo komportashon tabata mas pió ainda ku di nan.

⁴⁸Ami, SEÑOR Dios, ta deklará lo siguiente: “Mes sigur ku Mi ta Dios bibu, bo ruman muhé Sódoma no a hasi di mas manera abo ku bo yu muhénan.

⁴⁹E piká di bo ruman muhé Sódoma tabata ku e i su yu muhénan tabata orguyoso i ku nan tabata biba den abundansia i un trankilidat negligente sin preokupá pa hende pober i den nesesidat.

⁵⁰Nan tabata sinti nan mashá kos i tabata hasi kosnan repugnante Mi dilanti. Asina Mi a mira e kos ei, Mi a kaba ku nan.

⁵¹Samaria no a hasi ni mitar di e kantidat di pikánan ku bo a hasi. Bo a hasi mas kos repugnante ku bo ruman muhénan a hasi. Kompará ku tur e kosnan repugnante ku bo a hasi, ta parse komo si fuera nan a biba un bida bon.

⁵²E bèrgwensa ei tambe bo mester karga antó, pasobra dor di bo pikánan bo a sali pa bo rumannan: bo a hasi kosnan mas repugnante ku nan a hasi i bo a laga parse ku kompará ku bo nan a biba un bida bon. Bo mester karga bo bèrgwensa i sinti bèrgwensa, pasobra bo a laga parse ku bo ruman muhénan ta inosente.

⁵³Lo Mi kambia nan suerte pa bon, suerte di Sódoma ku su yu muhénan i suerte di Samaria ku su yu muhénan. Ora Mi kambia bo suerte tambe pa bon, Mi ta hasié huntu ku esun di nan.

⁵⁴Esei lo ta un bèrgwensa pa bo i lo bo sinti bèrgwensa di tur kos ku bo a hasi i ku kual bo a kurashá nan.

⁵⁵Bo ruman muhé Sódoma ku su yu muhénan lo keda rehabilitá den nan estado di promé aya; Samaria ku su yu muhénan lo keda rehabilitá den nan estado di promé aya i abo tambe ku bo yu muhénan lo keda rehabilitá den bo estado di promé aya.

⁵⁶Den bo orguyo bo tabata papia ku despresio riba bo ruman muhé Sódoma.

⁵⁷Esei tabata promé ku a sali na kla kon mal hende bo ta. Pero awor bo ta sentro di chèrchè pa e yu muhénan di Siria, nan bisiñanan i e yu muhénan di e filisteonan; di tur banda nan ta hasi chèrchè di bo.

⁵⁸Lo bo paga pa bo komportashon bergonsoso, bo práktikanan repugnante.” Esei ta loke SEÑOR ta bisa.

⁵⁹Esaki SEÑOR Dios ta bisa: “Lo Mi duna bo loke bo meresé, Herusalèm. Bo no a atené bo na bo huramentu i bo a kibra e aliansa.

⁶⁰Pero lo Mi keda kòrda e aliansa ku Mi a sera ku bo tempu bo tabata yòn. Lo Mi sera un aliansa nobo ku bo pa semper.

⁶¹Bo ta haña bo ruman muhé mayó i bo ruman muhé di mas yòn bèk. Mi ta hasi nan bo yu muhénan, ounke no ta pa motibu di mi aliansa ku bo Mi tin e deber ei. E ora ei lo bo rekordá ku bèrgwensa loke bo a hasi.

⁶²Ora Mi sera e aliansa nobo akí ku bo, lo bo rekonosé ku t'Ami ta SEÑOR.

⁶³I ora bo rekordá kiko a pasa, di bèrgwensa lo bo no riska bisa un pia di palabra, pasobra Mi ta bai pordoná bo tur loke bo a hasi.” Esaki ta loke SEÑOR Dios ta deklará.’