Read Papiamento Numbernan 16 Bible Online

Numbernan 16 - Papiamento bible

Numbernan 16

¹E levita Korag, yu di Yishar, for di famia di Kehat, a lanta kontra Moises. Tambe Datan i Abiram, yu di Eliab, i On, yu di Pèlèt, miembro for di tribu di Ruben. Nan tabatin sosten di 250 otro israelita; tur tabata hefe di e komunidat i lider prominente.

³Huntu nan a bai serka Moises ku Aaron i a bisa nan: ‘Boso ta hasi di mas! Ta henter e pueblo ta konsagrá na SEÑOR i E ta meimei di nos tur. Di kon antó boso ta alsa boso mes riba e pueblo di Dios?’

⁴Ora Moises a tende e kos akí, el a kai na rudia resa.

⁵Despues Moises a bisa Korag ku su kompañeronan: ‘Mañan SEÑOR lo anunsiá ken ta pertenesé n'E, ken ta konsagrá i asina mag yega serka djE. Esun ku E skohe lo E laga yega serka djE.

⁶Ata loke abo, Korag, ku tur bo kompañeronan mester hasi. Mañan boso ta kohe panchi di kandela

⁷pone karbon sendé aden i riba e karbon sensia, kaba pone nan den santuario. E hòmber ku SEÑOR skohe t'esun konsagrá. Boso ta hasi di mas, levitanan!’

⁸Moises a bisa Korag: ‘Skucha, levitanan!

⁹N' ta basta ku SEÑOR, Dios di Israel, a apartá boso pa boso por yega serka djE, hasi trabou den su tènt i para na servisio di e pueblo?

¹⁰E tarea ei El a duna abo, Korag, i tur e otro desendientenan di Levi. Awor boso ta eksigí saserdosio tambe?

¹¹Boso ta keha kontra Aaron, pero en realidat ta kontra SEÑOR mes boso ta lanta.’

¹²Moises a laga yama Datan ku Abiram, yu di Eliab. Pero nan a kontestá: ‘Nos no ta bini!

¹³No ta basta tristu ku bo a saka nos for di un pais ku ta mana lechi i miel pa bin laga nos muri den desierto? Akaso awor bo ke goberná nos tambe?

¹⁴Sigur ta ku bo no a trese nos un pais ku ta mana lechi i miel i bo no a duna nos kunuku i hòfi di wendrùif tampoko! Anto bo ta kere ku ainda bo por gaña nos mas kos? Nos no ta bini!’

¹⁵Moises a rabia mashá pa e kos ei i el a bisa SEÑOR: ‘No hasi kaso di nan ofrenda vegetal. Mi no a kita nan buriku, ni a trata niun di nan inhustamente.’

¹⁶Moises a bisa Korag: ‘Presentá mañan ku tur bo kompañeronan huntu ku Aaron dilanti di SEÑOR.

¹⁷Laga kada un di bo 250 kompañeronan kohe su panchi di kandela, pone karbon sendé aden i riba e karbon, sensia. Abo ku Aaron tambe mester hasié.’

¹⁸E dia siguiente tur a kohe nan panchi di kandela, pone karbon sendé aden i riba e kandela, sensia i nan a bai para ku Moises i Aaron na entrada di tènt di enkuentro.

¹⁹Ora Korag a pone henter e komunidat ku tabata kontra Moises ku Aaron, para nan dilanti na entrada di tènt di enkuentro, SEÑOR su gran splendor a aparesé.

²⁰SEÑOR a bisa Moises ku Aaron:

²¹‘Bai laga e komunidat akí, pa Mi destruí nan umbe.’

²²Tur dos a kai na rudia i a supliká: ‘SEÑOR, Dios di tur loke ta bibu, no sea furioso riba henter e komunidat pa falta di ún hòmber.’

²³SEÑOR a bisa Moises:

²⁴‘Bisa e pueblo pa nan bai for di den bisindario di e tèntnan di Korag, Datan i Abiram.’

²⁵E ora ei Moises siguí pa e ansianonan di Israel a bai serka Datan ku Abiram.

²⁶El a bisa e pueblo: ‘Bai for di e tèntnan di e hòmbernan perverso ei. No mishi ku nada di nan propiedat, sino boso tambe ta keda destruí pa motibu di nan piká.’

²⁷Tur hende a hala atras. Datan ku Abiram a sali pafó i a keda para ku nan kasánan i nan yunan dilanti di nan tèntnan.

²⁸E ora ei Moises a bisa: ‘Awor boso ta bai haña e prueba ku ta SEÑOR a manda mi pa hasi tur e kosnan ei i ku mi no a hasi nada riba mi mes.

²⁹Si e hòmbernan akí muri un morto natural i pasa ku nan manera ta pasa ku tur hende, SEÑOR no a manda mi,

³⁰pero si SEÑOR hasi algu nunka bisto, si tera habri su boka guli nan ku tur loke ta pertenesé na nan di manera ku nan ta baha bibu den reino di morto, boso sa ku nan a hasi chèrchè di SEÑOR.’

³¹Apénas el a kaba di papia ku suela bou di nan pia a sker habri i

³²tera a habri guli nan, nan famia, tur siguidó di Korag i tur nan propiedat.

³³Huntu ku tur nan hendenan nan a baha bibu den reino di morto. Tera a sera riba nan i nan a disparsé for di komunidat.

³⁴Ora ku e israelitanan ku tabata pará rondó di nan a tende nan gritunan, nan a hui bai, pasobra nan a pensa: ‘Sino tera ta guli nos tambe!’

³⁵E ora ei a bini un kandela di SEÑOR ku a kima e 250 hòmbernan, ku tabata ofresé sensia, kompletamente.

³⁶ Despues SEÑOR a bisa Moises:

³⁷‘Bisa Eleazar, yu hòmber di saserdote Aaron, pa e saka e panchinan di kandela for di e vlamnan i tira e karbonnan sendé afó, pasobra e panchinan a bira konsagrá na Mi.

³⁸Traha di e panchinan ku a kosta bida di e pekadónan, plachi fini pa fura e altá. Komo a trese nan pa Mi, nan ta konsagrá. Asina nan lo ta un señal pa e israelitanan.’

³⁹Saserdote Eleazar a kohe e panchinan di bròns ku tabata di e hendenan ku a kima, traha plachi fini di nan i a fura e altá,

⁴⁰manera SEÑOR a ordená Moises. Nan ta rekordá e israelitanan, ku un hende no outorisá, un hende ku no ta pertenesé na e famia di Aaron, no mag bini dilanti pa ofresé SEÑOR sensia. Lo pasa kuné manera a pasa ku Korag i su kompañeronan.

⁴¹Pero e dia siguiente henter komunidat a lanta ku Moises ku Aaron i bisa: ‘Boso a mata pueblo di SEÑOR!’

⁴²Henter komunidat a bòsha rondoná Moises ku Aaron. Pero ora nan a wak tènt di enkuentro, nan a mira ku e nubia tabata tap'é i ku SEÑOR su gran splendor a aparesé.

⁴³E ora ei Moises ku Aaron a bai parti dilanti di e tènt di enkuentro i

⁴⁴SEÑOR a bisa Moises:

⁴⁵‘Bai for di e komunidat akí pa Mi destruí nan umbe.’ E ora ei nan a kai na rudia resa.

⁴⁶Moises a bisa Aaron: ‘Kohe un panchi di kandela, pone den dje karbon sendé for di riba altá i pone sensia ariba; bai inmediatamente serka e komunidat i drecha tur kos atrobe entre nan i SEÑOR, pasobra E ta laga su ira baha sin mizerikòrdia i e desaster a kuminsá kaba.’

⁴⁷Aaron a pura bai ku e panchi di kandela serka e komunidat i enberdat ya e desaster a kuminsá bou di e pueblo. El a pone sensia den e panchi i a drecha tur kos atrobe entre pueblo i SEÑOR.

⁴⁸El a bai para meimei di e esnan ku a muri kaba i esnan ku tabata na bida ainda i e desaster a para.

⁴⁹Debí na e desaster tabatin 14.700 morto, fuera di esnan ku a muri pa Korag su via.

⁵⁰Despues ku e desaster a para, Aaron a bai bèk serka Moises na tènt di enkuentro.