Read Papiamento Hoséas 3 Bible Online

Hoséas 3 - Papiamento bible

Hoséas 3

¹SEÑOR a bisa mi: ‘Bai stima e muhé atrobe ku un otro hòmber ta stima i ku ta kometé adulterio. Pasobra asina e israelitanan, ku Ami, SEÑOR, ta stima, ta enfoká riba otro dios i ta adorá nan ku kuki di rasenchi.’

²E ora ei mi a kumpr'é liber pa 15 moneda di plata i 330 liter di sebada

³i mi a bis'é: ‘Awor lo bo keda hopi tempu serka mi; lo bo no por ta infiel ni por drumi ku ningun hòmber. I ami lo ta fiel na bo.’[10]

⁴Pasobra e israelitanan lo keda hopi tempu sin rei i sin gobernante, sin sakrifisio i sin piedra sagrado, sin frèskòt saserdotal i sin dios di kas.

⁵Despues di esei e israelitanan lo kombertí. Nan lo enfoká riba SEÑOR i riba nan rei for di famia di David. Na fin di tempu nan lo akudí yen di rèspèt na SEÑOR i na e bondatnan ku E ta duna.