Read Papiamento Hoséas 8 Bible Online

Hoséas 8 - Papiamento bible

Hoséas 8

¹SEÑOR ta bisa: ‘Supla kachu, bati alarma! Manera un águila e enemigu ta zueif riba mi pueblo, pasobra nan a kibra mi aliansa i a rebeldiá kontra mi leinan.

²Nan ta grita bisa Mi: “Mi Dios! Nos, Israel, ta rekonosé Bo!”

³Pero un Israel, ku ta pusha loke ta bon fo'i su kurpa, un enemigu lo persiguié.

⁴Nan a nombra reinan, pero sin konsultá Mi; nan a skohe lidernan pa nan mes, pero sin ku Mi tabata sa. Di nan plata i oro nan a traha imágen di diosnan falsu, bon pa keda destruí.

⁵Samaria, bo toro yòn di oro ta repugnante! Mi a bira furioso riba e habitantenan di Samaria. Ta kuantu tempu mas falta promé nan lo por bira puru?

⁶E imágen di toro ei, n' ta for di Israel e ta bini? Un artesano a trah'é, pero e n' ta un dios! Di e imágen di toro ei for di Samaria, lo traha puiru!

⁷Nan ta sembra bientu, i nan lo kosechá tempestat. Tapushi ku no ta saka pipita, no por produsí hariña; si nan produsí algu mes, strañeronan lo gulié.

⁸Ta guli Israel. E pueblonan ta wak Israel ku despresio, manera ta wak potoshi ku ningun hende no ke mas,

⁹pasobra nan a sali bai Asiria. Un buriku di mondi ta keda serka su pareunan, pero Efraim ta kumpra amante ku regalo.

¹⁰I ounke nan ta haña amante entre e pueblonan, Ami lo hasi kuenta ku nan awor akí. Pronto nan lo krem den otro, kana doblá bou di e karga di e rei mas poderoso.

¹¹Sí, Efraim a hasi su altánan numeroso, pero nan a sirbi pa hasi piká, altánan pa hasi piká!

¹²Maske kuantu bia Mi preskribí nan mi leinan, nan ta konsiderá nan leinan di un strañero.

¹³Nan ta ofresé sakrifisio, kome e karni, pero Ami, SEÑOR, nan no ta agradá. Mi no ta lubidá nan maldat, Mi ta kastigá nan pikánan: nan ta bai Egipto bèk!

¹⁴Israel a lubidá ken a trah'é, el a konstruí palasio, i Huda tambe a konstruí hopi siudat reforsá. Kandela lo mi manda riba nan siudatnan, vlamnan lo destruí su fòrtinan.’