Read Papiamento Yonas 4 Bible Online

Yonas 4 - Papiamento bible

Yonas 4

¹Yonas a keda mashá malkontentu ku Dios su desishon i el a rabia mashá.

²El a resa na SEÑOR: ‘SEÑOR, mi por a pensa e kos akí for di dia mi tabata na mi pais. Ta pa evitá esaki, promé mi ta ker a hui bai Tarsis, pasobra mi tabata sa ku Bo ta un Dios yen di ternura i mizerikòrdia, ku no ta rabia lihé. Bo ta yen di amor. Bo ta menasá ku kastigu, haña duele i pordoná.

³P'esei, SEÑOR, kita mi bida. Mihó mi muri ku mi sigui biba.’

⁴Pero SEÑOR a bisa: ‘Bo ta haña bo tin derechi di rabia asina?’

⁵Yonas ya a sali for di e stat. Na ost di e stat el a traha un ramada i a kai sinta den e sombra pa wak kiko ta bai pasa ku e stat.

⁶SEÑOR Dios a perkurá pa un mata di karpata[3] krese bira asina altu ku Yonas su kabes tabata den fresku. Asina su beis a drecha. Yonas tabata mashá kontentu ku e mata.

⁷Pero su manisé, ora di dia a habri, Dios a laga un bichi kome rais di e mata i esaki a muri.

⁸Asina solo a sali Dios a sòru pa un bientu kayente supla for di ost. Solo tabata kima riba Yonas su kabes. E tabata serka di bai flou i ker a muri. El a bisa: ‘Mihó mi muri ku mi sigui biba.’

⁹E ora ei Dios a puntr'é: ‘Bo tin derechi di rabia asina pasobra e mata a muri?’ Yonas a kontestá: ‘Sigur mi tin derechi, mi por muri di rabia.’

¹⁰E ora ei SEÑOR a bisa: ‘Bo ker a spar e mata ku no ta abo a planta ni ta abo a lag'é krese; den un anochi el a spreit i e otro anochi el a muri.

¹¹Ami lo no tin mas rason anto di ke spar Nínive, e stat grandi, kaminda tin mas di shentibinti mil hende ku no por distinguí kiko ta drechi i kiko ta robes; sin konta tur e bestianan?’