Read Papiamento Ezekiel 18 Bible Online

Ezekiel 18 - Papiamento bible

Ezekiel 18

¹SEÑOR a dirigí palabra na mi:

²‘Pakiko boso ta usa e proverbio akí na Israel: “T'e tatanan a kome drùif ku no ta hechu, pero ta djente di e yunan ta kohe rel?” ’

³Esaki ta loke SEÑOR Dios ta bisa: ‘Mes sigur ku Mi ta Dios bibu, lo no usa e proverbio akí mas na Israel.

⁴Bo mester sa ku bida di kada hende ta den mi man, bida di e tata, pero tambe di e yu; ta den mi man nan bida ta. Solamente hende ku peka, ta muri.

⁵Suponé ku tin un hende ku ke biba segun mi boluntat i ku ta aktua na un manera honesto i hustu.

⁶E no ta partisipá na komementunan ritual di e israelitanan riba seritu di sakrifisio ni ta adorá nan imágennan di diosnan falsu. E no ta violá esposa di otro hende ni drumi ku un muhé ku tin su regla.

⁷E no ta oprimí ningun hende. Ora un hende a fia algu serka dje i a dun'é un pant, e ta duna e pant bèk. E no ta hòrta. Es ku tin hamber, e ta duna kuminda; es ku ta sunú, e ta duna paña di bisti.

⁸E no ta fia hende nada kontra interes ni kalkulá ganashi brutu. E no ta hasi loke ta inhustu. Ora tin diferensia di opinion e ta duna un opinion honesto.

⁹E ta aten'é na mi leinan i kumpli estriktamente ku mi reglanan. Un hende asina ta biba segun mi boluntat, lo e keda biba sigur. Esei Ami, SEÑOR Dios, ta sigurá.

¹⁰Awor por ta asina ku e hende akí tin un yu hòmber violento, ku ta kometé asesinato òf un di e pikánan akí,

¹¹ku su tata no a hasi nunka. E sí ta partisipá na e komementunan ritual riba seritu di sakrifisio. E ta violá esposa di otro hende.

¹²E ta oprimí hende pober i den nesesidat. E ta hòrta i no ta duna e pant ku el a risibí, bèk. E ta adorá e diosnan falsu. E ta hasi kosnan repugnante.

¹³E ta fia hende sèn, eksigí interes i hasi ganashi brutu. Un hende asina mag keda na bida? Nò, es ku hasi kosnan repugnante asina, mester muri sigur. Ta su mes falta ku e ta muri.

¹⁴Awor e hòmber akí mes tambe tin un yu hòmber. E yu akí ta mira e pikánan di su tata, pero no ta sigui su mal ehèmpel.

¹⁵E no ta partisipá na e komementunan ritual riba seritu di sakrifisio, ni adorá e diosnan falsu di e israelitanan. E no ta violá esposa di otro hende.

¹⁶E no ta oprimí ningun hende, ni aseptá pant ora e fia hende algu, ni hòrta. Es ku tin hamber, e ta duna kuminda; es ku ta sunú, e ta duna paña di bisti.

¹⁷E ta laga hende pober na pas, no ta aseptá interes ni hasi ganashi brutu. E ta aten'é na mi leinan i no ta violá mi reglanan. E yu hòmber akí lo no muri pa maldat di su tata. E ta keda na bida sigur.

¹⁸Pero su tata, ku tabata ranka sanger di hende, tabata hòrta su próhimo i den su pueblo no tabata hasi loke ta bon, esei sí lo muri debí na su maldat.

¹⁹Awor boso ta puntra naturalmente: “Di kon un yu hòmber tambe no ta responsabel pa e maldat di su tata?” Esaki ta e kontesta: E yu hòmber mes a biba un bida honesto i hustu. El a aten'é na mi leinan i lo keda biba sigur. Pasobra solamente esnan ku peka, lo muri.

²⁰E yu hòmber no tin mester di paga pa maldat di su tata ni e tata pa esun di su yu hòmber. Es ku ta hustu ta haña rekompensa p'esei, pero es ku ta inhustu ta haña kastigu.

²¹Pero si un hende malbado kombertí di e pikánan ku el a hasi, kumpli ku mi leinan i aktua na un manera honesto i hustu, e ta keda na bida sigur; lo e no muri.

²²No ta tene kuenta mas ku su fayonan. E ta keda na bida, pasobra e ta hasi loke ta hustu.

²³Bo ta kere ku Ami, SEÑOR Dios, ta kontentu ora un hende malbado muri? Al kontrario, Mi ta prefer'é kombertí i keda na bida.

²⁴Pero ora un hende hustu stòp di ta hustu? Ora e bai hasi kosnan inhustu i mes kosnan repugnante ku e hende malbado? Un hende asina ta keda na bida e ora ei? Nò. No ta tene kuenta ku tempu ku e tabata hasi kos hustu. Lo e muri, pasobra el a bira lomba pa Mi i a peka.

²⁵Boso ta pensa sigur: “Loke SEÑOR ta hasi, no ta korekto.” Skucha, israelitanan! No ta loke Ami ta hasi no ta korekto, pero loke boso ta hasi!

²⁶Ora un hende hustu stòp di ta hustu, ora e hasi kos inhustu i muri, e ora ei ta pa e kos inhustu ku el a hasi!

²⁷Asina tambe ora un hende malbado tin duele di su maldat i djawe padilanti biba un bida honesto i hustu, lo e keda na bida.

²⁸Su wowonan a habri i el a kombertí di su maldat. Un hende asina sigur lo no muri.

²⁹I boso, israelitanan, ta riska bisa: “Loke SEÑOR ta hasi no ta korekto!” No loke Ami ta hasi, ma loke boso ta hasi no ta korekto!

³⁰P'esei lo Mi husga kada un di boso segun su echonan, pueblo di Israel.’ Esaki ta loke SEÑOR Dios ta bisa. ‘Kombertí, bira lomba pa boso fayonan; sino nan ta bira fatal pa boso.

³¹Kibra ku e fayonan ku boso a kometé; renobá boso kurason i boso mente, pasobra pakiko boso lo muri, pueblo di Israel?

³²Mi no ta keda kontentu ku morto di un hende ku mester muri,’ SEÑOR Dios ta bisa. ‘P'esei kombertí i keda na bida!’