Read Papiamento Yonas 3 Bible Online

Yonas 3 - Papiamento bible

Yonas 3

¹Pa di dos bia Yonas a risibí un mensahe di SEÑOR:

²‘Lanta bo bai e stat grandi Nínive i prediká loke Mi ta bisa bo.’

³Yonas a hasi manera SEÑOR a bis'é i el a sali pa Nínive. Nínive tabata un stat asina grandi ku tabata tuma tres dia pa bo pasa dor di dje.

⁴Yonas a drenta stat i el a kana un dia largu; el a bisa e hendenan na bos altu: ‘Aki kuarenta dia SEÑOR lo destruí Nínive.’

⁵E hendenan a kere Dios su mensahe, nan a anunsiá pa grandi i chikí yuna i nan a bisti pañanan di saku komo penitensia.

⁶Ora e rei di Nínive a tende e notisia, el a lanta for di su trono, kita su mantel di rei, bisti un paña di saku i a sinta abou na suela.

⁷Riba òrdu di rei i su ministernan nan a bisa e hendenan di e stat: ‘Niun hende no mag kome ni bebe nada. No laga bestianan, ni baka, ni karné, kome yerba ni bebe awa tampoko.

⁸Tur mester bisti paña di saku, hende i bestia, i sklama na Dios di henter nan kurason. Tur hende mester kita for di mal kaminda i stòp di kometé violensia.

⁹Podisé Dios por haña duele, kambia di idea i lubidá su rabia, i lo nos keda na bida.’

¹⁰Ora Dios a weta kiko e hendenan di Nínive tabata hasi, kon nan a kita for di mal kaminda, a duel Dios ku El a menasá di hasi nan daño i E no a hasié mas.