Read Papiamento Ezekiel 35 Bible Online

Ezekiel 35 - Papiamento bible

Ezekiel 35

¹SEÑOR a dirigí palabra na mi:

²‘Hende, wak den direkshon di e serunan di Seír i aktua komo profeta kontra esnan ku ta biba aya.

³Bisa nan: Esaki ta loke SEÑOR, mi Dios, ta bisa: Serunan di Seír, Mi ta lanta kontra boso. Lo Mi kastigá boso pisá i hasi di boso un desierto, un mondi.

⁴Di bo siudatnan Mi ta hasi un ruina. No ta sobra nada mas ku un desierto. E ora ei boso lo rekonosé ku t'Ami ta SEÑOR.

⁵For di ántes boso tabata enemigu di e israelitanan i boso a entregá nan na morto ku spada den tempu di nan desgrasia, tempu tabata kastigá nan pa nan pikánan.

⁶P'esei, mes sigur ku Mi ta Dios bibu,’ SEÑOR, mi Dios ta bisa, ‘lo Mi drama boso sanger; morto lo persiguí boso. Pasobra boso no a repudiá dramamentu di sanger, morto lo persiguí boso.

⁷Lo Mi hasi di serunan di Seír un desierto, un mondi, i kaba ku tur hende ku bini einan òf pasa einan.

⁸E serunan einan lo ta tapá ku kadaver; tur kaminda esnan matá ku spada lo ta bentá: riba serunan, den vayenan, den roinan.

⁹Mi ta hasi bo pa semper un desierto. Bo siudatnan lo no ta habitá mas. E ora ei boso lo rekonosé ku t'Ami ta SEÑOR.

¹⁰Boso a bisa: “E pais di e dos pueblonan ei, Israel i Huda, awor ta di nos, nos ta bai tum'é pa nos,” ounke Mi tabata biba einan.

¹¹P'esei, mes sigur ku Mi ta Dios bibu,’ SEÑOR, mi Dios, ta bisa, ‘lo Mi trata boso ku mesun rabia, envidia i odio ku boso a trata nan kuné. Lo Mi laga nan ripará ken Mi ta ora Mi kastigá boso.

¹²Boso lo rekonosé ku Ami, SEÑOR, a tende e palabranan ofensivo ku boso a papia di e serunan di Israel, ora boso a bisa: “Nan ta bandoná, a duna nos nan pa nos probechá di nan!”

¹³Bo a habri asina un boka kontra Mi i hasi bo kulpabel dor di usa palabra grandi kontra Mi. Mi a tende esei.’

¹⁴Esaki ta loke SEÑOR, mi Dios, ta bisa: ‘Lo Mi hasi un desierto di bo i henter mundu lo ta kontentu,

¹⁵meskos ku abo tabata kontentu dia a destruí pais di e pueblo Israel. Mi ta bai hasi di bo tambe un desierto. Serunan di Seír, henter Edom, ta bira un desierto. I nan lo rekonosé ku t'Ami ta SEÑOR.’