Read Papiamento Ezekiel 46 Bible Online

Ezekiel 46 - Papiamento bible

Ezekiel 46

¹Esaki ta loke SEÑOR, mi Dios, ta bisa: ‘E porta na parti ost di e plenchi parti paden mester keda será riba e seis dianan di trabou; solamente riba sabat i riba dia di luna nobo mag habrié.

²Riba e dianan ei e gobernante ta bini for di e plenchi parti pafó i drenta e edifisio di entrada via di e hal. Miéntras e saserdotenan ta ofresé sakrifisionan di kandela i di pas p'e, e ta keda para den porta. Despues e ta hinka rudia riba e drempi pa adorá Ami, SEÑOR, kaba e ta bolbe bai pafó. No ta sera e porta promé ku bira anochi.

³Riba e dianan ei e pueblo tambe ta hinka rudia, na entrada di e porta ei, pa adorá Mi.

⁴E sakrifisio di kandela ku e gobernante mester ofresé Mi riba sabat, mester konsistí di seis lamchi di karné i un chubat'i karné, bestianan sin niun defekto.

⁵Huntu ku e chubat'i karné e mester hasi un ofrenda vegetal di mas ku binti kilo di hariña, huntu ku e lamchinan mes tantu ku e ke duna. Na kada binti kilo di hariña e mester añadí shete liter i mei di zeta.

⁶Riba dia di luna nobo su sakrifisio ta konsistí di un toro yòn, seis lamchi di karné i un chubat'i karné, bestianan sin niun defekto.

⁷Huntu ku e toro i e chubat'i karné e mester hasi un ofrenda vegetal di mas ku binti kilo, huntu ku e lamchinan mes tantu ku e ke duna. Na kada binti kilo di hariña e mester añadí shete liter i mei di zeta.

⁸Si e gobernante drenta e edifisio di entrada, e mester pasa e ora ei via di e hal i bandoná e edifisio di e mesun kaminda.

⁹Pero si e pueblo drenta e dianan di fiesta pa hinka rudia adorá Mi, e ora ei esnan ku a bini via di e edifisio di entrada na parti nort mester sali di e edifisio di entrada na parti zùit, i esnan ku a bini via di e edifisio di entrada na parti zùit mester sali di e edifisio di entrada na parti nort. Ningun hende no mag sali via di e porta ku el a drenta, tur hende mester usa e porta ku tin règt su dilanti.

¹⁰E gobernante ta drenta i sali pareu ku e pueblo.

¹¹Riba dianan di fiesta i ora di reunionnan solèm mester hasi un ofrenda vegetal di mas ku binti kilo huntu ku kada toro i kada chubat'i karné ku keda sakrifiká, huntu ku e karnénan mes tantu ku e hende ke duna. Na kada binti kilo mester añadí shete liter i mei di zeta.

¹²Si e gobernante ke ofresé Mi un sakrifisio di kandela òf di pas komo un sakrifisio boluntario, mester habri e porta na parti ost p'e. E ta ofresé su sakrifisionan e ora ei manera e ta hasi riba sabat tambe. Asina e sali atrobe ta sera e porta.

¹³Tur mainta bo mester ofresé Mi un lamchi di karné di un aña, sin niun defekto, komo sakrifisio di kandela.

¹⁴Aserka ta bini un ofrenda vegetal di mas ku tres kilo i mei di hariña i dos liter i mei di zeta pa meskla aden. Preskripshonnan pa e ofrenda vegetal akí na mi honor ta keda semper na vigor.

¹⁵Ke men anto ku tur mainta mester ofresé Mi un lamchi di karné ku hariña i zeta komo sakrifisio di kandela di tur dia.’

¹⁶Esaki ta loke SEÑOR, mi Dios, ta bisa: ‘Si e gobernante duna un di su yu hòmbernan un pida di su tereno, e ora ei e pida tereno ei ta bira propiedat di e yu ei pa semper; e ta keda propiedat di desendientenan di e yu hòmber ei.

¹⁷Pero si e gobernante duna un di su sirbidónan un pida di su tereno, esei mag keda kuné te e aña di su liberashon. E ora ei e tereno ta bolbe bira di e gobernante; e tereno ta keda propiedat di e gobernante i su desendientenan.

¹⁸E gobernante no mag kita tereno for di e pueblo ku violensia. E mester laga su yu hòmbernan heredá for di su mes propiedatnan, di manera ku no ta kore ku ningun hende di mi pueblo for di propiedat di su famia.’

¹⁹Despues e hòmber a hiba mi via di e entrada na banda di e edifisio di entrada, e kuartunan sagrado ku kara pa nort destiná pa saserdotenan. Patras di e kuartunan akí mi a mira na banda wèst un lugá apart.

²⁰El a bisa: ‘Aki e saserdotenan ta herebé sakrifisio di debe i sakrifisio pa pordon di piká, aki nan ta hasa ofrenda vegetal. Asina nan no tin nodi di pasa ku nan riba e plenchi ku tin parti pafó ni trese e pueblo den kontakto ku e kosnan sagrado akí.’

²¹El a bai ku mi riba e plenchi parti pafó i a pasa ku mi banda di e kuater skinanan di e plenchi. Den kada skina tabatin un lugá será.

²²Tur e kuater lugánan tabatin mesun midí: binti pa diessinku meter.

²³Rondó di tur tabatin un muraya abou; rònt na parti paden tabatin lugánan di kandela.

²⁴El a bisa mi: ‘Esakinan ta e kushinanan kaminda e sirbidónan di tèmpel ta herebé karni di e bestianan ku e pueblo trese pa ofresé komo sakrifisio.’