Read Papiamento Ezekiel 29 Bible Online

Ezekiel 29 - Papiamento bible

Ezekiel 29

¹Riba e di diesdos dia di e di dies luna den e di dies aña di nos eksilio, SEÑOR a dirigí palabra na mi:

²‘Hende, fiha bo bista riba fárao, rei di Egipto, i profetisá kontra dje i kontra henter Egipto.

³Bisa: Esaki ta loke SEÑOR, mi Dios, ta bisa: Mi ta bai tuma medida kontra bo, fárao, rei di Egipto! Abo, kaiman grandi ku ta drumi den riu Nilo, ku ta bisa: “Nilo ta di mi, pa mi m'a trah'é.”

⁴Lo Mi pega hak na bo kakumbein i laga e piskánan for di den Nilo keda pegá na bo skamanan. E ora ei Mi ta saka bo for di e riu ku tur e piskánan for di Nilo ku a keda pegá na bo skamanan,

⁵i Mi ta tira bo den desierto huntu ku tur e piskánan for di Nilo. Lo bo kai den kunuku habrí, lo no hisa bo ni kohe bo bai kuné. Mi ta laga e bestianan feros i paranan ku ta kome kadaver kome bo.

⁶Tur habitante di Egipto lo rekonosé ku t'Ami ta SEÑOR. Bo tabata manera un palu di kaña ku pueblo di Israel ker a lèn riba dje:

⁷ora nan a kohe bo tene, bo a krak, laga nan heridá nan skouder. Ora nan a lèn riba bo, bo a kibra, pone nan tambaliá.[22]

⁸P'esei,’ SEÑOR, mi Dios, ta bisa, ‘Mi ta manda guera riba bo i kaba ku hende i bestia den bo pais.

⁹Egipto ta bira un desierto, un ruina. I e egipsionan lo rekonosé ku t'Ami ta SEÑOR. Pasobra bo a bisa: “Nilo ta di mi, ta mi mes a trah'é,”

¹⁰p'esei Mi ta tuma medida kontra bo i kontra Nilo. Mi ta hasi un ruina kompleto di e pais Egipto, un desierto, for di Migdol den nort te na Siene, te na e frontera di Etiopia den zùit.

¹¹Niun hende lo no pone pia einan ni niun bestia lo no yega einan; kuarenta aña ningun hende lo no biba aya.

¹²Lo Mi hasi di e pais Egipto un desierto meimei di e paisnan destruí; su siudatnan lo ta un desierto meimei di siudatnan destruí, kuarenta aña largu; Lo Mi stroi e egipsionan bou di e pueblonan i plama nan riba e paisnan.’

¹³Esaki ta loke SEÑOR, mi Dios, ta bisa: ‘Ora e kuarenta añanan ei pasa, Mi ta buska e egipsionan bèk for di e paisnan kaminda a manda nan bai dia a kore ku nan.

¹⁴Mi ta trese kambio den nan suerte. Mi ta hiba nan Egipto ariba, nan pais di orígen. Aya nan lo forma un imperio insignifikante,

¹⁵di tur e reinonan esun di ménos balor. Nunka mas lo e no por alsa su mes riba e pueblonan. Lo Mi ten'é abou, di manera ku e no por dominá e pueblonan.

¹⁶Lo e no ta e poder mas ku e pueblo di Israel ta stèns riba dje, lo e pone nan kòrda riba e piká ku Israel a hasi ora nan a aserká Egipto pa yudansa. I e egipsionan lo rekonosé ku t'Ami ta SEÑOR, Dios.’

¹⁷Riba e promé dia di promé luna den e di bintishete aña di nos eksilio, SEÑOR a dirigí palabra na mi:

¹⁸‘Hende, ora rei Nebukadnèsar di Bábel a ataká Tiro, el a laga su ehérsito traha mashá mashá duru. Su sòldánan mester a karga karganan asina pisá, ku nan kabes a bira limpi i nan skoudernan a kaska. Pero e rei i su sòldánan no a haña rekompensa pa e bataya pisá akí.

¹⁹P'esei,’ SEÑOR, mi Dios, ta bisa: ‘Mi ta duna rei Nebukadnèsar di Bábel, Egipto. Lo e saki'é, rob'é i lastra tur rikesa bai kuné. Esei lo ta e pago pa su ehérsito.

²⁰Mi ta dun'é Egipto komo rekompensa pa e trabou ku e i su ehérsito a hasi pa Mi.’ Esei ta loke SEÑOR, mi Dios, ta bisa.

²¹‘Ora esei sosodé, lo Mi renobá forsa di e pueblo di Israel. I abo, Ezekiel, lo por papia abiertamente ku nan e ora ei. Nan lo rekonosé ku t'Ami ta SEÑOR.’