Read Papiamento Yoel 1 Bible Online

Yoel 1 - Papiamento bible

Yoel 1

¹Esaki ta palabranan di SEÑOR dirigí na Yoel, yu hòmber di Petuel.

²Skucha mi, ansianonan, habri orea, habitantenan di Huda: Algu asina a yega di sosodé den boso bida òf den tempu di boso antepasadonan?

³Konta boso yunan e kos akí, i laga boso yunan konta nan yunan, i eseinan atrobe konta nan yunan:

⁴Dalakochi a baha riba kunukunan, trupa tras di trupa. Loke esun trupa a laga, e otro a fretu; nada no a sobra.

⁵Lanta fo'i soño, burachénan, i yora, keha, boso tur, bebedónan di biña: sin drùif lo no tin biña nobo pa boso!

⁶Un ehérsito di dalakochi, fuerte i numeroso, a invadí mi pais; nan djentenan i nan kakumbeinnan, ta manera di leon.

⁷Nos matanan di wendrùif ta keda destruí, nos palunan di figo ikou; asta e kaska nan a kome kita afó, e ta plamá tur kaminda, e takinan a keda blanku blanku.

⁸Sea tristu, mi pueblo, manera un muhé yòn ta bisti rou pa e hòmber ku e tabata bai kasa kuné.

⁹No tin hariña mas, ni biña, pa ofresé SEÑOR den tèmpel; e saserdotenan, ku ta sirbi SEÑOR, ta tristu.

¹⁰Kunukunan a keda destruí, tera ta na luto den tristesa. A destruí e grano, drùifnan a para seka, zeta di oleifi a disparsé.

¹¹Sinti boso destrosá, kunukeronan, lamentá, plantadónan di wendrùif: no tin trigo, no tin sebada, pasobra kosecha a bai pèrdí.

¹²E mata di wendrùif a marchitá, e palu di figo a seka. Granatapel, palu di dadel, palu di aprikòt, tur palu di fruta a seka. Sí, legria di hende a kaba na nada.

¹³Bisti boso paña di rou i sea tristu, saserdotenan, lamentá, boso ku ta hasi sirbishi na altá, bisti boso paña di rou asta anochi, boso ku ta sirbi mi Dios: no tin grano ni biña pa ofresé boso Dios den tèmpel.

¹⁴Proklamá un tempu di yuna, yama un reunion solèm, reuní ansianonan, reuní tur habitante di pais, den tèmpel di SEÑOR, boso Dios, i pidi SEÑOR yudansa.

¹⁵Un kos ta warda nos awor ku dia di SEÑOR ta yega serka! E ta bini ku destrukshon, mandá pa Todopoderoso.

¹⁶A destruí nos kuminda nos dilanti, legria i kantamentu a disparsé for di tèmpel di nos Dios.

¹⁷Simia ta seka den tera, mangasina di grano i depósitonan ta dekaí, pasobra no tin grano mas.

¹⁸Tende e bestianan grita, nan ta dualu rònt, pasobra no tin yerba mas pa kome; asta e karnénan i kabritunan ta sufri.

¹⁹Abo mi ta invoká, SEÑOR, pasobra kunukunan di yerba a kima seka, palunan a kima.

²⁰Asta e bestianan di mondi ta invoká Bo, pasobra tur roi ta seku, kunukunan di yerba a kima seka.