Read Papiamento Daniel 2 Bible Online

Daniel 2 - Papiamento bible

Daniel 2

¹Den e di dos aña ku Nebukadnèsar tabata rei, un anochi e tabatin un soño, ku a preokup'é asina tantu, ku e no por a drumi mas.

²P'esei el a ordená pa yama su miradónan di destino, eksorsistanan, montadónan i magonan pa splik'é e soño. Ora nan a bin para su dilanti,

³el a bisa nan: ‘Mi a soña un soño ku a keda preokupá mi mashá tantu. Mi ke sa kiko e ta nifiká.’

⁴Nan a kontest'é na arameo:[2] ‘Mare su mahestat por biba pa semper! Nos ta na shon rei su òrdu. Konta nos e soño i nos ta duna shon rei e splikashon.’

⁵Rei a bisa nan: ‘Mi a tuma un desishon. Si boso no konta mi e soño i duna mi e splikashon, mi ta laga kap boso na pida pida i hasi di boso kas un ruina.

⁶Pero si boso por, mi ta rekompensá boso rikamente i duna boso un homenahe. Asina ta, konta mi e soño i duna mi e splikashon tambe.’

⁷Nan a ripití: ‘Konta nos e soño i nos ta duna shon rei e splikashon.’

⁸El a kontestá: ‘Mi ta komprondé bon bon ku boso ta buska moda di gana tempu, pasobra boso a ripará ku ya mi a tuma mi desishon.

⁹Si boso no por konta mi e soño i duna mi e splikashon, boso tur ta haña e mesun kastigu. Boso a palabrá pa gaña mi kiko ku ta te ora e peliger pasa. P'esei mi ke pa boso konta mi e soño promé, e ora ei mi ta sigur ku boso por duna mi e splikashon.’

¹⁰E magonan a kontestá rei: ‘No tin ningun hende riba mundu ku por hasi loke shon rei ta pidi. Ta p'esei nunka niun rei, kon grandi òf poderoso ku e por tabata, no a yega di pidi un miradó di destino, un eksorsista òf un mago algu asina.

¹¹Loke rei ta pidi ta muchu difísil. Ningun hende no por hasié, solamente e diosnan, pero nan no ta biba serka hende.’

¹²Rei a rabia mashá tantu mes pa e kos akí i a duna òrdu pa mata tur e sabionan di Babilonia.

¹³Ora e dekreto pa mata tur e sabionan a sali, Daniel i su amigunan tambe tabata kore riesgo ku ta mata nan.

¹⁴P'esei Daniel a bai serka Ariok, ofisial di guardia personal di rei, ku tabata enkargá ku ehekushon di tur e sabionan di Babilonia. Ku palabranan bon skohí,

¹⁵el a puntra Ariok pakiko rei a saka un dekreto asina severo. Ariok a konta Daniel e ora ei loke a pasa.

¹⁶Daniel a bai serka rei i a pidié mas tempu pa e por splika rei e soño.

¹⁷Despues el a bai kas i a konta su amigunan Hananías, Mishael i Azarías tur kos.

¹⁸El a bisa nan: ‘Resa, pidi Dios di shelu pa E tene mizerikòrdia ku nos. PidiÉ revelá nos e misterio akí, sino nan ta mata nos huntu ku e otro sabionan di Babilonia.’

¹⁹E mes anochi ei Daniel a haña revelashon di e misterio den un vishon.

²⁰El a alabá Dios di shelu ku e palabranan akí: ‘Dios ta doño di tur sabiduria i poder, alab'É te den tur eternidat!

²¹E ta maestro di tempu i di historia. E ta pone reinan riba trono i ta baha nan atrobe. E ta duna hende sabí sabiduria i hende inteligente inteligensia.

²²E ta revelá loke ta profundamente skondí. E konosé loke ta tapá bou di skuridat, serka djE tur kos ta lus.

²³Abo, o Dios di mi antepasadonan, mi ta alabá i glorifiká. Sabiduria i poder Bo a duna mi. Nos orashon Bo a skucha. Loke rei a pidi, Bo a revelá mi.’

²⁴Despues Daniel a bai serka Ariok, ku a haña enkargo pa mata e sabionan di Babilonia. Asina el a yega serka dje, el a bis'é: ‘No mata e sabionan! Hiba mi serka rei i mi ta dun'é splikashon di e soño.’

²⁵Sin pèrdè tempu Ariok a hiba Daniel serka rei i bis'é: ‘Mi a haña un hòmber entre e hendenan deportá di Huda ku por duna rei e splikashon.’

²⁶Rei a puntra Daniel, tambe yamá Belteshasar: ‘Ta bèrdat ku bo por konta mi loke mi a mira den mi soño i duna mi e splikashon?’

²⁷Daniel a kontestá rei: ‘Shon rei ta pidi algu ku ningun sabio ni eksorsista ni miradó di destino ni astrólogo no por.

²⁸Pero tin un Dios den shelu ku ta revelá loke ta skondí. T'E t'Esun ku a duna rei di konosé loke ta bai pasa den futuro. Wèl, ata loke rei a mira pasa rei su dilanti den soño:

²⁹Ora rei tabata riba kama, rei a kuminsá pensa riba futuro i Esun ku ta revelá loke ta skondí, a laga rei mira loke ta bai pasa.

³⁰El a revelá ami e misterio akí, no pasobra mi ta mas sabí ku tur otro hende, pero pa mi duna shon rei e splikashon, pa shon rei por haña aklarashon di loke ta preokupá shon rei asina tantu.

³¹Den e vishon, mahestat, bo a mira un estatua mashá grandi, su splendor tabata ekstraordinario. E tabata pará bo dilanti, su aspekto tabata spantoso.

³²Kabes di e estatua tabata di oro puru, su pechu i su brasanan tabata di plata, su barika i su hepnan tabata di bròns.

³³Su palu di pianan tabata di heru, un parti di su pianan tabata di heru i e otro parti tabata di klei.

³⁴Miéntras su mahestat tabata mira e estatua, un piedra a lòs for di den seru, sin ku man di hende a mishi kuné. E piedra a dal e pianan di heru i klei, garna nan.

³⁵Mesora henter e estatua a kibra na filingrana; e heru, e klei, e bròns, e plata i e oro a keda manera bagas ku bientu ta karga bai kuné, ora bati maishi den tempu di kosecha. No a sobra nada. Pero e piedra ku a dal e estatua a bira un seru grandi, ku a tapa henter mundu.

³⁶Esaki tabata e soño i awor shon rei ta haña e splikashon.

³⁷Abo, mahestat, ta mas grandi ku tur rei. Dios di shelu a hasi bo rei. El a duna bo poder, forsa i honor.

³⁸El a entregá hende, unda ku nan por ta biba, bestia na tera i para den laria, den bo man. El a pone nan tur bou di bo dominio. Shon rei, t'abo ta e kabes di oro!

³⁹Despues di bo reino lo tin un otro, ménos impreshonante ku di bo, despues un di tres reino, un di bròns, ku lo goberná henter mundu.

⁴⁰E di kuater reino lo ta fuerte manera heru; manera heru ta garna, machiká i destruí, asina e reino akí lo garna i destruí tur esunnan anterior.

⁴¹Tambe bo a mira ku un parti di e pianan i tenchinan tabata di klei i e otro parti di heru. Esaki ta nifiká ku lo no tin union den e reino. Lo e tin algu di forsa di heru sí, pasobra tabatin heru mesklá ku klei.

⁴²E tenchinan, un parti di heru i e otro parti di klei, ta nifiká ku un parti di e reino lo ta fuerte i e otro lo ta débil.

⁴³E heru mesklá ku klei, ta nifiká ku nan lo trata di uni e dos partinan pa medio di matrimonio, pero meskos ku heru no ta meskla ku klei, asina nan tampoko lo no logra uni.

⁴⁴Ma den e tempu di e reinan ei, Dios di shelu lo establesé un reino ku lo no kaba nunka te den eternidat. Nunka lo e no bai bou di dominio di ningun nashon. Lo e destruí tur e reinonan anterior, kaba ku nan, pero e reino ei mes lo keda pa semper.

⁴⁵Esei ta nifikashon di e piedra ku bo a mira lòs for di den seru, sin ku man di hende a mishi kuné i ku bo a mira destruí e heru, e bròns, e klei, e plata i e oro. Di e manera akí gran Dios a duna shon rei di konosé kiko ta bai pasa den futuro. E soño ta sierto i shon rei por konfia e splikashon.’

⁴⁶Nebukadnèsar a bùig te na suela pa Daniel i a ordená pa honr'é ku sensia i otro sakrifisio.

⁴⁷El a bisa Daniel: ‘Enberdat, bo Dios ta Dios riba tur dios i rei riba tur rei i E ta revelá loke ta skondí. Ta p'esei bo por a splika e soño akí.’

⁴⁸El a honra Daniel i a kolm'é ku regalo. Daniel a haña mando riba henter provinsia Babilonia i rei a nombr'é kabes di tur e sabionan di Babilonia.

⁴⁹Riba su petishon rei a enkargá Shadrak, Meshak i Abed-Nego ku gobernashon di e provinsia Babilonia, miéntras Daniel a keda na palasio di rei.