Read Papiamento Ezekiel 37 Bible Online

Ezekiel 37 - Papiamento bible

Ezekiel 37

¹SEÑOR a poderá di mi. Su spiritu a bai ku mi i a pone mi den un vaye yen di wesu.

²El a laga mi kana rondó di nan, tur kaminda den e vaye. Mashá hopi wesu mes tabata plamá tur kaminda; nan tabata seku seku.

³El a puntra mi: ‘Hende, e wesunan akí lo por a biba atrobe?’ Mi a kontestá: ‘SEÑOR, Dios, esei ta Bo so por sa!’

⁴E ora ei El a bisa: ‘Profetisá kontra e wesunan akí; bisa nan: Wesu sekunan, skucha loke SEÑOR ta bisa.

⁵Esaki Ami, SEÑOR, Dios, ta bisa: Lo Mi duna boso rosea di bida, boso lo biba atrobe.

⁶Lo Mi tapa boso ku kabuya di múskulo i karni, fura boso ku kueru i duna boso rosea di bida. Asina boso lo biba atrobe i rekonosé ku t'Ami ta SEÑOR.’

⁷Mi a profetisá manera a enkargá mi. I asina mi a kuminsá, por a tende un zonido: e wesunan a kuminsá move i a pega na otro, kada un na su lugá.

⁸Mi a mira kon nan a keda tapá ku kabuya di múskulo i karni, i a keda furá ku kueru. Pero ainda no tabatin bida den nan.

⁹E ora ei El a bisa mi: ‘Papia ku rosea di bida, hende, profetisá i bisa rosea di bida: Esaki ta loke SEÑOR, mi Dios, ta bisa: Bin for di e kuater direkshonnan di bientu i supla den e kurpanan matá akí, di manera ku nan ta biba atrobe.’

¹⁰Mi a profetisá manera a enkargá mi i rosea di bida a drenta nan. Nan a biba atrobe i a lanta para; tabata un ehérsito demasiado grandi.

¹¹El a sigui bisa mi: ‘Hende, e wesunan akí ta representá pueblo di Israel. Pasobra e israelitanan ta pretendé: Nos wesunan a seka, nos no tin niun tiki speransa mas, tur kos a kaba pa nos.

¹²P'esei profetisá i bisa nan: Esaki ta loke SEÑOR, mi Dios, ta bisa: Mi pueblo, lo Mi kibra boso grafnan habri. Mi ta saka boso for di e graf di eksilio i hiba boso Israel, boso mes pais, bèk.

¹³Ora Mi hasi esei, boso lo rekonosé ku t'Ami ta SEÑOR.

¹⁴Mi ta duna boso mi Spiritu i boso lo biba atrobe. I lo Mi laga boso biba den boso mes pais atrobe. E ora ei boso lo rekonosé ku t'Ami ta SEÑOR. Ami a bisa i Ami a hasi.’ Esei ta loke SEÑOR ta bisa.

¹⁵SEÑOR a dirigí palabra na mi:

¹⁶‘Hende, kohe pida palu i skibi riba dje: “Huda i e israelitanan ku ta pertenesé n'e.” Kohe despues un di dos pida palu i skibi ei riba: “Jozef (esei ta Efraim) i henter Israel ku ta pertenesé n'e.”

¹⁷Tene e dos pida palunan despues di tal manera kontra otro ku na moda di bisa ta ún pida palu bo tin den bo man.

¹⁸Si bo kompatriotanan puntra: “Splika nos kiko bo ke men ku esaki”,

¹⁹bisa nan e ora ei: Esaki ta loke SEÑOR, mi Dios, ta bisa: Lo Mi kohe e pida palu di Jozef (esei ta Efraim) i e tribunan di Israel ku ta pertenesé n'e, i pon'é kontra e pida palu di Huda. Mi ta hasi di e dos pidanan ún pida palu, di manera ku nan ta ún pida palu den mi man.

²⁰Tene e dos pidanan ku bo a skibi ariba di tal manera ku tur hende por mira nan.

²¹Bisa nan e ora ei: Esaki ta loke SEÑOR, mi Dios, ta bisa: Lo Mi bai buska e israelitanan serka e pueblonan kaminda nan a resultá. Di tur banda lo Mi trese nan bèk atrobe den nan mes pais.

²²Aya, riba serunan di Israel, Mi ta hasi ún pueblo di nan, i ún rei lo goberná riba tur israelita. Nan lo no ta dos pueblo mas, dos reino separá.

²³Nan lo no hasi nan mes impuru mas ku nan diosnan falsu, nan práktikanan repugnante i nan fayonan. Lo Mi libra nan di tur infidelidat ku nan a kometé,[26] i purifiká nan. Nan lo ta mi pueblo i Ami nan Dios.

²⁴I mi sirbidó David lo ta rei riba nan: ún wardadó pa tur karné. E ora ei nan lo kumpli ku mi mandamentunan i tene nan kuidadosamente na mi leinan.

²⁵Nan i tambe nan yunan i nan ñetunan lo biba pa semper den e pais ku Mi a duna mi sirbidó Yakob, aya kaminda nan antepasadonan tambe a biba. Mi sirbidó David lo ta pa semper nan gobernadó.

²⁶Lo Mi sera un aliansa ku nan ku ta trese pas pa nan, un aliansa pa semper. Lo Mi laga nan biba einan i hasi nan numeroso i pone mi santuario pa semper meimei di nan.

²⁷Serka nan lo Mi biba; Ami lo ta nan Dios i nan lo ta mi pueblo.

²⁸Si mi santuario ta pa semper meimei di nan, e otro pueblonan lo rekonosé ku t'Ami ta SEÑOR, ku a konsagrá Israel n'E.’